Kong prâi hngíu kơxo má rơnó khăng khoăng Tây Nguyên, a plông kơdrum reăng Tiêuh đoân Hnê pơtâp – Troh lâp lu Mô đô̆i gâk tơkăng kong kong pơlê Dak Lak a cheăm tơkăng kong Krông Na, tơring Ƀuôn Đôn, chât ngế lêng nếo dế pêi tơdroăng kơpuih văng krúa lĕm, xoi trăng loăng pro kơnâng, trăng loăng ki vâ pơtâp lêng; tung hngêi hôp tơdjuôm hên lêng nếo ki ê dế tơmâng hnê kal kí, tơdroăng pơkâ ƀă séa ngăn ivá.

Ƀinh nhất Lê Thành Huy (18 hơnăm), ối a pơlê kong kơdrâm Ƀuôn Ma Thuột, nếo mot pro lêng hơnăm 2024 tối, mâu hâi apoăng mot pro lêng, á tá hâi hmâ, pâ hngêi, laga châ châ mâu khu râ kăn pơkuâ ƀă khu pú tơmâng mơhnhôk, hiâm mơno hiăng hâk vâ, hbrâ mot tung hnê pơtâp lêng:

“Mot tung Tiêuh đoân hnê pơtâp – Troh lâp lu, á châ mâu ngoh Tiêuh đô̆i trương, Trung đô̆i trương mơhnhôk á, hnê mơhno troăng ôu kâ, ối, rêh ối môi tiah rôh ếo, kơpuih hngêi, rơmet tơmeăm, pế kâ, pêi tiô mâu pơkâ... tiô tơdroăng dêi Khu lêng. Nôkố mê ivá ƀă hiâm mơno cho lĕm, hbrâ mot pơtâp mâu yăo án mê cho: Troăng pơkâ khu lêng, pơtâp tơchok, troăng tơplâ a tíu tơplâ, pĕng hnêa xua Tiêuh đoân pơkâ mơ’no’’.

Ngoh Nguyễn Xuân Điền, cho Ƀinh nhất, hiăng 24 hơnăm, pơlê xiâm cheăm Ninh Diêm, pơlê krâm Ninh Hòa, kong pơlê Khánh Hòa xuân mot pro lêng roh kố ƀă châ ƀiên chê̆ troh Tiêuh đoân Hnê pơtâp lêng – Troh lâp lu mô đô̆i gâk tơkăng kong dêi kong pơlê Dak Lak tối, pâ ƀă ngoh nah xuân cho pro mô đô̆i. Hâk tơngăm ‘na khôi túa vâi krâ dêi khu lêng, mơhé dế cho nhân viên kơvâ ôm hyô ƀă kơlo liăn khế vâ chê 10 rơtuh liăn/khế, ngoh xuân chêh đơn pâ mot pro lêng:

“Mot hneăng pơtâp tung la ngiâ, á kô hbrâ ivá ƀă hiâm mơno ăm ilĕm vâ kêi đeăng tâi tâng mâu yăo án dêi mâu râ kăn pơkuâ pơcháu. Á pói vâ kô mơ-eăm chiâng môi ngế lêng Mô đô̆i Pôa Hồ, mơ-eăm pleăng môi iâ ivá hơnăm ối nếo ăm pơlê xiâm tơnêi têa’’.

Rơnó rah xo lêng hơnăm 2024 kố, Tiêuh đoân Hnê pơtâp – Troh lâp lu Mô đô̆i gâk tơkăng kong kong pơlê Dak Lak châ pơcháu pơkâ hnê pơtâp 190 ngế lêng, tung mê 70 ngế a kong pơlê Dak Lak, 120 ngế a kong pơlê Khánh Hòa. Đăi ŭy Lê Anh Vũ Niê Kdăm – Kăn pơkuâ Tiêuh đoân tối ăm ‘nâi, tâi tâng mâu lêng nếo rơnó tơdah lêng hơnăm kố châ mơnhên ai ivá lĕm, tơdroăng hriâm hôm tâ mâu hơnăm hdrối, xua mê tơdroăng ki chiâng mâu yăo án hnê pơtâp kô hôm tâ. Tiêuh đoân xuân hiăng hbrâ tŭm tâi tâng mâu pơkâ ăm roh hnê pơtâp nếo.

“Mâu tơdroăng xiâm hnê pơtâp ki kal môi tiah: Pơkâ luât khu lêng, kih thuât tơplâ ƀô̆ ƀinh, tơdroăng xiâm 3 tơdroăng ki pơtôu AK-71, hvâng grâ nât 71, trếo pơtôu 71... mâu tơdroăng xiâm kố châ đông lêng hiăng hbrâ lĕm tro. Ngin hiăng xing xoăng hnoăng, pơcháu hnoăng cheăng ăm mâu pú mơjiâng yăo án, pơtâp yăo án vâ kum ăm tro má môi tơdroăng hnê pơtâp a lâm. Pakĭng mê, tơdroăng hbrâ kế tơmeăm khoăng môi tiah tíu pơtâp lêng, plông pơtâp xuân hiăng hbrâ tŭm tâi tâng’’.

Troăng prôk 47 hơnăm mơjiâng mơnhông, Tiêuh đoân Hnê pơtâp lêng – Troh lâp lu mô đô̆i gâk tơkăng kong kong pơlê Dak Lak hiăng hnê mơhno 72 roh, pơcháu ăm Mô đô̆i gâk tơkăng kong mâu kong pơlê Dak Lak, Gia Lai, Kon Tum, Dak Nông, Khánh Hòa, Bình Định ƀă Quảng Ngãi, pêi pro hnoăng gâk kring tơkăng kong Tơnêi têa. Rơtế ƀă mê, rơpâu ngế lêng ki hbrâ a kong pơlê xuân hiăng châ pơtâp, hbrâ hnoăng cheăng gâk kring Tơnêi têa.

Tiô Thiê̆u tă Phạm Kiều Hưng – Kăn phŏ Tiêuh đoân trương, mơnhông khôi túa vâi krâ nah dêi đông, rơnó rah xo lêng hơnăm 2024 kố, vâ tơniăn ăm mâu lêng nếo rĕng khên mot rêh ối, hâk vâ tơ’noăng tơ’noăng hriâm tâp ƀă pơtâp, Đảng ŭy, Khu pơkuâ Tiêuh đoân mơjiâng Pơkâ chuyên đê, mơjiâng mâu pơkâ, mơjiâng tơdroăng ki tơdah, hnê pơtâp lêng nếo, tơniăn troăng pêi ‘’Ki xiâm apoăng, tơtro nôkố, krá tơniăn’’. Thiê̆u tă Phạm Kiều Hưng tối:

“Tiô xing xoăng hnoăng dêi Khu xiâm pơkuâ Mô đô̆i gâk tơkăng kong pơlê Dak Lak, sap ing apoăng mê Đảng ŭy, Khu pơkuâ Tiêuh đoân hiăng mơnhên kố cho hnoăng ki kal khât ƀă hiăng tơkŭm po séa ngăn mâu tơdroăng hbrâ ‘na troăng tơmiât pêi hnê hriâm dêi Đảng, kế tơmeăm khoăng tíu kâ, tíu ối pơtê ƀă tơdroăng tŏng kum parŏng plông pơtâp vâ hnê pơtâp lêng nếo châ tơƀrê má môi’’.

Kong a Dak Lak mot hơngui, reăng tơpo lâp chiâk deăng, ngo kong, xuân cho drêng rơnó khăng khoăng râ ó. Mâu lêng nếo dêi Tiêuh đoân Hnê pơtâp lêng – Troh lâp lu Mô đô̆i gâk tơkăng kong Dak Lak kô châ tâ mâu pơloăng mơnúa apoăng a plông pơtâp lêng kong tô ó. Laga ƀă hâk vâ dêi rơxông ối nếo, kố cho mâu tơdroăng ki châ tâ kal khât vâ mơjiâng châ chăn hiâm mơno dêi mơngế lêng gâk kring tơkăng kong, tơmiât troh kêi đeăng hnoăng cheăng gâk kring tơkăng kong Tơnêi têa tung rêm tíu pêi cheăng.