Pôa Võ Văn Thưởng cho kăn ƀô̆ xiâm Đảng ƀă Tơnêi têa, châ hriâm tŭm, châ hriâm ing râ cheăm, châ pêi hên hnoăng cheăng pro kăn hnê ngăn dêi Đảng ƀă Tơnêi têa. Laga, pơla hdrối kố nah tiô tối tơbleăng dêi Vi ban séa ngăn Tíu xiâm tơnêi têa ƀă mâu kơ koan khu râ pơkuâ cheăng, pôa hiăng ai xôi pơkâ ‘na tơdroăng luât ki đảng viên ôh tá khoh pêi pro, Pơkâ ‘na hnoăng cheăng djâ troăng lĕm ahdrối tung kăn ƀô̆, đảng viên, ki hdrối cha Ngế cheăng tung khu xiâm Kal kí, Ngế cheăng tung khu kăn pơkuâ hnê ngăn Đảng, Ngế cheăng tung khu kăn xiâm Đảng ƀă thế pôu râng hnoăng cheăng ngế ki pơkuâ xiâm tiô mâu pơkâ dêi Đảng ƀă Luât Tơnêi têa. 

Mâu tơdroăng xôi dêi pôa Võ Văn Thưởng hiăng tro kuăn pơlê tơpui ‘mêi, chiâng tơdjâk troh ki nhoăm dêi Đảng, Tơnêi têa ƀă tơná pôa. Hlo nhên hnoăng cheăng pêi a ngiâ Đảng, Tơnêi têa ƀă Kuăn pơlê, pôa  hiăng ai hlá đơn pâ pơtê cheăng pro kăn châ xoăng hnoăng cheăng ƀă pơtê cheăng. Ngăn a pơkâ nôkố dêi Đảng, Tơnêi têa ƀă séa ngăn ki púi vâ dêi pôa Võ Văn Thưởng, Khu kăn xiâm Đảng hiăng ăm phêp pôa Võ Văn Thưởng pơtê pro kăn, pơtê cheăng tung khu xiâm Kal kí, Ngế cheăng tung khu kăn Đảng  hneăng má 13, Kăn xiâm hnê ngăn Tơnêi têa Kŏng hoa xah hô̆i chuh ngiah Việt Nam, kăn xiâm hnê ngăn Hô̆i đong Lêng ƀă Kring tơniăn hneăng hơnăm 2021-2026.