Veăng hôp a rôh hôp ai pôa Trần Tuấn Anh, Ngế cheăng tung Khu xiâm ngăn tơdroăng kal kí, Ngế xiâm pơkuâ Khu ngăn tơdroăng cheăng kâ Tơnêi têa, teăng mâ mâu khu xiâm, kơvâ cheăng, kăn pơkuâ 5 to kong pơlê Tây Nguyên, mâu khu ki rơkê plĕng ‘na cheăng kâ, khu ki hriăn ngăn ‘na khoa hok, mâu khu mơdró kâ. A rôh hôp, mâu kăn hiăng tối tơdrăng mơhno mâu tơdroăng ki tá hâi tơƀrê tung rak ngăn, rak vế mơnhông pêt kong dêi Tây Nguyên nôkố.

Mê cho ƀăng tơnêi kong ki hía xua tơdroăng ki ko ‘nhiê kong, hdi xo tơnêi kong, keo ko loăng ôh tá tro luât. Tơdroăng ki tơtrâ mâu ngế ki pêi dêi tơdroăng cheăng ‘na rak ngăn kong pơtối hlo ôh tá tơniăn ƀă rế hía rế rơ-iêo. Hnoăng cheăng hnê tối mơhnhôk maluâ pêi pro đi đo la ôh tá tơƀrê ƀă hên tơdroăng ki ê. Mâu rơkong ki veăng tơpui tối châ tơbleăng a rôh hôp hiăng tơkŭm tung mâu tơdroăng  ki kal vâ mơnhên tối troăng hơlâ, luât tơnêi tơníu nôkố; tơpui tối leăng mâu tơdroăng pơkâ, troăng hơlâ bro chiâng ivá mơdêk tơƀrê rak ngăn, rak vế ƀă mơnhông pêt kong.