Tơkâ hluâ 30 hơnăm mơjiâng ƀă mơnhông mơdêk, troh nôkố khu tơrŭm Khu tê mơdró hơnăm ối nếo hiăng châ mơjiâng a 63 kong pơlê, pơlê kong kơdrâm; ai 15 kâu lăk ƀô̆ ối tung khu ƀă tâi tâng vâ chê 19 rơpâu ngế veăng. Mâu khu tê mơdró dêi Khu dế mơjiâng pêi lo liăn rêm hơnăm lối 40 rơtal dollars Mih ƀă tăng cheăng pêi ăm lối 5 rơtuh ngế pêi cheăng.

Tung tơdroăng mơnhông Khu hiăng tơkŭm po hên tơdroăng pêi, tơdroăng pêi ki kơnâ tŏng kum khu tê mơdró hơnăm ối nếo pơxiâm tăng cheăng pêi, mơhnhôk tê mơdró, mơ’no liăn cheăng, tơrŭm lâp plâi tơnêi. Xông tơpui roh trâm mâ, jâ Võ Thị Ánh Xuân mơnhên khu tê mơdró cho môi tung mâu khu ki xiâm veăng kum mơdêk tơdroăng pêi cheăng xúa kơmăi kơmok, tơnêi têa pêi cheăng tiô rơxông nếo ƀă mot tơrŭm lâp plâi tơnêi; pơkâ thế Khu tê mơdró hơnăm ối nếo Việt Nam kal mơnhông mâu tơdroăng châ tơƀrê, mâu tơdroăng hiăng châ tơƀrê tung pơla kố nah, pơtối pơhlêh nếo tơdroăng xiâm, troăng pêi cheăng vâ tiô teăm troăng pêi cheăng lâp plâi tơnêi, rế tơtro ƀă pơkâ dêi tơnêi têa, tơdrêng amê thế tơtro ƀă tơdroăng kal vâ dêi khu cheăng dêi tơná.