Rôh hôp tơkŭm po tơdrêng, hlối tơkŭm po mơ’no ing troăng hyôh internet troh mâu tíu ki mơ’no sap ing Tơnêi têa troh râ tơring, cheăm Rôh hôp kố cho vâ pơkâ kơtăng mâu tơdroăng ki kal xiâm, tơdroăng ki nếo, ki kal dêi hlá mơ-éa rôh hôp Tíu xiâm Đảng nếo po sap ing hâi lơ 10/4 troh hâi lơ 12/4.

Mâu kăn châ pơkâ mơ’no 3 tơdroăng. Má môi, cho ‘na hlá mơ-éa pơtroh ăm Hneăng hôp 14 dêi Đảng. Tơdroăng ki kal má 2 ‘na ‘mâi pơhlêh Luât ƀă tơdroăng luât; Túa tơmiât pêi pôk kăn Kuô̆k hô̆i hneăng 16 ƀă kăn Hô̆i đong hnê ngăn rêm râ pơla hơnăm 2026 – 2031.

Tơdroăng kal má 3, ‘na pơtối klâ xoăng kơ koan cheăng tơnêi têa iâ, pêi cheăng xêt tơƀrê, ‘mâi pơhlêh ‘mot tơ’nôm mâu tơdroăng pơkâ dêi Đảng ai tơdjâk troh tơdroăng ki klâ xoăng tíu pêi cheăng iâ tơkŭm pêi xêt tơƀrê.