Kơxo lơ 11/4, a Hà Nội, Đảng ủy Khô̆i mâu kơ koan Tơnêi têa tơkŭm po Rôh hôp hnoăng cheăng hiâm mơno tơmiât ƀă tơdroăng tơpui tối dêi kuăn pơlê sap ing apoăng hneăng cheăng Hneăng hôp kân 13 vâ mơnhên tối hnoăng cheăng hiâm mơno tơmiât ƀă tơdroăng tơpui tối dêi kuăn pơlê sap ing apoăng hneăng troh nôkố ƀă hnoăng cheăng pơkâ mơ’no tung la ngiâ ƀă hnoăng cheăng hiâm mơno tơmiât ƀă tơdroăng tơpui tối dêi kuăn pơlê tung Đảng ƀô̆ Khô̆i.

Tơpui hnê mơhno a Rôh hôp, pôa Nguyễn Văn Thể, kăn pơkuâ hnê ngăn Đảng ủy Khô̆i kơ koan Tơnêi têa hnê kơhno tiah kố: Hnoăng cheăng hiâm mơno tơmiât ƀă tơdroăng tơpui tối dêi kuăn pơlê tung pơla hdrối nah hiăng châ Đảng ủy Khô̆i ƀă rêm râ pơkuâ Đảng ối tung tơnêi têa tơmâng ngăn, loi nhuô̆m; hnoăng cheăng ‘nâi nhên, tối tơbleăng, pơkâ troăng prôk ƀă tơdroăng ki pơkâ tơleăng mâu tơdroăng ‘na hiâm mơno tơmiât ƀă tơdroăng tơpui tối dêi kuăn pơlê rĕng teăm tơdrêng tâ.

Pôa Nguyễn Văn Thể pơkâ thế tung la ngiâ Đảng ủy Khô̆i ƀă rêm râ khu pơkuâ  hnê ngăn Đảng ối tung tơnêi têa pơtối pêi pro tro hnoăng cheăng rôh mơhnhôk tơdroăng tơpui ‘na rak vế hiâm mơno tơmiât dêi Đảng; tơdrêng amê hlối mơjiâng túa pơkâ tơkŭm pêi pro kơtăng mâu tơdroăng pơkâ ‘na hnoăng cheăng pôu râng djâ troăng ahdrối dêi kăn ƀô̆, đảng viên tơtro ƀă pêi pro mơgêi kơxô̆ 01 dêi Khu xiâm pơkuâ tơdroăng kal kí ‘na pơtối pêi pro tơdroăng pơkâ kơxô̆ 05 ‘na mơdêk hriâm tâp ƀă pêi pro tiô hiâm mơno túa rêh ối, hiâm mơno Hồ Chí Minh.