*Tung péa rơxông tơplâ khu lêng Pơhlăng ƀă xông pơplâ xâ Mih nah, cheăm tíu tơkăng kong Quảng Trực, tơring Tuy Đức, kong pơlê Dak Nông) cho tíu ‘mâi mơjiâng, mơnhông hnoăng cheăng kăch măng a kơpong peăng hdroh Tây Nguyên. Ƀă hnoăng cheăng ki khên tơnôu, rơkê ƀĕng tung hneăng tơplâ dêi kăch măng, hơnăm 2029, cheăm Quảng Trực hiăng châ Ngế pro xiâm hnê ngăn Chin phuh mơnhên cho cheăm Tơniăn tung kơpong ƀă châ tơdah Ƀâng ki châ pơ-eăng dêi kong pơlê.

Jâ Thị Brao, ngế ki châ kuăn pơlê loi tơngah má môi a pơlê Bu Prăng 1A, chreăm Quảng Trực tối ăm ‘nâi, vâi krâ-nhŏng o mơngế M’Nông a tíu kố hâk tơngăm ‘nâng ‘na hnoăng cheăng dêi kăch măng ki khên tơnôu. Vâi krâ-nhŏng o đi đo kơdo mơ-eăm rak vế, pơtối mơdêk hnoăng cheăng ki mê, tá tung tơdroăng pêi chiâk pêi deăng, pêi cheăng kâ.

“Vâi krâ-nhŏng o ngin hâk tơngăm ‘nâng ‘na hnoăng cheăng kăch măng khên tơnôu dêi kơpong tơnêi tíu Quảng Trực kố. Mâu hơnăm hdrối mê hía nah, ngin xuân hiăng đi đo mơhnhôk vâi krâ-nhŏng o tơrŭm, môi hiâm môi mơno, đi đo loi, tiô Đảng, Tơnêi têa vâ mơjiâng hnoăng cheăng kach măng ki khên tơnôu. Xuân drêng mot tung hơnăm nếo kố, á rơkâu tâi tâng vâi krâ-nhŏng o tung pơlê ƀă vâi krâ-nhŏng o tung lâp tơnêi têa môi hơnăm nếo ƀlêi chiâng, đi đo tơrŭm, môi hiâm môi mơno vâ mơjiâng pơlê pơla, tơnêi têa rế hiá rế xông tơtêk”.

*Kuăn pơlê mâu hdroâng kuăn ngo a tơring Ia Pa, kong pơlê Gia Lai đi đo hâk tơngăm cho kơpong tơnêi ki kro hnoăng cheăng kăch măng. Lâp tơring nôkố ai lối 11 rơpâu 100 rơpŏng, ai dâng 57 rơpâu pơ’leăng mâ mơngế, tung mê, ai lối 70% cho hdroâng kuăn ngo ki iâ mơngế, ki hên cho hdroâng kuăn ngo Bơhnéa ƀă Jarai.

Kố cho tơring ki kro mơdrŏng pêi pro hên hnoăng cheăng kăch măng, hên khu droh rơtăm hiăng veăng ƀă xông kân tung rơxông kăch măng, kơ’nâi mê hiăng chiâng khu kăn xiâm dêi tơring, cheăm. Cho rơxông droh rơtăm ki hiăng xông rơkê ing kơpong tơnêi ki kro mơdrŏng, ngoh Rô Hôk, ối a cheăm Ia Mrơn, tơring Ia Pa hâk tơngăm tối:

 “Cheăm Ia Mrơn, tơring Ia Pa, kong pơlê Gia Lai cho kơpong tơnêi ki kro hnoăng cheăng dêi kăch măng. Kố cho tíu ki lăm pro kăch măng ƀă hiăng ai hneăng xông pơplâ xâ pro tơleăng lĕm hdroâng mơgế. Klêi kơ’nâi tơnêi têa tơrŭm chiâng môi, kơnôm châ ai tơdroăng tŏng kum ngăn khât dêi Đảng, Tơnêi têa, vâi krâ-nhŏng o a tíu kố đi đo tơrŭm, kơhnâ tung pêi chiâk pêi deăng pêi cheăng kâ châ mơnhông tơtêk, kơdroh tah kơklêa kơtiê xapá. Kơnôm tiah mê, hên rơpŏng hngêi rế hiá rế châ mơnhông, tơdroăng rêh ối rế hiá rế tơtêk chiâng kro, hơ’lêh rêm hâi. Pơtối rak vế, khu vâi droh rơtăm a tơring kố, á đi đo djâ troăng ahdrối pơtối mơdêk, rak vế, pêi pro tiô hnoăng cheăng dêi kăch măng. Tơdrêng amê, hnê tối, mơhnhôk vâi krâ-nhŏng o kuăn pơlê pêi pro tiô troăng tơdjâ dêi Đảng, hnoăng pơkâ dêi luât tơnêi têa; kơhnâ khât tung mơnhông pêi cheăng kâ, kơdroh tah lôi khôi túa, vêa vong ki ôh pá tro; rak vế ngăn tơnêi tíu, hyôh kong prâi tâ tá, tơvâ hnê mâu vâi o, vâi muăn, rơxông nếo kơhnâ mơ-eăm hriâm tâp tá troh a hâi mơ’nui ah, veăng kum mơjiâng pơlê ki pro kăch măng rế hía rế kro mơdrŏng, lĕm ro”.