Châ hlo nhên a mâu hngêi kơchơ, tá troh a chôu phut kố, kế tơmeăm ki vâ tê tơmeăm Têt Lo hơnăm nếo Giáp Thìn 2024 a kong pơlê Gia Lai ai hên tơmeăm ƀă hên túa tơ’lêi ăm kuăn pơlê vâ tăng rôe xêh. Rơtế ƀă mâu hngêi kơchơ, mâu siêu thĭ, tíu xiâm tê mơdró kâ ki kân cho mâu tíu ki tơ’mot hên kuăn pơlê vâ rôe xua ga tơniăn ‘na xiâm kối ki mơjiâng pro. Jâ Phạm Thị Diện, cheăm Čư̆ An, pơlê kong krâm An Khê, kong pơlê Gia Lai, lăm rôe tơmeăm a siêu thĭ Co.opmart Pơkê kong kơdrâm Plei Ku tối:

“Á hlo mâu tơmeăm ki tê akố ga ai hên túa, ƀă ai hên tơmeăm ki tơxâng vâ rôe, tơdroăng tê rôe a hngêi kơchơ ôh tá tơniăn xâu lơ tro rôe tơmeăm pơloi, ti xê khât ƀă xuân ôh tá tơniăn ăm ivá, kế tơmeăm akố lĕm mơnâ mâ ngăn, tơbleăng tê mơhno pro kuăn pơlê rơhêng vâ lo lăm ngăn ‘nâng”.

Pôa Bùi Quốc Bình, Kăn pơkuâ ngăn Siêu thĭ Co.opmart pơlê kong kơdrâm Plei Ku, kong pơlê Gia Lai tối ăm ‘nâi, vâ tơniăn ăm tơdroăng ki kal vâ dêi kuăn pơlê, mê khu kố hiăng tơ’mot hên mâu tơmeăm ki dâi lĕm vâ hbrâ ‘măn ăm tung rơnó tê rôe tơmeăm Têt.

“Kuăn pơlê rôe tung pơla Têt Giáp Thìn hơnăm 2024 thăm mơdêk châ dâng 3 hdroh tâng vâ pơchông ngăn ƀă hâi ki tiah hmâ, ôh tá ăm lôi chiâng ai tơdroăng ki ôh tá ai tơmeăm to kơnâ, veăng rak vế tơniăn tơdroăng tê mơdró kế tơmeăm mê siêu thĭ hmâ hbrâ dâng 110 rơtal liăn vâ kum ăm kuăn pơlê roh kố. Dế nôkố, kế tơmeăm mê ngin xuân hiăng hbrâ hdrối Têt dâng 2 khế ƀă nôkố tơkéa vâ tối ai dâng 60 troh 70% kơxô̆ kế tơmeăm Têt hiăng châ chơ troh a siêu thĭ. Kế tơmeăm athế ai xiâm rêi ki nhên, athế tơniăn lĕm”.

Tiô tơdroăng tối tơbleăng dêi Khu ngăn ‘na kơmăi kơmok - tê mơdró dêi kong pơlê Gia Lai, tâi tâng kơlo ki pơtroh kế tơmeăm ƀă tê rôe tơmeăm a mâu khế hdrối Têt Lo hơnăm nếo châ dâng 17 rơpâu 500 rơtal liăn. Vâ rak tơniăn ăm tơdroăng ki xúa tơmeăm ki kal tung roh Têt, Khu ngăn ‘na cheăng kơmăi - tê mơdró hiăng pâ thế mâu kơ koan, khu mơdró kâ pơkâ pêi pro mâu tơdroăng ki vâ hbrâ ’măn tơmeăm tơniăn ăm tơdroăng tê rôe a kơchơ, pêi pro châ tơƀrê tơdroăng ki rak tơniăn yă, rak tơdroăng ki mơ'no tê tơmeăm ki hiăng pơkâ yă, ôh ti lôi ai tơdroăng ki ôh tá bê tơmeăm, lo to kơnâ yă.

Tơdrêng amê, tơkêa ‘na tơmeăm khoăng ki kal athế rak tơniăn ki dâi lĕm, ai hlá mơ-eá đơn tŭm têk, ai xiâm rêi ki nhên. Pôa Rčom Jen, Kăn phŏ ngăn ‘na cheăng kơmăi kơmok ƀă tê mơdró kâ kong pơlê Gia Lai tối tiah kố:

“Khu ngăn ‘na cheăng kơmăi ƀă tê mơdró hiăng pơkâ tơdroăng ki rak ‘măn tơmeăm hơnăm 2024, séa mơnhên ngăn kế tơmeăm, mâu tơdroăng pơkâ ‘na rak vế kế tơmeăm, tê mơdró điê̆n tưh. Klêi kơ’nâi châ hlê plĕng nhên tơdroăng tơdjuôm dêi túa tê mơdró châ tơniăn. Rak vế, pêi pro mâu tơdroăng cheăng ki vâ mơhnhôk rôe kế tơmeăm, mơjiâng hên tơdroăng ki mơ’no tơmeăm pơtroh tê a thôn pơlê tơrŭm cheăng ƀă khu pơkuâ ngăn hngêi kơchơ vâ tí tăng mơnhên ngăn ‘na kế tơmeăm, tâng lơ hlo tơmeăm ki pơloi, ôh tá ‘nâi nhên xiâm kối mê kô tơrŭm cheăng ƀă khu pơkuâ ngăn hngêi kơchơ vâ tơleăng tiô luât hiăng pơkâ”.

Vâ tơniăn tơtro ăm tơdroăng tê ƀă rôe, kum kuăn pơlê rôe tơmeăm, Vi ƀan hnê ngăn kong pơlê Dak Lak hiăng pơkâ pêi pro tơniăn hngêi kơchơ cho mâu tơmeăm ki xiâm tung roh mơ’nui hơnăm 2023 ƀă Têt Lo hơnăm nếo Giáp Thìn 2024. Tơdroăng ki rak tơniăn yă ing apoăng khế 12/2023 troh tâi khế 2 hơnăm 2024. Mâu tơmeăm ki châ rak tơniăn yă, mê cho: phái, hơ’nêh chu, hơ’nêh í, peâp, kơtâ í, têa rơmâ, xik, ƀôt ngot ƀă mâu tơmeăm ki hiăng uâ mơdiê, mơjiâng pro kế tơmeăm, kơchâi-plâi-pôm ƀă hên hĕng mâu tơmeăm ki ê hía. Kố cho mâu tơmeăm, mâu khoăng ki kal, kuăn pơlê vâ rôe hên, tơkŭm ‘na tơdroăng ki tê rôe tơniăn, yă tơniăn há.

Kong pơlê Dak Lak hiăng mơhnhôk vâ chê 11 khu mơdró, siêu thĭ, khu hngêi mơdró veăng pêi pro tơdroăng ki rak tơniăn tơmeăm, yă tê rôe tơmeăm a mơ’nui hơnăm 2023 ƀă Têt Lo hơnăm nếo Giáp Thìn 2024. Tiô tơdroăng ki tối hdrối, kơxô̆ liăn ki rôe kế tơmeăm ‘măn kơdĭng tơmeăm tung roh Têt ai lối 473 rơtal liăn, châ vâ chê 27% tơdroăng ki kuăn pơlê kal vâ rôe xúa drêng pơla ai tơdroăng ki ôh tá bê kế tơmeăm tê. Pakĭng mê, kế tơmeăm a tê a mâu hngêi kơchơ, hngêi mơdró xuân cho ki xiâm vâ kum tơ’lêi tung tê mơdró kế tơmeăm ăm kuăn pơlê a roh Têt.

Pôa Lưu Văn Khôi, Kăn ngăn ‘na cheăng kơmăi ƀă tê mơdró kong pơlê Dak Lak tối ăm ‘nâi, tơdrêng ƀă tơdroăng rak vế tơniăn kế tơmeăm vâ tê mơdró a hâi Têt, kong pơlê xuân hiăng thăm mơdêk mâu troăng hơlâ ki mơdât tê rôe tơmeăm ki ôh tá dâi ƀă lu lêa tung tê mơdró:

“Kơvâ ngăn ‘na cheăng kơmăi ƀă tê mơdró rơtê ƀă Vi ƀan hnê ngăn mâu tơring, pơlê kong krâm, pơlê kong kơdrâm kô ai troăng hơlâ ki nhên vâ khoh bê tŭm tơmeăm ƀă rak vế tơniăn yă tê kế tơmeăm. Pakĭng mê, cho thăm mơdêk hnoăng ki seá mơnhên ngăn vâ hbrâ mơdât tê rôe tơmeăm pơloi, tơmeăm ki ôh tá dâi, hnối  tơplâ mơdât ƀă tơdroăng ki lu lêa tung tê mơdró kâ”.

Vâ hbrâ mơdât tơdroăng ki tí tăng rôe ‘măn kế tơmeăm, thăm mơdêk yă ki ôh tá tơtro; kring vế tơniăn ăm tơdroăng tê mơdró a kơchơ, Khu pơkuâ ngăn a kơchơ dêi kong pơlê Dak Lak nếo pơkâ lo lăm tơplâ mơdât khu ki tê mơdró kâ liu, khu ki lu lêa, khu ki pơloi tung tê mơdró kâ hdrối, tung ƀă kơnâi Têt Lo hơnăm nếo Giáp Thìn hơnăm 2024. Tơdrêng amê, mâu khu kố kô tơkŭm po seá mơnhên ngăn krâu khât tơdroăng cheăng tê mơdró tê châu têa kơxăng, hyôh ki chiâng ai têa, ôh tá ăm ai khu ngế ki rôe ‘măn kơtôa hên kế tơmeăm, tơkôm yă kơnâ nếo mơ’no tê, ing mâu tơdroăng ki kố vâ rak tơniăn ăm tơdroăng tê rôe kế tơmeăm Têt ăm kuăn pơlê.