Vi ƀan kong pơlê Dak Lak pơkâ pơtê 3 tơdroăng tơkêa bro iâ khế 2021 – 2025 vâ tơkŭm kơxô̆ liăn ăm Tơdroăng tơkêa bro Troăng kân Hồ Chí Minh troăng ví peăng mâ hâi lo Ƀuôn Ma Thuột dế tro hrá tơdroăng mơjiâng pro ƀă kal kơxô̆ liăn 332 rơtal liăn. Tơdroăng tơkêa bro mơ’no liăn cheăng mơjiâng troăng kân Hồ Chí Minh kơpong troăng ví peăng mâ hâi lo pơlê kong kơdrâm Ƀuôn Ma Thuột, kong pơlê Dak Lak ai tâi tâng kơxô̆ liăn mơ’no pro lối 1.500 rơtal liăn, tơkâ mâu tơring Čư Mgar, Čư Kuin, Krông Păč ƀă pơlê kong kơdrâm Ƀuôn Ma Thuột.

Tung pơla pêi pro tơdroăng tơkêa bro sap ing hơnăm 2020 troh tâi hơnăm 2023. Tơdroăng tơkêa bro troăng kân râ II, tâi tâng xŏn vâ chê 40Km, chiâng ăm phêp rơxế kơtâu 80Km/h. Troh nôkố tơdroăng tơkêa bro nếo pơcháu tơnêi châ dâng 60% laga hiăng tâi liăn vâ tăng tơnêi ƀă tiô riân kal tơ’nôm 332 rơtal liăn vâ kêi đeăng troăng kân kố.

Tơdroăng troăng kân xuân pơtối hrá, ôh tá chiâng kêi đeăng tro hâi khế pơkâ (mơ’nui hơnăm 2023), Khu xiâm pơkuâ troăng prôk ƀă rơxế kơtâu  pơkâ thế Kăn pơkuâ hnê ngăn cheăng Đảng kong pơlê ƀă Kăn hnê ngăn Vi ƀan kong pơlê Dak Lak séa ngăn luât pơkâ pêi tung tơdroăng pơxâu phâk hnoăng dêi ngế ối a ko ƀă Khu pơkuâ tơdroăng tơkêa bro mơ’no liăn cheăng mơjiâng pro troăng kân ƀă pêi chiâk deăng mơnhông mơdêk thôn pơlê Dak Lak (khu pơkuâ mơ’no liăn cheăng).