Ƀă tơdroăng tơviah krê dêi kuăn pơlê hdroâng kuăn ngo Tây Nguyên ki hên ai tơdroăng rêh ối phá tơviah tâ ƀă mâu kơpong ki ê, ki xiâm rêh cheăng kâ ƀă mâu cheăng pêi chiâk deăng pêt tơmeăm a kong pơlê, hên ngế tá hâi ai rôh ki lo ing pơlê cheăm tung hên hơnăm. Xua mê, hnoăng cheăng hnê tối, malối cho pơtâng tối ‘na têa kơxĭ chuăn rơlố pâ thế rơkê, ƀă hên túa ki hnê tối, tơkŭm pơla hnê tối ƀă hnê mơhnhôk.

Kŏng ti xiâm Tân Cảng Sài Gòn hiăng tơrŭm ƀă mâu kong pơlê, tíu pêi cheăng tơkŭm po lố chât rôh hnê tối ‘na têa kơxĭ, chuăn, tơ’mot mâu ngế cheăng ăm lối 4 rơpâu ngế kăn ƀô̆, đảng viên, mâu mố đô̆i hneăng hdrối, kuăn pơlê, kŏng nhân, sinh viên ƀă ƀai hrâm a kơpong Tây Nguyên. Pôa A Bớt, kăn phŏ pơkuâ ngăn Đảng kong pơlê Kon Tum ăm ‘nâi:

“Tân Cảng Sài Gòn hiăng pơtroh ngế chêh hlá tơbeăng troh a mâu tơring hơngế dêi kong pơlê vâ tơbleăng hnê tối kum ăm kăn ƀô̆ đảng viên, kuăn pơlê malối cho mâu vâi o hok tro hlê khât ‘na hnoăng têa kơxĭ chuăn rơlố Việt Nam. Rôh hôp cho rôh vâ Khu pơtâng tối tơdroăng kal mâu kong pơlê mơnhên tối tơdroăng pêi pro hnoăng cheăng tơrŭm ƀă trâm mâ hriâm ƀối, tơpui tơno ăm dêi rơpó ki rơkê mâu túa pêi ki tro ‘ló lơ tung tơdroăng pêi dêi hnoăng cheăng kal kí dêi Đảng ƀă Tơnêi têa”.

Rôh tơ’noăng tí tăng ‘nâi ing troăng hyôh internet “Tân cảng Sài Gòn 35 hơnăm mơ-eăm troh lâp plâi tơnêi, tơdjêp lâp plâi tơnêi” hiăng tơ’mot vâ chê 50 rơpâu ngế tung 63 to kong pơlê, pơlê kong kân veăng; pro tơdjâk ivá ‘na tíu ối, hnoăng cheăng ki kal dêi têa kơxĭ, chuăn rơlố  Việt Nam a kong pơlê tung lâp tơnêi têa tối tơdjuôm ƀă dêi Tân Cảng Sài Gòn tối krê. Vâ mơdêk hnoăng cheăng tơrŭm hnê tối têa kơxĭ rơlố ƀă mâu kong pơlê, pôa Huỳnh Thế Mạnh, ngế xiâm pơkuâ Khu pơtâng tối tơdroăng kal kong pơlê Gia Lai pơkâ thế:

“Pơtroh ngế ki tối tơbleăng kum ăm Khu pơtâng tối tơdroăng kal troh a mâu tơring tối ‘na tơdroăng ki kal, tíu cheăng hnoăng cheăng ki kal dêi têa kơxĭ chuăn rơlốu Việt Nam, tơdroăng a Biển Đông nôkố. Nôkố tơkŭm po rôh tơ’noăng ki ai pơxúa kal, tơdjâk troh tơdroăng pâ nhuô̆m têa kơxĭ ăm kuăn pơlê”.

Đại tá Nguyễn Năng Toàn, Kăn pơkuâ ngăn Đảng, Kăn hnê ngăn Kŏng ti xiâm Tân Cảng Sài Gòn tối nhên: Tung hơnăm 2024, Kŏng ti xiâm Tân Cảng Sài Gòn tối krê mơnhên kô thăm mơdêk tâ nếo mâu tơdroăng ki tơrŭm ƀă Khu pơtâng tối tơdroăng kal mâu kong pơlê Tây Nguyên tá túa pơkâ ƀă kơxô̆ rôh. Tung mê, tơkŭm hơ’lêh nếo, bro hơ’lêh mâu túa ki hnê tối, tơtrŏng po rơdâ tơ’nôm mâu ngế ki hnê tối, tơdrêng amê hlối tơkŭm ‘na tơdroăng ki hnê tối ‘na têa kơxĭ, chuăn rơlố ƀă tơdroăng cheăng “Pâ mơnê”, kum tơdroăng rêh ối pơlê pơla, vâ mơdêk ki rơkê plĕng ƀă tơƀrê tung hnoăng cheăng hnê tối troh lâp lu kuăn pơlê.

“Kô pơtối mơdêk kơxô̆ ngế ki tối tơbleăng vêh troh a mâu kong pơlê, pơtối hơ’lêh nếo túa ki hnê tối, tơbleăng tung rơ’jíu troh hên ngế tâ ƀă kuăn pơlê hdroâng kuăn ngo Tây Nguyên, pơtối po rơdâ mâu ngế ki châ hnê tối, tơtrŏng troh mâu hok tro sinh viên, khu mơdró kâ, khu tơrŭm cheăng, khu ki ‘no liăn cheăng ƀă mơdêk ivá rơdêi tŭm têk, mơhnhôk tơlo mâu kơxô̆ lăn vâ mơnhông tơƀrê hnoăng cheăng hnê tối”.

Pôa Đỗ Văn Yên, kăn phŏ pơkuâ hnê ngăn Đảng lêng têa kơxĭ ăm ‘nâi: Đảng ủy,Khu pơkuâ ngăn lêng têa kơxĭ pơtối tơrŭm krá, tơbleăng pêi pro châ tơƀrê ƀă pêi tơkâ luâ mâu túa pơkâ, hnoăng cheăng mơ’no, pơtối hriăn ngăn mâu tơdroăng kal, túa pơkâ nếo; tơrŭm ƀă mơdêk tơ’noăng “Xua têa kơxĭ, chuăn rơlố Việt Nam” ƀă tơdroăng “Lâp tơnêi têa xua Trường Sa, Trường Sa, xua lâp tơnêi têa”.

“Hnoăng cheăng rak vế hnoăng pơkuâ têa kơxĭ, chuăn rơlố tung tơdroăng nếo pơkâ mơ’no a ‘ngêi tâ hnoăng cheăng hnê tối. Khu lêng têa kơxĭ pơtối tung la ngiâ ah tơrŭm ƀă mâu kong pơlê, pơlê kong kân khu xiâm kơvâ cheăng tơnêi têa mơdêk ki rơkê tung hnê tối’na têa kơxĭ, chuăn rơlố, mơnhên kố cho hnoăng cheăng ki kal”.

Kŏng ti xiâm pêi pro tơƀrê hnoăng cheăng tŏng kum, rêh ối pơlê pơla a 3 kong pơlê hiăng kĭ; roăng rak troh tá ah 28 ngế Jâ Nôu Việt Nam Khên tơnôu, nhŏng o nôu pâ dêi mố đô̆i ki hiăng hlâ xua tơplâ a kong pơlê; tŏng kum bro 15 toăng hngêi tơrŭm; diâp liăn hriâm rơkê “Têk bâ tơdroăng tơmiât vâ” ăm mâu vâi o hok tro kơtiê tơkâ luâ xơpá hriâm rơkê. Diâp tơmeăm ăm mâu ngế ki châ tơnêi têa kum, ngế ki ai hnoăng, kuăn pơlê kuăn ngo ai tơdroăng rêh xơpá, mố đô̆i tro rong, mố đô̆i châi  tamo a kong pơlê.