A Kon Tum tơbâ hâi pơtáu Hùng hlâ châ Khu pơkuâ Đình Lương Khế ƀă khu kăn pơkuâ bêng Thống Nhất, pơlê kong kơdrâm Kon Tum tơkŭm po kân krip, krâu khât. Kuăn pơlê, tơmối ƀă kăn teăng mâ mâu khu kăn pơkuâ troh a tíu xối tơbâ hên, châ ngăn, koh a tíu ki châ tơkŭm po, vâ rơkâu pâ ăm tơnêi têa, kuăn pơlê tơniăn, kong tôu tro tôu ‘ló, pêi pêt kế tơmeăm lĕm plâi kơtóu.

A Gia Lai, khu mơngế ki tơdjuôm pơlê xiâm Vĩnh Phúc (nôkố cho 2 kong pơlê Vĩnh Phúc ƀă Phú Thọ) rêh ối a mâu tơring, pơlê kong krâm, pơlê kong kơdrâm dêi kong pơlê Gia Lai vêh tơkŭm a Tíu xối tơbâ pơtáu Hùng a cheăm An Phú, Pơlê kong kơdrâm Plei Ku, tâp nhăng tơbâ troh xiâm kối.

A Tíu xố tơbâ ton nah túa lĕm tro tơnê têa Đình Lạc Giao, pơlê kong kơdrâm Ƀuôn Ma Thuột, kăn pơkuâ ƀă kuăn pơlê tung kong pơlê Dak Lak hiăng tơkŭm po kân krip tơbâ hâi pơtáu Hùng hlâ cho vâ mơnê mâu pơtáu Hùng hiăng ai hnoăng mơjiâng tơnêi têa.

A Lâm Đồng, tơbâ hâi pơtáu Hùng hlâ po kân krip, ƀă mâu tơdroăng leh ki xiâm cho: Khu pin tơmeăm pleăng, Xối tơbleăng khôi hmâ ƀă chôu nhăng a tíu tơkŭm po cho a mâu tíu xối tơbâ peăng kơnhŏng, peăng Tơdế peăng Hdroh ối tung Tíu xối tơbâ Âu Lạc tung kơpong ôm hyô xí prenn Đà Lạt.

Kố cho rôh vâ kuăn pơlê mâu hdroâng kuăn ngo Tây Nguyên tơmiât troh tíu xiâm, mơhnho hiâm mơno, tơbâ troh hnoăng mâu pơtáu Hùng hiăng ai hnoăng mơjiâng tơnêi têa ƀă rak vế tơnêi têa, ing mê veăng kum ‘mâi mơnhông ƀă mơdêk khu tơrŭm mâu hdroâng kuăn ngo.