3 khế apoăng hơnăm, ki kơnía dêi tâi tâng kế tơmeăm a kong pơlê Dak Lak tiô riân châ lối 12.300 rơtal liăn, tâk 3,5% tâng pơchông ƀă khế kố hơnăm hdrối, nâp liăn lối 2.390 rơtal liăn, tơ’mô 34,2% liăn ngân tơnêi têa pơcháu, mâu tơmeăm ki tê ngi kong têa ê ki xiâm tâk tơniăn, kơxô̆ liăn châ xo ing tê tơmeăm ngi kong têa ê châ vâ chê 500 rơtuh dollar Mih, tâk lối 29% tâng vâ pơchông ƀă khế kố hơnăm nah.

Tơpui a Rôh hôp, pôa Nguyễn Đình Trung, Kăn pơkuâ ngăn Đảng Dak Lak ăm ‘nâi cheăng kâ rêh ối pơlê pơla dêi kong pơlê hlo mơnhông tơniăn, la xuân ối ai hên tơdroăng ki tá hâi pêi châ tơƀrê tiô tơdroăng pơkâ. Tung la ngiâ ah, kong pơlê kal mơnhên hnoăng cheăng ki kal, ki xiâm, troăng ki mơnhông tơƀrê, tro ƀă tơdroăng mơhnhôk xúa tơƀrê mâu kơxô̆ liăn.

Tơdrêng amê hlối mơhno túa pêi ki tro ƀă tơdroăng ki ai khât dêi kong pơlê, tíu pêi cheăng vâ kăn pơkuâ hnê mơhno pêi pro ƀlêi chiâng mâu tơdroăng pơkâ hnoăng cheăng hơnăm 2024.