A rôh hôp tơpui tơno, pôa Anthony Albanese, Ngế pro xiâm hnê ngăn kong têa Australia hâk mơnê kơ pôa Phạm Minh Chính, Ngế pro xiâm hnê ngăn Chin phuh rôh apoăng lăm pôu Australia; khĕn kơdeăn hnoăng Việt Nam veăng ‘no pêi tung tơdroăng cheăng pê klêi tơdjuôm dêi Hneăng hôp mâu Kăn xiâm drêng troh tơbâ 50 hơnăm tơrŭm cheăng pơla ASEAN -Australia tơkŭm po a Melbourne sap  hâi lơ 6 troh lơ 6/3 kố nah.

Péa ngế kăn tơpui, vâ môi tuăn tơrŭm cheăng nhên vâ pêi 06 tơdroăng cheăng ki kân vâ mơnhông tơrŭm cheăng tung mâu kơvâ cheăng pêi trâu rơdâ tâ, tơƀrê tâ, ai pơxúa tâ. Klêi hôp tơpui tơno, péa Ngế pro xiâm hnê ngăn hiăng Tơbleăng tơdjuôm ‘na mơdêk râ tơrŭm cheăng tung Tŭm tơdroăng pơla Việt Nam ƀă Australia ƀă hlo leh diâp 11 hlá mơ-éa tơrŭm cheăng tung mâu kơvâ  hnê hriâm hnê mơjiâng tuăn ngôa rơkê; rak hơniâp lĕm; kring tơniăn mơngế rôe xúa; mơhnhôk tê mơdró; ‘no liăn cheăng; khoa hok - kŏng ngê̆, hơ’lêh nếo; hriăn plĕng tơdroăng ki nếo; liăn ngân; hngêi rak liăn; tăng ‘nâi plĕng khoa hok vâ mơnhông pêi chiâk, pêt kong ƀă kong rak ngăn kong; păn ká xi xóng; pêi cheăng; tơmeăm khoăng; hyôh kong prâi; ƀă on tơhrik, tơmeăm khoăng tung kơdâm tơnêi.