A rôh hôp, Pôa Đỗ Văn Chiến, kăn pơkuâ tíu xiâm Đảng, Kăn hnê ngăn Vi ƀan xiâm Măt trâ̆n Tơnêi têa Việt Nam, kăn phŏ hnê ngăn Hô̆i đong Tơ’noăng – Khĕn kơdeăn Tơnêi têa kơdeăn khĕn ƀă tối nhên klêi kơ’nâi tơ’noăng 5 to pơlê kong kân veăng kum kal khât tung tơdroăng mơnhông cheăng kâ rêh ối pơlê pơla lâp tơnêi têa.

Tối nhên, hơnăm 2024 cho hơnăm ki pơxúa khât, rơdêi ‘na pêi klêi mâu tơdroăng mơnhông cheăng kâ rêh ối Hneăng hôp 13 dêi Đảng ƀă tơdroăng cheăng tung la ngiâ 5 hơnăm 2021 – 2025 ƀă pơkâ Hneăng hôp Đảng mâu pơlê kong kân. Xua mê, mâu pơlê kong kân kal séa ngăn khât mâu inâi pơkuâ hơnăm 2024 dêi Chin phuh vâ mơnhên inâi pơkuâ dêi rêm to pơlê kong kân, tơbleăng tơdroăng tơ’noăng pâ nhuô̆m tơnêi têa trâu rơdâ, mơhnhôk rêm rơxông kuăn pơlê, mâu khu mơdró kâ ‘mâi mơnhông xơpá, mơ-eăm pêi klêi pơkâ sap ung khế ki apoăng, hneăng ki apoăng dêi hơnăm.