Tiô rơkong krếo thế dêi pôa Lương Cường - Kăn xiâm hnê ngăn tơnêi têa ƀă kơdrâi Pôa, Pơtáu Bhutan Jigme Khesar Namgyel Wangchuck ƀă kơdrâi pôa hiăng troh a Hà Nội pơxiâm lăm pôu râ kăn xiâm tơnêi têa Việt Nam sap hâi lơ 18 troh hâi lơ 22/8. Kố cho rôh lăm pôu râ Tơnêi têa ki apoăng troh Việt Nam dêi pơtau Bhutan ƀă Kơdrâi pơtáu riân sap ing péa tơnêi têa mơjiâng tơrŭm tơpui kâ a hơnăm 2012.

Riên sap ing mơjiâng tơrŭm tơpui kâ, Việt Nam đi đo nhoăm tơrŭm cheăng ƀă Bhutan, ngăn Bhutan cho môi tung mâu kong têa ki má môi tung pêi mâu pơkâ tâk ngiât, rak mâu kơlo kơxô̆ “hơniâp”.  Tung pơla mê, Bhutan đi đo ngăn Việt Nam cho môi tung mâu tơnêi têa pêi ahdrối vâ mơdêk tơrŭm cheăng péa pâ xuân môi tiah tơdroăng púi vâ hriâm túa mơnhông dêi Việt Nam.

Ing tơdroăng tơrŭm tơniăn lĕm, hneăng lăm pôu dêi pơtáu  mơhno ki rơkê dêi Bhutan ƀă tơrŭm cheăng pơla péa tơnêi, xuân môi tiah hnoăng cheăng, ki rơdêi dêi Việt Nam a kơpong, hlối  mơhnho ki nhoăm dêi Việt Nam ƀă Bhutan. Hneăng lăm pôu vâ djâ tơrŭm péa tơnêi têa rế trâu tâ, ai pơxúa, mơdêk mâu kơvâ cheăng ki kân pơla péa tơnêi têa tung la ngiâ.