Tơbleăng a hâi Hôp tơbleăng Pơkâ kong pơlê Kon Tum pơla hơnăm 2021-2030, tơdroăng vâ pêi troh hơnăm 2050, Ngế pro xiâm phŏ hnê ngăn Chin phuh Trần Hồng Hà tối nhên, Pơkâ kong pơlê Kon Tum châ hbrâ tâi tâng mơnhông kơpong Tây Nguyên, tơdjêp ƀă kơpong kĭng têa kơxĭ Tơdế tơnêi têa ƀă kơpong Mekong.

Pơkâ kố cho tơdroăng cheăng pêi tro luât ki kal po rơdâ mâu rôh tơ’lêi hlâu,  tơdroăng mơnhông mơdêk nếo kong pơlê Kon Tum ƀă 4 tơdroăng ki xiâm, mê cho: Mơjiâng kơpong pêt nhâ loăng pơkeăng ki kal dêi tơnêi têa; mơnhông ‘na chiâk deăng xúa kơmăi ki dâi lĕm, kơmăi kơmok uâ pơliê pro tơmeăm; mơnhông on tơhrik ‘mâi hơ’lêh nếo ƀă ôm hyô dêi Kon Tum kô chiâng kơvâ cheăng ki xiâm.

Pơkâ mơnhông mê ai pơkâ tá troh hơnăm 2030, kong pơlê Kon Tum chiâng kong pơlê mơnhông tơƀrê rĕng, tâi tâng, krá tơniăn ton ƀă tơdâng tơ’mô ngăn tiô kơ tơdroăng cheăng kâ krúa lĕm, pơhlêh tơdroăng cheăng mơhno ‘na túa lĕm tro vêa vong hdroâng kuăn ngo.