Ô vâi krâ-nhŏng o, pú hmâ, khu lêng tung lâp tơnêi têa ƀă nhŏng o pin ki rêh ối a kong têa vâi ê!

Môi rơnó Hơngui nếo – Hơngui Ất Tỵ hiăng troh, djâ tơvế tơdroăng ki ro rih, loi tơngah ƀă mâu tơdroăng tơmiât kô trâm ki tơniăn lĕm. Tung rôh ki hmái i lĭng koh pơ’lâng hơnăm ton tơdah mot hơnăm nếo, teăng mâ kăn xiâm pơkuâ hnê ngăn Đảng, Tơnêi têa, Á pâ pơtroh ăm tâi tâng mâu kuăn pơlê, mâu vâi pú, mâu lêng tung lâp tơnêi têa ƀă kuăn pơlê pin a kong têa ê rơkong rơkâu hơnăm nếo tơniăn ro, lĕm khât. Á xuân pơtroh mâu vâi pú, kuăn pơlê mâu kong têa tung lâp tơnêi têa rơkong rơkâu hơnăm nếo hơniâp ro, sôk suâ, tơrŭm tơroâ ƀă mơnhông tơtêk.

Hơnăm hdrối kố nah, pin hiăng tơkâ luâ hên tơdroăng pá puât ki kân, la xuân môi hơnăm ki pêi châ tơƀrê hên tơdroăng cheăng ki ‘ló hâk tơngăm. Tung xơpá, pơloăng mơnúa, la pin ai hiâm mơno tơrŭm tơrôa, hơ-ui mơjo, ƀă hiâm mơno mơ-eăm mơnhông dêi hdroâng mơngế pin mê rế châ tối mơnhên hên tâ. Tâi tâng Đảng, tâi tâng kuăn pơlê, tâi tâng khu lêng pin hiăng mơ-eăm pêi ƀă tơkâ luâ tâi tâng 15/15 tơdroăng pơkâ mơnhông cheăng kâ rêh ối pơlê pơla, ki rơdêi ‘na cheăng kâ ối tung khu tơnêi têa ki ối a hdrối tung lâp plâi tơnêi; tơdroăng rêh ối liăn ngân ƀă hiâm mơno dêi Kuăn pơlê ôh tá la lâi pơtê pơhlêh ƀă mơnhông; tơdroăng cheăng kal kí rêh ối pơlê pơla châ tơniăn, tơdroăng gâk kring cheăng lêng châ mơnhông, tơdroăng tơpui kâ châ po rơdâ, châ mâu vâi pú tung lâp plâi tơnêi mơnê nhuô̆m, châ mơnhên păng ‘nâng. Rêm ngế kuăn pơlê Việt Nam, maluâ tung tơnêi têa lơ a kong têa ê, ing kŏng nhân, kuăn pơlê pêi chiâk, khu mơdró kâ, khu ki rơkê plĕng troh mâu lêng pêi cheăng a tíu tơkăng kong, chuăn rơlố hơngế hơngo pơrá chiâng hâk tơngăm ‘na mâu ivá cheăng, veăng gum tung hnoăng ƀlêi chiâng tơdjuôm dêi Tơnêi têa.

Hơnăm 2025, cho hơnăm ki tơkŭm po hên hĭn mâu tơdroăng ki kal dêi tơnêi têa, hơnăm ki thăm mơnhông rơdêi, pêi tơƀrê, pro chiâng ivá ăm tơnêi têa mot tung chal ki nếo – chal ki mơnhông dêi tơná rế xông rơdêi ƀă kro mơdrŏng; tơdroăng púi vâ dêi Đảng châ mot tung hiâm mơno kuăn pơlê ‘na tơdroăng pơkâ kro mơdrŏng dêi Hdroâng mơngế. Maluâ ối ai hên tơdroăng xơpá, pơloăng mơnúa, la Việt Nam kô đi đo prôk troh ‘na ngiâ, ôh ti ai klâi kâi mơdât tơdroăng púi vâ mơ-eăm mơnhông dêi tơná ƀă tơdroăng krá tơniăn, lĕm ro tâ tung la ngiâ dêi hdroâng mơngế pin. Tâi tâng Đảng, tâi tâng kuăn pơlê, tâi tâng khu lêng pơtối tơrŭm môi hiâm môi mơno, tơdjuôm ivá, mơdêk hiâm mơno ki khên kơdô mơ-eăm dêi xêh, loi tơngah, khên tơnôu, hâk tơngăm hdroâng mơngế, xo xúa mâu rôh ki tơ’lêi hlâu, vâ tơkâ luâ mâu tơdroăng xơpá, pơloăng mơnúa vâ mơnhông thăm rế tơƀrê tâ, mơjiâng tơnêi têa Việt Nam kuăn pơlê kro mơdrŏng, tơnêi têa rơdêi, tơniăn krê, tơdâng tơ’mô, hloh hlê rơkê rơkê plĕng; rêm ngế kuăn pơlê pơrá ai tơdroăng rêh ối phâi hơtôu, tơniăn krê, hơniâp ro; veăng gum rế hía rế hên ăm tơdroăng hơniâp lĕm, tơniăn, mơnhông dêi kơpong ƀă lâp plâi tơnêi.

Tung tơdroăng ki hâk suâ, phiu ro kong tơnêi – kong plêng pơhlêh nếo, hiâm mơno kuăn pơlê tâ phoih ƀriê, hâk ro tơdah rơnó hơngui nếo, môi xôh nếo Á rơkâu tâi tâng kuăn pơlê, mâu vâi pú, mâu lêng tung lâp tơnêi ƀă kuăn pơlê pin ki rêh ối, cheăng kâ, hriâm tâp a kong têa ê môi hơnăm nếo ivá mo sêi, têi ‘răng, châ rế ai hên ki tơniăn lĕm, tơtêk kro mơdrŏng. Hơnăm nếo, mơeăm kô pêi châ tơƀrê hên mâu tơdroăng cheăng ki nếo.

Koh mơnê!