Ô vâi krâ-nhŏng o, pú hmâ ƀă vâi lêng lâp tơnêi têa!

Rơnó Hơngui hiăng troh ƀă tơrêm ngế, tơrêm rơpŏng hngêi! Tung chôu phut tơklâ hơnăm ton ƀă hơnăm nếo ki lĕm lih ƀă krih tơviah dêi kong plêng, tơnêi tơníu, pin koh mơnê nhoăm hnoăng cheăng ki lĕm tro dêi vâi krâ xiâm rêi hdroâng hdrê mơngế pin, mâu rơxông pâ pôa hiăng to lâi chal, to lâi rơxông hiăng ‘no ivá mơno, kơdo mơ-eăm mơjiâng, bro chiâng tơmeăm khoăng, tơdroăng ki lĕm lih, tơniăn krá tơnêi têa, ăm rơnó Hơngui tơniăn krê, ăm Kuăn pơlê pin châ rêh tơ’lêi hlâu, niên nok, phâi tơtô, hơniâp ro, ăm troăng prôk, ivá cheăng, túa rêh ối, ki tơxâng hâk mơnê krip dêi tơnêi têa a hâi kố.

Tung chôu phut ki hơniâp ro, sôk suâ, krih tơviah koh tơdah Têt tiô khôi hmâ dêi hdroâng mơngế, teăng mâ Khu xiâm pơkuâ hnê ngăn Đảng, Tơnêi têa, á pâ phep pơtroh vâi krâ-nhŏng o, pú hmâ, vâi lêng lâp tơnêi têa, nhŏng o pin ki rêh ối, pêi cheăng, hriâm tâp a kong têa ê ƀă hiâm tuăn ki mơjo pâ, rơkong tơpui tơno ki hâk mơnê ƀă rơkong rơkâu hơnăm nếo lĕm ro, tro hơniâp má môi, tơrŭm, nhŏng o ƀă mơnhông krá tơniăn!

Hơnăm nah, ƀă tơdroăng tơrŭm tơrôa, kơdo mơ-eăm dêi tâi tâng Đảng, tâi tâng kuăn pơlê, tâi tâng lêng, tơnêi têa pin hiăng mơnhên hnoăng cheăng ki nếo, ngiâ méa nếo dêi môi tơnêi têa Việt Nam khên tơnôu tung pơla trâm tơdroăng pá puât, đi đo kâi chân rak vế, pêi pro mâu tơdroăng ki kơnía, ki lĕm tro, xua vâ tăng pro pơxúa ki kân má môi ăm Kuăn pơlê, châ pêi pro mâu hnoăng cheăng ki kân, ki kal, tŭm têk kơvâ cheăng, tung mê hiăng ai hên hnoăng cheăng pêi pro ki kân kĕng; đi đo cho môi ngế pú hmâ ƀă hiâm tuăn tơdrăng lĕm, cho pú hmâ ki tơxâng loi tơngah dêi mâu kong têa vâi ê, châ tâi tâng mâu kong têa vâi ê hâk mơnâ, mơnê nhoăm, mơnhên tối tơxâng tro ‘ló khât.

Chôu phut tơklâ hơnăm ton lo hơnăm nếo cho roh ki pin tơmiât nhên ‘na mâu tơdroăng hiăng hlo, hiăng ‘nâi, hiăng nhên, hiăng plĕng tung pơla hdrối mê hía nah, tơmiât troh a hâi la ngiâ ah tung tơdroăng bâ eăng dêi rêm ngế, rêm rơpŏng hngêi ƀă hdroâng mơngế. Á loi tơngah tiah kố, pơtối mơdêk ivá tơrŭm tâi tâng hdroâng mơngế ƀă mâu tơdroăng ki kơnía lĕm tro dêi khôi túa, vêa vong, kuăn mơngế Việt Nam, vâ pơ-eăng tơdroăng ki kơnía, kơnâ, tuăn rơkê plĕng ƀă po rơdâ ivá ki rơkê plĕng dêi tơrêm ngế, xúa dâi mâu tơmeăm khoăng, pro tơ’lêi hlâu ing rêm ivá cheăng, kô mơjiâng chiâng ivá ki kân rơdêi, vâ hdroâng mơngế pin krá tơniăn kâi prôk pá ngiâ châ hên hnoăng cheăng ki kân luâ tâ kơ mê nếo.

Rơnó Hơngui po rơdâ ‘nâi to lâi hiâm mơno pói rơhêng vâ, púi hêng châ ƀă pơxiâm ai tơdroăng ki lĕm tro má môi, phâi tơtô má môi, rêh ối ki tơniăn ro má môi. Tung tơdroăng ki hơniâp ro a rơnó Hơngui dêi kong plêng, tơnêi tơníu a rơnó Hơngui dêi hiâm mơno mơngế tơkŭm, tơmot, pin rơtế dêi pó koh tơdah mâu ivá rơdêi krá chân ki nếo, pơtroh ăm dêi pó mâu hiâm mơno pói rơhêng tơdrăng tơpâ, lĕm tro, rơtế rơkâu ăm hdroâng mơngế rêh ối ton tâ nêó, ăm tơnêi têa rế hía rế kro mơdrŏng, thăm rế rơkê hlê, ăm tơdroăng rêh ối kuăn pơlê rế hía rế phâi tơtô, hơniâp ro!

Rơkâu vâi krâ-nhŏng o, pú hmâ, rêm rơpŏng hngêi, rêm kuăn pơlê Việt Nam ai ivá mo krá, tơniăn lĕm, ƀlêi chiâng ƀă hơniâp ro!

Hơnăm nếo, tuăn mơno nếo, ivá nếo, kơdo mơ-eăm nếo, ƀlêi chiâng nếo!

Koh mơnê!