Têa krơng Ea Tuôr, rơnó kố tâk đik, hdrok rơdêng troh mâu pơlôu hmốu kân hiăng hŭn nhâ ngiêt. A xiâm loăng kơnía ki kân hiăng lối hrĭng hơnăm, pôa Y Wer Ktul, ngế pơkuâ buôn Tuôr, cheăm Hòa Phú phiu ro xua pơlê tơná dế pơ’lêh rĕng. Kuăn pơlê ki ối tung pơlê kố hdrối nah hiăng hmâ pêi chiâk, pêt kơphế, tiu, nôkố hiăng ‘nâi tơkŭm pêi tơdroăng ’na pôm hyô tung kuăn pơlê hlo túa vêa vong kuăn ngo Rơđế. Ƀă túa pêi ki nếo, mê kuăn pơlê nếo mơnhông cheăng kâ, hlối châ hlo túa rêh ối lĕm tro dêi pơlê, vâ idrâp chêng, tơdroăng hơdruê chuât xtó troh lâp kơpong Tây Nguyên.  

 "Ki hdrối mơnê Tơnêi têa hiăng pro tơ’lêi hlâu kum ăm kuăn pơlê pin. Tơdroăng tơ’mot cheăm, tơngah tung la ngiâ râ cheăm, râ kong pơlê tơmâng khât troh tơdroăng ‘no liăn pro troăng prôk vâ kuăn pơlê châ tơ’lêi prôk lăm, ƀă kâng pro rơchôa  vâ ai têa toh loăng plâi hlối mơnhông ‘na ôm hyô. Pro hlâu ăm kuăn pơlê pêi cheăng a xhí Drai Nur, xhí Gia Long, vâ hriâm túa ôm hyô. Púi vâ  pơtối tŏng gum 1 iâ liăn ngân, vâ ai liăn mơjiâng tơmeăm khoăng mơnhông ôm hyô, vâ ăm tơmối lăm hyô ngăn hlo dêi pơlê tơná rế mơnhông tơƀrê ƀă kro mơdrŏng tâ”.

Tung pơla rơpŏng hngêi pôa Y Wer kăn pơlê tơvâ hên tơdroăng cheăng pro hngêi trá tiô khôi hmâ ton nah xua jâ  peăng nôu ‘măn ăm vâ pro tíu tơdah tơmối  ôm hyô,  kơtăn mê ai péa pái chât kơteăng chêng, rơpŏng hngêi nâ H Belly Êban xuân hiăng po mơdró homestay tung hngêi trá tiô khối hmâ. Nâ H Bellly ăm ‘nâi, homestay dêi nâ ki hên tơ’mot tơmối kong têa  troh ôm hyô. Apoăng, nâ tơmiêt tơdroăng cheăng pro ôm hyô gá pá, la drêng hiăng pêi cheăng khât, nâ hlo tơ’lêi há:

“A mơnê tơnêi têa hiăng pro tơ’lêi hlâu ăm ngin châ tơdah tơmối tung tơnêi têa ƀă kong têa ê. Homstay Kathy vâ tơbleăng ăm tâi tâng kuăn pơlê, tối ăm vâi ngế ki lâi ai hngêi trá  mê pin thế rak dêi, pro Homstay tơbleăng ăm tơmối ôm hyô ngăn mê vâi vâ ‘nâi túa lĕm tro dêi mơngế Rơđế tơná. Vâ kuăn cháu tơná ‘nâi rak vế túa lĕm tro ton nah dêi jâ pôa pin ing nah mê cho hngêi trá, Tơdroăng cheăng teăn hmôu jêa, cho nâl tơpui dêi nôu ki mơjiâng. A phiu ro ‘nâng châ tơdah tơmối kong têa ê troh a hyô ngăn Homstay Kathy, vâi vâ hriâm tơpui nâl Rơđế, xâp ếo putâk dêi kuăn ngo tơná”.

Cheăm Hòa Phú châ mơjiâng ing tíu tơ’mot 3 to cheăm Hòa Phú, Hòa Khánh, Hoà Xuân, tơnêi rơdâ lối 109 km, vâ chê 50.000 pơ’leăng mâ mơngế, cho tíu pro pơlê nếo ing ton nah dêi mâu pơlê Rơđế, ai kroăng Serepôk ƀă ai mâu têa krơng kân hiu tơkâ luâ, ai tíu ki hlâu ‘na mơnhông ôm hyô. Klêi tơ’mot  pro rế lĕm tíu pêi cheăng, cheăm hiăng ‘nâi nhên kô hbrâ tăng troh kuăn pơlê, hbrâ lăm troh a mâu pơlê vâ rơtế hmâng tuăn tơmiêt tơdroăng púi vâ, tơdroăng veăng hnê tối, pâ thế dêi kuăn pơlê... thăm nếo rơtế tơpui tơno tă túa cheăng kâ vâ mơnhông  cheăng kâ a tơnêi tíu ki hiăng ai hlâu. Pôa Đỗ Xuân Hiếu, phŏ kăn hnê ngăn  Vi ƀan kuăn pơlê cheăm Hòa Phú ăm ‘nâi:

“Mâu kăn nôkố cho mâu kăn pêi cheăng, teăng ối ‘nân tơkôm kuăn pơlê mê mâu kăn thế lăm troh ƀă kuăn pơlê, khu mơdró. Hbrâ tăng ‘nâi plĕng  tơdroăng kal vâ dêi kuăn pơlê, khu mơdró vâ tơná mơjiâng tơdroăng tŏng gum, pơkâ mâu tơdroăng vâ pêi, tơdroăng tơkêa bro klêi mê pêi pro tơdroăng tiô kuăn pơlê vâ”.

Tơdrêng ƀă mơnhông ôm hyô, mơdró, tung hneăng ki nếo kố, Đảng ƀô̆ cheăm Hòa Phú xuân hiăng pơ’lêh rĕng tơdroăng cheăng kâ kơmăi kơmok-mơjiâng, vâ  tơmeăm khoăng kơphô̆ pêi cheăng kơmăi kơmok tiô túa nếo. Ing mê, rĕng hlŭn ing tơdroăng kơnôm a pêi chiâk môi tiah nôkố, ƀă xiâm ki krá kak vâ chiâng kơphô̆ kơmăi kơmok a hơnăm 2035.

Pôa Phạm Tiến Hưng, kăn hnê ngăn Đảng ủy cheăm Hòa Phú, kong pơlê Dak Lak tối, ƀă troăng hơlâ pêi cheăng ƀă kơmăi kơmok, mơdró, pêi chiâk xúa kơmăi ki dâi lĕm, cheăm Hòa Phú mơ-eăm kơdroh ki kơnôm to a liăn ngân dêi kong pơlê, tíu xiâm, troh tơdroăng  hbrâ liăn ngân, chiâng tơdroăng ki kong pơlê Dak Lak mơ-eăm mơnhông pê dêi:

“Ki pá má môi dêi cheăm Hòa Phú mê pro ti lâi tung 5 hơnăm la ngiâ troh ngiâ méa ‘na tơmeăm khoăng, tơdroăng rêh ối dêi kuăn pơlê thế  pơ’lêh nhên, vâ  tối ‘na tơdroăng mơjiâng mâu kăn 2 râ dêi Tíu xiâm cho hriĕn plĕng ƀă tơƀrê”.

Sap môi to cheăm pêi chiâk, Hòa Phú nôkố dế pơkâ xiâm apoăng vâ chiâng kơphô̆ pêi cheăng ƀă kơmăi kơmok-ôm hyô hên túa lĕm tro vêa vong, cho tíu xiâm ki mơhnhôk peăng Hdroh dêi kong pơlê Dak Lak. Tơdroăng pêi pro mê mơni kô ối hên xơpá, la ƀă tơdroăng púi vâ  ai tuăn mơ-eăm vâ mơnhông, hlối mơ-eăm  ‘na tơdroăng kal kí hleăng nhên ƀă môi tuăn dêi kuăn pơlê, Hòa Phú dế mơhno troăng bâ eăng  tuăn loi nếo a tơdroăng tơƀrê dêi túa pêi cheăng mâu kăn kong pơlê péa râ, tro ló, teăm tơdrêng ƀă tơtro tuăn mơno kuăn pơlê.