Tơpui a rôh pơxiâm po Rôh hôp, pôa Trần Thanh Mẫn, Kăn xiâm phŏ hnê ngăn Kuô̆k hô̆i tối nhên, tơdroăng cheăng dêi Kuô̆k hô̆i Hneăng 15 ƀă Hô̆i đong hnê ngăn hneăng hơnăm 2021 – 2026 hiăng ai hên hơ’lêh nếo, mơ’no mâu troăng vâ pêi pro tro tâ troăng hơlâ luât séa ngăn, hnê mơhno tơdroăng cheăng dêi Hô̆i đong hnê ngăn, ing tơdroăng ki pêi pro klêi luât troh tơdroăng thăm mơdêk mâu tơdroăng cheăng tơrŭm pơla Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i, kơ koan ối tung Vi ƀan pơkuâ Kuô̆k hô̆i ƀă Hô̆i đong hnê ngăn mâu kong pơlê, pơlê kong kân.

Hô̆i đong hnê ngăn xuân hiăng kơdo mơ-eăm, hơ’lêh nếo, tơmiât rơkê tung tơkŭm pêi pro mâu hnoăng cheăng; séa ngăn troăng hơlâ pơkâ dêi Đảng, luât dêi Tơnêi têa; pêi pro hơ’lêh chiâng mâu tơdroăng Pơkâ, troăng hơlâ tŏng kum, troăng hơlâ pêi pro teăm tơdrêng pơkâ thế pêi pro tơdroăng ki ai khât a rêm kong pơlê; veăng kum kal khât tung tơdroăng pêi pro mâu pơkâ mơnhông cheăng kâ rêh ối pơlê pơla, tơdroăng cheăng lêng, gâk kring, tơpui kâ dêi rêm kong pơlê ƀă lâp tơnêi têa.