Mâu hâi achê Têt, jâ H’Chớt Niê, mơngế hdroâng kuăn ngo Rơđế, ối a ƀuôn Tai, cheăm Krông Jing, tơring MDrak, rơtế rơpŏng thâ mơgrúa hngêi trăng. Jâ tối, tá hâi la lâi tơdroăng tơdah Têt dêi rơpŏng pơtối phiu ro môi tiah hơnăm kố.

“Khế 6/2024, Khu pơkuâ Lêng tơring MDrak hiăng diâp rơpŏng 50 rơtuh liăn, Vi ƀan Măt trâ̆n Tơnêi têa Việt Nam tơring tŏng gum 50 rơtuh nếo. Hngêi á tơkŭm tâi tâng kơxô̆ liăn ƀă mung tơ’nôm vâ mơjiâng hngêi nếo kân rơdâ 90 met karê. Nôkố, mâu ngế tung rơpŏng hiăng ai toăng hngêi krá kâk vâ ối. Tết Ất Tỵ 2025 kố, tâi mơngế tung rơpŏng hngêi hmiân tuăn tơdah rơnó Hơngui, kố cho mơni cho Têt phiu ro ƀă hơniâp lĕm má môi sap ing hdrối nah troh nôkố’’.

Xuân môi tiah jâ H’Chớt, ngoh Y Sam Niê, ngế hdroâng kuăn ngo Rơđế, rêh ối a ƀuôn Tai, hơniâp ro tơdah Têt tung toăng hngêi nếo mơjiâng pro. Ngoh Y Sam rơrêk tung hiâm mơno tối:

“Tá hâi la lâi á tơmiât kô chiâng mơjiâng toăng hngêi nếo kân lĕm rơdâ vâ ối. Khu pơkuâ lêng tơring ƀă Vi ƀan Măt trâ̆n Tơnêi têa tơring rêm tíu cheăng diâp 50 rơtuh liăn, hngêi mung tơ’nôm 50 rơtuh liăn vâ mơjiâng toăng hngêi kân rơdâ lối 60 met karê. Hơnăm kố ai hngêi nếo tơdah Têt, on veăng ƀă mâu kuăn ‘nĕng cho hơniâp ro, ôh tá tô tuăn kong mêi xi kơchoh, khía pê mot. Nôkố ngin bu tơmiât to pêi kâ mơnhông cheăng kâ, păn roăng kuăn hriâm tâp’’.

Pôa Y Lương Êban, Kăn hnê ngăn Vi ƀan Măt trâ̆n Tơnêi têa Việt Nam cheăm Krông Jing tối ăm ‘nâi, tung hơnăm 2024, cheăm ai 54 rơpŏng kơtiê châ mơjiâng hngêi ‘’tơrŭm môi tuăn’’. Pakĭng mê, lối 400 rơpŏng vâ chê kơtiê, kuăn pơlê hdroâng kuăn ngo châ tŏng gum liăn ƀă mâu ngế pêi cheăng rơnêu hngêi ối ing mâu tơdroăng dêi Chin phuh ƀă kong pơlê Dak Lak. Mâu rơpŏng pơrá hiăng mot ối hngêi nếo rêh ối tơniăn. Pôa Y Lương tối:

“Mơ’nui hơnăm 2024, Vi ƀan cheăm hiăng lăm séa ngăn, ăm xúa ƀă  mơnhên tâi tâng tơkŭm po pơcháu hngêi ăm mâu rơpŏng ai hnoăng tơnêi têa châ tŏng gum mơjiâng pro hngêi. Klêi kơ’nâi klê tơdroăng, ngin hlo tâi tâng mâu rơpŏng pơrá phiu ro, sôk suâ. Mâu rơpŏng pơrá hbrâ rơnáu tơdah Têt Lo hơnăm nếo Ất tỵ hơnăm 2025 tung tơdroăng phiu ro dêi vâi krâ kuăn pơlê’’.

MDrăk cho môi tung mâu tơring kơpong hơngế hơngo pá puât má môi kong pơlê Dak Lak. Pêi pro roh mơhnhôk “Lâp tơnêi têa tơdjuôm ivá tŏng gum mơngế kơtiê, ôh tá lôi kơbố parŏng”, tiô hnê mơhno dêi Chin phuh ‘na tơdroăng xut tah hngêi xi kơchoh, hơnăm 2024, tơring hiăng mơhnhôk mâu kơxô̆ liăn mơjiâng nếo 255 toăng hngêi ƀă rơnêu 190 toăng hngêi ối kum mâu rơpŏng kơtiê, vâ chê kơtiê. Tâi tâng kơxô̆ liăn pêi pro vâ chê 50 rơtal liăn. ‘Na pơkâ pêi xut tah hngêi pơtân, hngêi xi kơchoh tung hơnăm 2025, pôa Y Khoan Niê Kdăm – Kăn hnê ngăn Vi ƀan Măt trâ̆n Tơnêi têa Việt Nam tơring MDrak tối ăm ‘nâi, tơring tiô tối hdrối mơjiâng nếo lối 220 toăng hngêi kum mâu rơpŏng pá puât:

“Ngin kal 18 rơtal liăn vâ pêi pro tơdroăng xut tah hngêi pơtân ăm vâi krâ kuăn pơlê tung tơring tơniăn tơdroăng rêh ối tung hơnăm 2025. Măt trâ̆n tơring kô pêi pro tơdrêng mâu tơdroăng môi tiah Pơkâ 90/QĐ-2022 dêi Ngế pro xiâm hnê ngăn Chin phuh, tơdroăng 1718 ‘na xut tah hngêi pơtân ƀă mâu tơdroăng ki ê môi tiah mơhnhôk khu tê mơdró vâ tŏng gum vâi krâ kuăn pơlê. Pơkâ kố tiô tối hdrối kô kêi đeăng a khế 12/2025’’.

Koh phiu ro leh tơbâ 120 hơnăm Hâi mơjiâng kong pơlê Dak Lak mơ’nui khế 11 hơnăm 2024, Vi ƀan Măt trâ̆n Tơnêi têa Việt Nam kong pơlê hiăng kơbông krếo, mơhnhôk mơjiâng toăng hngêi tơrŭm môi tuăn ăm rơpŏng kơtiê, rơpŏng pá puât ‘na hngêi ối, ối tung thôn, pơlê dêi mâu cheăm ki pá puât, kơpong tơkăng kong, kơpong kuăn pơlê hdroâng kuăn ngo. Roh mơhnhôk hiăng châ mâu khu tŏng gum mơngế pá puât, mâu khu tơrŭm cheăng, khu tê mơdró, kăn ƀô̆, kŏng nhân viên chưk veăng tơlo lối 23 rơtal liăn, klêi pro hiăng pơcháu lối 300 toăng hngêi ăm rơpŏng kơtiê hdrối Têt Lo hơnăm nếo Ất Tỵ.

Tung toăng hngêi nếo châ pơcháu, tơdroăng tơdah Têt kơdrâm phiu ro rơtế tơdroăng hơniâp lĕm dêi mâu rơpŏng. Mâu toăng hngêi hơtô “tơrŭm môi tuăn” dế mơjiâng tơdroăng ki mơhnhôk vâ vâi krâ kuăn pơlê pơtối pêt mơjiâng tơmeăm, mơ-eăm hluăn ing kơtiê, mơjiâng tơdroăng rêh ối phâi hơtô, hơniâp lĕm tâ.