Tung mâu hâi mơ’nui hơnăm, tơdroăng phiu ro tung rơnó pêi chiâk deăng dêi kuăn pơlê Đăk Mế, cheăm tíu tơkăng kong Bờ Y, tơring Ngọc Hồi, kong pơlê Kon Tum dế thâ pêi khât ó. Tơdrêng ƀă khŏm rĕng pêi klêi tơdroăng klâng chiâk, kuăn pơlê a pơlê Đăk Mế xuân mơdoh chôu kơpuih văng krúa lĕm dêi hngêi trăng, rôe tơmeăm, kế kâ, tơmeăm tơdah Têt Lo hơnăm nếo Qúy Mão.

Pôa Y Pan krâ pơlê ăm ‘nâi, kuăn ngo Brâu bú ai 173 rơpŏng ƀă vâ chê 600 pơ’leăng mâ mơngế, lăm rêh ối a pơlê Đăk Mế. Tơdah Têt hơnăm nếo kố mơngế Brâu ai hên tơdroăng hâk ro ki nếo:

“Kuăn ngo Brâu pêt kơphế, kơxu klêi mê pêt báu klâng, nôkố rơpŏng hngêi ki iâ châ xo dêi 6 tâ̆n. Păn kơpôu, ro, chu, í châ xo hên. Tơdroăng rêh ối dêi mơngế Brâu nôkố hiăng tơƀrê. Cheăng kâ krá tơniăn ƀă mơnhông tơƀrê’’.

Môi tiah a pơlê Đăk Mế, tơdroăng phiu ro hâi Têt, ro rơnó Hơngui dế troh lâp lu tung 7 to thôn ki u ối a cheăm tơkăng kong Bờ Y, tơring Ngọc Hồi, kong pơlê Kon Tum. Ƀă tơdroăng tơnêi tíu malối, cheăm Bờ Y ai troăng tíu tơkăng kong achê tíu tơkăng kong péa tơnêi têa pú Lếo ƀă Kul. Tơdrêng ƀă mâu hdroâng kuăn ngo ki rêh ối ton hơnăm akố, Bờ Y ối cho pơlê ki má péa dêi kuăn pơlê hên hdroâng kuăn ngo nhong o troh rêh ối pro pơlê nếo a kố.

Xua mê, Têt dêi lối 2.100 rơpŏng kuăn pơlê ƀă lối 8.000 pơ’leăng mâ mơngế a cheăm Bờ Y cho Têt ki ai hên túa mơngiơk mơhno ki lĕm tro.  

Thiê̆u tă Nguyễn Văn Hiền, Kăn phŏ - pơkuâ cheăng kal kí Đông tơkăng kong tíu tê mơdró kăng kong Bờ Y ăm ‘nâi, vâ tâi tâng mâu rơpŏng kuăn pơlê a cheăm malối cho rơpŏng ki xơpá xuân châ kâ Têt, tơdrêng ƀă mâu kăn cheăm tơring, mâu kăn ƀô̆, mố đô̆i gâk tơkăng kong tíu tê mơdró tơkăng kong Bờ Y tung mâu hâi ki kố xuân hiăng tơvâ tơvân tơkŭm rôe tơmeăm vâ lăm pôu hbru tơmeăm Têt ăm kuăn pơlê:

“Đông lêng tơrŭm ƀă mâu râ Đảng, mâu kăn cheăm tơring tơkŭm po Hâi leh pro kơƀăn tơxông, tơdroăng rơnó hơngui a tíu tơkăng kong tơtô hiâm mơno kuăn pơlê ing mê vâ rêm ngế kuăn pơlê ngế ki lâi xuân ai môi rơnó Têt tơtô lĕm. Mâu rơpŏng kơtiê, rơpŏng vâ chê kơtiê ôh tá ai kơƀăn tơxông mê tơrŭm ƀă mâu thôn vâ tơkŭm kơxuô kơƀăn ƀă ăm mâu ki xơpá kơƀăn tung rôh Têt Lo hơnăm nếo”.

Vâ mâu rơnó Hơngui lĕm ro a tíu tơkăng kong, tơdrêng ƀă tơdroăng rak ngăn, kring vế tíu tơkăng kong tơnêi têa, kăn ƀô̆ lêng Đông tơkăng kong Kon Tum ối ai mâu tơdroăng veăng ‘no hnoăng ki kal tung mơnhông cheăng kâ - rêh ối kơpong tíu tơkăng kong.

Tơdroăng “Têk chêng o hvêa prôk troh hngêi trung”; Mâu túa veăng kum kuăn pơlê mơnhông cheăng kâ, kơdroh kơlêa xăm kơtiê…  pơtối rak vế ki tro tơƀrê cho trếo ki krá kâk rơtế hmâ pơla mâu lêng ƀă kuăn pơlê a tíu tơkăng kong tơnêi têa.

Krê hơnăm 2022 kăn ƀô̆, mâu lêng tơkăng kong Kon Tum kum kuăn pơlê lối 2.600 hâi pêi cheăng rak ngăn, krí xo dêi mâu tơmeăm pêt ƀă mơgrúa dêi thôn pơlê; trâ văng, ‘mâi rơnêu lối 30km troăng tơkăng kong tung thôn pơlê ƀă kâng pro rơchôa; khăm, pơlât, xing xoăng pơkeăng tê kơtê ăm lối 1.600 hdrôh ngế; Tơrŭm ƀă mâu tíu pêi cheăng mơjiâng, pơcháu 5 “toăng hngêi tơrŭm tuăn” ƀă “Hngêi tơtô hơ-ui pâ” ăm mâu rơpŏng kơtiê…

Tung hngêi lĕm ki nếo klêi mot dêi vâ teăm tơdah koh hơnăm nếo, ngoh A Hai, pơlê Măng Tách, cheăm Đăk Long, tơring Đăk Glei phiu ro drêng tối troh tơdroăng rêh ối ki hiăng pơ’lêh dêi 67 rơpŏng kuăn pơlê:

“Hdrối nah, kuăn pơlê hâi hlê plĕng tung pêi cheăng kâ, hâi hlê kih thuât mê hơnăm ki lâi xuân kơklêa, klêi mê ôh tá bê hmê kâ. Kăn ƀô̆ mâu lêng đông tơkăng kong hnê kuăn pơlê pêi cheăng kâ mơnhông pêt kơphế mê troh nôkố hlo kuăn pơlê hiăng tơƀrê tâ iâ. Hiăng pơ’lêh khât tâ hdrối nah tŭm tơdroăng. Kuăn pơlê plĕng xêh, ‘nâi xêh, pêi pro dêi xêh. Nôkố hiăng châ meăn pro hngêi lĕm. Nôkố hên rơpŏng hngêi xuân ai rơxế hlo hiăng hôm tâ mâu hơnăm hdrối mê hía nah’’.

Ai mâ kring vế a tíu tơkăng kong tơnêi têa xŏn lối 292km achê ƀă kong têa pú Lếo prế Kul pơla troăng tơkâ luâ kong pơlê Kon Tum tung mâu hâi vâ chê Têt tâ tung hiâm mơno hơniâp ro tơdroăng tơrŭm dêi rơpó pơla mâu lêng ƀă kuăn pơlê a tíu tơkăng kong. Thươ̆ng tă Nguyễn Văn Ngự, Kăn ngăn cheăng kal kí Đông mố đô̆i gak tơkăng kong Đăk Long a cheăm Đăk Long, tơring Đăk Glei ăm ‘nâi, tơdroăng tơkŭm ăm kuăn pơlê a 9 thôn pơlê tung cheăm tơdah Têt tro rơnó Hơngui môi tơdroăng ki tro hlối cho hnoăng pêi pro, hlối mơhno hiâm mơno pâ dêi mâu kăn ƀô̆ mâu lêng a đông.

“Ngin tơrŭm ƀă mâu chi đoân cheăm tơring tơkŭm po mâu tơdroăng trâm mâ mơhno túa lĕm tro, hơdruê xuăng, tơ’noăng ivá ƀă tơkŭm po xah hêi ro rơnó Hơngui, tơdah Têt ƀă hiâm mơno ro rơnó Hơngui la ôh tá piu tơdroăng cheăng pêi dêi tơná. Ngin xing xoăng mâu kăn ƀô̆, đảng viên pêi tơdroăng cheăng tung pơlê chu lăm tơdah Têt rơtế ƀă mâu Kuăn pơlê kring tơniăn ăm kuăn pơlê rơtế ƀă kuăn pơlê châ xah hêi Têt ro - Tơniăn- ‘Nâi kơdĭng. Ƀă mâu rơpŏng kơtiê mê ngin mơhnhôk tăng mâu tơmeăm hbru ăm kuăn pơlê vâ kuăn pơlê a hâi Têt ai hmê kâ, châ kâ hơ’nêh, ai kơƀăn há’’.

Tơdah chôu phut ki tâi hơnăm ton vâ lo hơnăm nếo Nhâm Dần 2022 ƀă koh tơdah hơnăm nếo Qúy Mão 2023, kuăn pơlê, mâu kăn rơtế ƀă kăn ƀô̆, mâu lêng tơkăng kong drô troăng tơkăng kong achê ƀă péa tơnêi têa pú Lếo prế Kul dế tơkŭm pêi hên tơdroăng tơdah Têt ro rơnó Hơngui. Tơdroăng phiu thăm rế ro tâ drêng hiăng tâi hơnăm 2022 ai 6 kơpêng 13 to cheăm tơkăng kong dêi kong pơlê Kon Tum hiăng châ mơnhên tối thôn pơlê nếo tơdrêng amê, cho troăng tơkăng kong dêi tơnêi têa châ kring vế tơniăn, cheăng kâ rêh ối kơpong tơkăng kong mơnhông tơƀrê.

Kố cho mâu tơdroăng ki kal vâ kuăn pơlê, mâu kăn rơtế ƀă kuăn pơlê, mâu kăn tơdrêng ƀă mâu kăn ƀô̆, mâu lêng gak tơkăng kong Kon Tum pơtối kring vế, gak ngăn tơniăn.