Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkuâ ƀă ai ƀai xông tơpui pơxiâm po ki kal a Hneăng hôp. Xông tơpui pơxiâm po Hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm ‘nâi, Hneăng hôp tơpui tơno, tối ‘na 10 tơdroăng xiâm ối tung 2 khu tơdroăng ‘na troăng pêi ton xŏn ƀă mâu troăng pêi ki nhên.

Ing hiâm mơno mê, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Tơnêi têa mơdoh chôu hriăn plĕng vâ ai mâu rơkong tơpui tơtro, tối tro tơdroăng nôkố dêi khu xiâm, kơvâ cheăng, kong pơlê tơná. Tối ‘na mâu tơdroăng kal pêi tơdrêng tung la ngiâ, pôa Tô Lâm tối nhên, tơdroăng pêi pro ƀlêi trâng Pơkâ Hneăng hôp má XIII dêi Đảng cho pơkâ xiâm kân má môi dêi tâi tâng Đảng, tâi tâng kuăn pơlê, tâi tâng khu lêng pin tung hơnăm 2025; cho tơdroăng xiâm vâ pêi pro ƀlêi trâng mâu pơkâ troăng pêi cheăng ton xŏn 100 hơnăm ing pơkuâ dêi Đảng ƀă tơmiât troh 100 hơnăm mơjiâng tơnêi têa.