A Gia Lai, 2847 ngế droh rơtăm kong pơlê Gia Lai lăm pro mố đô̆i a kơxo lơ 25/2. Tung kơxô̆ ki kố, ai 59% cho hdroâng kuăn ngo, 479 ngế chêh đơn mơhnŏng vâ pro mố đô̆i, 72 ngế hriâm đăi hok, kao đăng. Leh pơcháu tơdah xo lêng châ kong pơlê Gia Lai tơkŭm po kân krip a 17 to tíu a 17 to tơring, pơlê kong krâm, pơlê kong kơdrâm dêi kong pơlê.

Ƀă a Dak Lak, ai 3,026 ngế kuăn pơlê lăm pro mố đô̆i tung rôh kố. Mâu tíu ki pơcháu vâi rơtăm lăm pro mô đô̆i a pơlê kong krâm Ƀuôn Hồ, Dak Lak, ai Trung tươ̆ng Thái Đại Ngọc, Kăn pơkuâ quân khu V, kăn pơkuâ ngăn Đảng kong pơlê Dak Lak Nguyễn Đình Trung rơtế ƀă mâu kăn pơkuâ kong pơlê ƀă hên hĭn kuăn pơlê. A tíu pơcháu, tơdah xo vâi rơtăm pro mô đô̆i a pơlê kong krâm Ƀuôn Hồ ai 173 ngế, tung mê 80 ngế cho mơhnŏng vâ chêh đơn vâ pro xêh.

Ƀă a Dak Nông, Leh pơcháu tơdah lêng a mâu tơring tung kong pơlê Dak Nông châ tơkŭm po kân krip, cho hâi mơdĭng dêi rơxông ối nếo prôk troăng pơtối hnoăng pâ, pôa. Ing mê, mơnhông hiâm mơno kăch măng, tơdroăng ki hâk tơngăm dêi hdroâng mơngế ƀă khôi túa vâi krâ nah ƀlêi trâng, khŏm mơ-eăm mơjiâng ƀă gâk kring krá tơniăn Tơnêi têa.

Hơnăm 2024, kong pơlê Dak Nông châ pơcháu rah lối 1.150 droh rơtăm, tung mê, ai 900 droh rơtăm lăm pro lêng ƀă lối 250 ngế droh rơtăm pro lêng kŏng an. Mâu droh rơtăm ki má môi dêi kong pơlê Dak Nông mot pro lêng roh kố pêi pro hnoăng cheăng lêng a mâu tíu cheăng dêi Khu xiâm pơkuâ kŏng an, Kuân đoân 3 (Khu xiâm pơkuâ lêng); Trung đoân Ƀô̆ ƀinh 994 (Khu xiâm pơkuâ lêng kong pơlê Dak Nông), Khu xiâm pơkuâ Mô đô̆i gâk tơkăng kong kong pơlê ƀă Kŏng an kong pơlê Dak Nông.

Leh pơcháu tơdah xo lêng hơnăm 2024 châ 10 to tơring, pơlê kong kơdrâm dêi kong pơlê Kon Tum tơkŭm po a kơxo lơ 25/2 tro tiô pơkâ, rak tơniăn kân krip, hmái hơtĭng, tơniăn, kơdĭng ƀă cho Hâi mơdĭng lăm pro mố đô̆i. Hơnăm kố lâp kong pơlê Kon Tum ai 804 ngế lăm pro mố đô̆i.

Tơdroăng ăm ‘nâi ing Khu pơkuâ ngăn lêng kong pơlê Kon Tum ăm hlo Hô̆i đong Nghĩa vụ Quân sự rêm râ hiăng pêi pro túa pơkâ hnoăng cheăng rah xo, krếo thế kuăn pơlê pro mố đô̆i, môi tuăn, tơdâng tơ’mô, tro Luât Nghĩa vụ quân sự, rak tơniăn tơbleăng nhên tơdroăng, rak tơniăn krê tung tơdroăng rah xo mâu ngế vâ pro lêng.

Tung 804 ngế dêi kong pơlê Kon Tum lăm pro mố đô̆i ai 26 ngế chêh đơn pâ lăm bro xêh; mâu lêng ki nếo cho tung hơnăm 18 troh 27 hơnăm rak tơniăn ivá rơdêi; 28 ngế lêng ki nếo kố cho hriâm Trung kâ̆p, Kao đăng ƀă Đăi hok; 2 ngế cho đảng viên. Hdrối vâ pro mố đô̆i mâu ngế ki kố ƀă rơpŏng hngêi vâi pơrá châ tơmâng ngăn, mơhnhôk dêi râ Đảng, kăn pơkuâ xuân môi tiah mâu khu râ, kơvâ cheăng, khu pú hên a cheăm tơring.