Châ mơjiâng a hâi lơ 6/12/1989, Khu pơkuâ mô đô̆i hneăng hdrối nah Việt Nam cho môi khu cheăng kal kí – rêh ối pơlê pơla, teăng mâ ăm tơdroăng ki khŏm mơ-eăm ƀă hnoăng pơxúa dêi mô đô̆i hneăng hdrối nah, cho khu tơrŭm cheăng dêi Măt trâ̆n Tơnêi têa Việt Nam xua Đảng pơkuâ. Sap ing mơjiâng troh nôkố, Khu kố hiăng đi đo xông kân rơdêi, xông tơtêk, pêi cheăng thăm mơnhông mơdêk, tro troăng ƀă châ tơƀrê.

Hneăng hôp tơkŭm po hâi mơ’nui hơnăm 2022 hiăng tơkŭm mơgêi, mơnhên tơdroăng châ tơƀrê pêi pro Pơkâ hneăng hôp kăn teăng mâ lâp tơnêi têa Khu pơkuâ Mô đô̆i hneăng hdrối nah Việt Nam roh má VI, ing mê mơhno nhên tơdroăng ki hôm ki tro, tơdroăng ki ôh tá hâi tro, xiâm kối ƀă xo vế túa ki rơkê tơtro; mơnhên troăng prôk la ngiâ, pơkâ xiâm, hnoăng cheăng, troăng pêi tung hneăng VII, hneăng hơnăm 2022 – 2027.

Hneăng hôp cho tơdroăng ki kal tung rêh ối kal kí – rêh ối pơlê pơla dêi mô đô̆i hneăng hdrối nah, mâu lêng hneăng hdrối nah ƀă kuăn pơlê lâp tơnêi têa, ing mê, pơtối mơnhên tíu cheăng, hnoăng cheăng ƀă mâu tơdroăng veăng kum kân kĭn dêi Khu pơkuâ mô đô̆i hneăng hdrối nah Việt Nam tung tơdroăng mơjiâng, gâk kring Tơnêi têa.

Xông tơpui a hneăng hôp, pôa Nguyễn Phú Trọng, Kăn xiâm pơkuâ hnê ngăn Đảng mơnhên, klêi kơ’nâi pêi kêi đeăng hnoăng cheăng tung khu mô đô̆i, rơtuh ngế kăn ƀô̆, mâu mô đô̆i hiăng lo lăm pêi cheăng lêng, vêh ƀă vêh lơ pơ’lêh pêi cheăng a mâu kơ koan tung rêm kơvâ cheăng. Mô đô̆i hneăng hdrối nah cho mâu ngế hiăng tơkâ hluâ tơplâ, pơtâp ƀă chiâng rơkê ing mâu roh tơplâ xâ, hiăng ai mâu tơdroăng ki pleăng kân ăm tơdroăng tơplâ tơleăng lĕm hdroâng mơngế, mơjiâng ƀă gak kring Tơnêi têa, nôkố dế cho môi khu ki kal dêi pơlê pơla.

Kheăn kơdeăn mâu tơdroăng châ tơƀrê tung pêi cheăng ƀă tơdroăng châ tơƀrê ki Khu pơkuâ mô đô̆i hneăng hdrối nah Việt Nam châ tơƀrê tung pơla kố nah cho tơxâng nhuô̆m khât, kum vâ ‘’Tơnêi têa tá hâi la lâi ai tơdroăng cheăng krá tơniăn, ivá rơdêi, tíu cheăng ƀă ki loi tơngah lâp plâi tơnêi môi tiah hâi kố’’, pôa Nguyễn Phú Trọng, Kăn xiâm pơkuâ hnê ngăn Đảng tối nhên, Đảng ƀă Tơnêi têa kheăn kơdeăn tơdroăng pêi cheăng ƀă mâu tơdroăng veăng kum dêi Khu pơkuâ Mô đô̆i hneăng hdrối nah Việt Nam ƀă tơdroăng mơjiâng ƀă gâk kring Tơnêi têa, mâu pú tơxâng cho tíu ki loi tơngah dêi khu râ kăn pơkuâ hnê ngăn cheăng Đảng, khu râ kăn pơkuâ ƀă kuăn pơlê.

Tối nhên, mâu hơnăm la ngiâ, tiô tối hdrối tơdroăng lâp plâi tơnêi pơtối ai mâu tơdroăng pá puât, ôh tá ‘nâi tối hdrối, tung tơnêi têa, pin xuân trâm hên mâu tơdroăng pá puât, pơloăng mơnúa, pôa Nguyễn Phú Trọng tối ăm ‘nâi, ƀă Khu pơkuâ mô đô̆i hneăng hdrối nah, Hneăng hôp má XIII dêi Đảng xuân hiăng mơhno nhên hnoăng cheăng: ‘’Mơhnhôk mô đô̆i hneăng hdrối nah mơnhông mơdêk hiâm mơno, khôi túa vâi krâ nah ‘’Mô đô̆i Pôa Hồ’’ tung mơjiâng ƀă gâk kring Đảng, Tơnêi têa, kuăn pơlê ƀă rơxông pơkuâ xah hô̆i chuh ngiah, gâk kring troăng tơmiât dêi Đảng, tơplâ mơdât mâu troăng tơmiât ki ôh tá tro, hêng hôu; kum dêi pó pêi cheăng kâ, pơ’lêh tơdroăng rêh ối.

Thăm mơdêk hnoăng dêi khu ngế tung tơdroăng hnê hriâm hiâm mơno pâ nhuô̆m tơnêi têa, khôi túa kăch măng ăm rơxông hơnăm ối nếo, kum mơjiâng ƀă rak krá tơniăn tơdroăng cheăng kal kí, mơjiâng Đảng ƀă khu cheăng kal kí krúa lĕm, ó rơdêi’’, tiô hiâm mơno kố, pôa Nguyễn Phú Trọng, Kăn xiâm pơkuâ hnê ngăn Đảng pơkâ thế:

“Khu pơkuâ mô đô̆i hneăng hdrối nah Việt Nam a mâu râ kal pêi pro tơtro tâ mê nếo hnoăng cho xiâm kối kal kí, ai hnoăng kal tung tơdroăng tơkŭm po, mơhnhôk kuăn pơlê pêi pro troăng pơkâ pêi, troăng hơlâ dêi Đảng, troăng hơlâ, luât dêi Tơnêi têa, thăm pêi pro rŭm môi tuăn tâi tâng hdroâng mơngế, mơnhông hnoăng pơkuâ dêi kuăn pơlê, mơhnhôk tŭm ivá mơdêk cheăng kâ – rêh ối pơlê pơla, tơkŭm po lĕm tro tơdroăng rêh ối dêi pơlê pơla kuăn pơlê, thăm pêi pro rơdêi mâu tơdroăng tơ’noăng pâ nhuô̆m tơnêi têa, pêi pro kuăn pơlê pơkuâ dêi hnoăng cheăng, mơjiâng tơdroăng môi tuăn pơlê pơla vâ kum pêi pro ƀlêi trâng mâu pơkâ pêi, hnoăng cheăng kal kí dêi tơnêi têa tung hneăng nếo. Đảng hnê mơhno, Tơnêi têa pơkuâ, kuăn pơlê pôu râng dêi hnoăng cheăng cho pái pâ chêng krá kâk dêi tơdroăng mơjiâng ƀă gâk kring tơnêi têa pin’’.

Pôa Nguyễn Phú Trọng, Kăn xiâm pơkuâ hnê ngăn Đảng pơkâ, Khu pơkuâ Mô đô̆i hneăng hdrối nah mâu râ khŏm gâk kring mâu tơdroăng châ tơƀrê kăch măng, thăm hnê hriâm kal kí, troăng tơmiât, kum ăm kăn ƀô̆, mơngế pêi cheăng ‘nâi nhên troăng pơkâ pêi, troăng pơkâ dêi Đảng, troăng hơlâ, luât dêi Tơnêi têa; đi đo tơkŭm, chêh tối ăm ƀă mâu khu râ, khu râ kăn pơkuâ tơpui tơno dêi mô đô̆i hneăng hdrối nah, dêi kuăn pơlê ‘na troăng hơlâ mơnhông mơdêk cheăng kâ – rêh ối pơlê pơla, tơniăn cheăng lêng – gâk kring:

“Khu pơkuâ Mô đô̆i hneăng hdrối nah mâu râ kal pêi pro tâi tâng rêm tơmeăm ki ai hlâu ƀă troăng hơlâ kơjo dêi Tơnêi têa ƀă mô đô̆i hneăng hdrối nah; tơrŭm pêi pro tơdrêng mâu tơdroăng, mâu roh mơhnhôk tung mô đô̆i hneăng hdrối nah châ tơƀrê; thăm pêi pro rơdêi ƀă mơdêk châ tơƀrê tơdroăng pêi ‘’Mô đô̆i hneăng hdrối nah kum dêi pó kơdroh kơtiê pêi cheăng kâ rơkê’’. Tơtrŏng tâ mê nếo troh mâu pơlê ki pá puât, kơpong hơngế hơhngo, đông kăch măng; mơhnhôk mâu tíu cheăng, ngế krê mô đô̆i hneăng hdrối nah veăng hên tung pêt mơjiâng, tê mơdró, mơ-eăm pro kro mơdrŏng tro luât; mơnhông mơdêk khôi túa ‘’Niân tiah hâi kố kơnôm hnoăng vâi krâ nah’’ pro ăm tơdroăng pêi cheăng pâ mơnê hnoăng kân kĭn, môi tơdroăng ki lĕm ‘’Mô đô̆i Pôa Hồ’’ dêi mô đô̆i hneăng hdrối nah Việt Nam’’.

Pôa Nguyễn Phú Trọng, Kăn xiâm pơkuâ hnê ngăn Đảng xuân pơkâ, rak ngăn ăm tơdroăng mơjiâng Khu pơkuâ mô đô̆i hneăng hdrối nah Việt Nam krúa lĕm, ó rơdêi ‘na kal kí, troăng tơmiât ƀă khu pú hên; pơ’lêh nếo ó rơdêi troăng pêi ƀă tơdroăng xiâm pêi cheăng vâ Khu pêi pro tro lĕm tơdroăng cheăng, hnoăng cheăng dêi tơná, tơniăn tơtro ƀă rêm ngế, tơmiât pêi rơdêi tŭm tơdroăng cheăng a tíu pêi cheăng, nhuô̆m ki dâi lĕm, châ tơƀrê; ví pêi to vâ mơhno a ngâ, ƀă thăm veăng mơjiâng Đảng, mơjiâng Tơnêi têa ƀă khu cheăng kal kí rế hía rế krúa lĕm, ó rơdêi, achê ƀă kuăn pơlê, rak krá tơniăn tơdroăng loi tơngah dêi kuăn pơlê ƀă Đảng ƀă Tơnêi têa.