A tơdroăng pêi cheăng, tung tơdroăng achê hmâ, hơtô, mâu kăn teăng mâ châ trâm mâ tơpui tơno ƀă tơmâng mâu tơdroăng tơpui tối, tơdroăng pói vâ dêi mâu sinh viên ƀă droh rơtăm hdroâng kuăn ngo, tơdroăng loi tĭng tiô khôp ki tro. Kố cho mâu tơdroăng ki tro ‘nâng, ai hên tơdroăng châ tơƀrê tung hriâm tâp, pơtâp xuân môi tiah pơxiâm tăng cheăng pêi, mơjiâng cheăng pêi. Vâi xuân teăng mâ droh rơtăm pơlê tối mâu pơkâ ‘na troăng pơkâ pêi, troăng hơlâ kơjo kum ƀă sinh viên, droh rơtăm hdroâng kuăn ngo; pói vâ sinh viên, droh rơtăm châ tŏng kum mung liăn, tơdjêp cheăng pêi.

A tơdroăng pêi cheăng, khu râ kăn pơkuâ mâu tíu cheăng xuân tơpui tơno, tơbleăng inhên tâ ‘na mâu tơdroăng mơhá, troăng hơla mơhnhôk ăm sinh viên ƀă droh rơtăm hdroâng kuăn ngo, ki má lối cho tung hnê mơjiâng, tăng cheăng pêi ƀă lăm pêi cheăng ngi kong têa ê. Veăng tơdroăng pêi pro, o H Saronny Arul, sinh viên ngành quan hệ quốc tế, Học viện Ngoại giao tối:

“Mâu tơdroăng môi tiah kố mê kô mơjiâng tơdroăng ki hâk vâ ăm mâu vâi o vâ hriâm tâp lĕm tro tâ ƀă pơtâp. Xua mâu khu râ kăn pơkuâ xuân hiăng tối nhên cho mâu vâi o thế hriâm tâp lĕm tro ah vâ vêh a kố, cho môi tơdroăng ki tro, cho môi pơ’leăng hdrê krih tơviah ƀă ki rơhêng vâ tối ăm pơlê kong kơdrâm ƀă ăm kong pơlê dêi pin. Xua akố ối hên ngế dế tơkôm mâu tơdroăng ki mê môi tiah ngin o. Pói vâ la ngiâ kô ai tơ’nôm mâu roh trâm mâ vâ mơhnhôk hiâm mơno dêi mâu hok tro, sinh viên dế pơtâp ƀă hriâm tâp hơngế hngêi’’.

Roh kố, Vi ƀan pơlê kong kơdrâm Ƀuôn Ma Thuột diâp mơ-éa kheăn kơdeăn ăm 8 ngế sinh viên ai tơdroăng hriâm tâp rơkê; Khu pơkuâ Đoân Droh rơtăm pơlê kong kơdrâm Ƀuôn Ma Thuột kheăn kơdeăn 11 ngế sinh viên ƀă 31 droh rơtăm hdroâng kuăn ngo, tiô khôp ki tơtro. Teăng mâ khu râ kăn pơkuâ pơlê kong kơdrâm, pôa Trần Đức Nhật, Kăn phŏ hnê ngăn Vi ƀan pơlê kong kơdrâm Ƀuôn Ma Thuột pói vâ rêm ngế sinh viên, droh rơtăm mơngế hdroâng kuăn ngo kô cho môi kăn teăng mâ troh lâp lu khôi túa lĕm tro, um méa kuăn mơngế ƀă kơpong tơnêi Ƀuôn Ma Thuột tối krê ƀă Dak Lak tối tơdjuôm.

“Pói tơngah cho mâu pú châ kheăn kơdeăn tung tơdroăng hâi kố cho mâu ngế veăng kum hên tâ mê nếo ăm pơlê xiâm pơlê kong kơdrâm Ƀuôn Ma Thuột tối krê ƀă kong pơlê Dak Lak tối tơdjuôm tung la ngiâ. Pói vâ mâu pú kô cho mâu kăn teăng mâ, mâu ngế djâ khôi túa lĕm tro, khôi túa lĕm tro dêi pơlê kong kơdrâm Ƀuôn Ma Thuột troh ƀă pú hmâ tung tơnêi têa ƀă kong têa ê. Mâu pú kô cho mâu kăn teăng mâ ki má môi vâ veăng kum mơjiâng, tơbleăng um méa pơlê kong kơdrâm Ƀuôn Ma Thuột – pơlê kong kơdrâm kơphế dêi lâp plâi tơnêi, xuân môi tiah pơlê kong kơdrâm ngiât lĕm, ai tơrŭm lĕm, rơkê ƀă khôi túa lĕm’’.

Mơnhông khôi túa lĕm tro, rŭm môi tuăn, pâ nhuô̆m tơnêi têa dêi hdroâng mơngế Việt Nam, tung pơla kố nah, droh rơtăm hdroâng kuăn ngo ƀă tơdroăng khôp ki lĕm tro pơlê kong kơdrâm Ƀuôn Ma Thuột, kong pơlê Dak Lak hiăng đi đo mơ-eăm, pơtâp ƀă veăng hên pleăng tung tơdroăng mơjiâng ƀă gâk kring tơnêi têa. Rế hía rế hên droh rơtăm hdroâng kuăn ngo tiô hriâm a mâu hngêi trung đăi hok, kao đăng ƀă trung hok chuyên nghiệp tung lâp tơnêi têa, klêi kơ’nâi mơgêi lo hngêi trung hên sinh viên châ rah xo pêi cheăng ƀă pro kăn pơkuâ khu râ kăn pơkuâ cheăng Đảng, Tơnêi têa ƀă mâu kơvâ, mâu râ.

Ki hên mâu pú cho mâu ngế ki hâk vâ hriâm, mơ-eăm tung pơtâp, mơ-eăm tung tơdroăng rêh ối. Tơdroăng mê hiăng châ mơnhên, rế hía rế hên droh rơtăm hdroâng kuăn ngo tiô hriâm a mâu hngêi trung đăi hok, kao đẳng ƀă trung hok chuyên nghiê̆p tung lâp tơnêi têa, klêi kơ’nâi mơgêi lo hngêi trung hên sinh viên châ rah xo pêi cheăng ƀă pro kăn pơkuâ tung kơ koan Đảng, Tơnêi têa ƀă mâu kơvâ cheăng, mâu râ; rơpâu droh rơtăm thăm hriâm tâp, pêi cheăng pêt mơjiâng tơmeăm, tê mơdró pro kro mơdrŏng ăm dêi châ tơná, rơpŏng ƀă pơlê pơla, veăng kum xăm kơklêa kơdroh kơtiê, mơdêk tơdroăng rêh ối kuăn pơlê.