*.Vâ châ troh Têt Lo hơnăm nếo Giáp Thìn 2024 “Rêm rơpŏng hngêi pơrá ai tơmeăm Têt, rêm ngế pơrá hơniâp ro ai tơmeăm Têt”, kong pơlê Kon Tum mơdoh hên tơdroăng tơmâng ngăn, tŏng kum Têt ăm mâu rơpŏng ai hnoăng, mâu ngế ki ai hnoăng ƀă kăch măng, ngế hơnăm hiăng krâ, rơpŏng kơtiê, rơpŏng vâ chê kơtiê, ngế pêi cheăng ki xơpá ƀă malối xơpá, mâu ngế ki ôh tá ai kơbố păn roăng tung pơlê pơla ƀă hên ki ê. Tung mê, kong pơlê pơkâ ‘no lối 8 rơtal liăn tŏng kum ăm lối 16 rơpâu 780 rơpŏng kơtiê, rơpŏng vâ chê kơtiê châ hơniâo ro a rơnó Hơngui, tơdah Têt ƀă kơlo liăn kum rêm rơpŏng kơtiê 600 rơpâu liăn, rêm rơpŏng vâ chê kơtiê 300 rơpâu liăn. Rơtế amê, Vi ƀan Măt trâ̆n Tơnêi têa Việt Nam ƀă mâu khu râ kơvâ cheăng xuân mơhnhôk tơlo lối chât rơpâu hnoăng tơmeăm vâ tŏng kum Têt ăm kuăn pơlê.

Ngoh A Định, ngế ki pơkuâ Chi ƀô̆ hlối cho ngế ki pơkuâ thôn Têa Pong, cheăm Đăk Rơ Nga, tơring Đăk Tô, ăm ‘nâi: Chi ƀô̆ thôn Têa Pong  ai 14 ngế đảng viên, vâ tŏng kum Têt ăm rêm ngế, rêm hngêi, mâu đảng viên tung Chi ƀô̆ châ xoăng hnoăng cheăng lăm êng ngăn mâu rơpŏng ‘na rêh kâ ối dêi tâi tâng 161 rơpŏng ƀă 885 pơ’leăng mâ mơngế dêi thôn vâ tŏng kum tơmeăm Têt ăm rêm rơpŏng kuăn pơlê:

“Hdrối Têt, ngin hiăng lăm ngăn, chêh tối mâu rơpŏng kơtiê ƀă mâu rơpŏng xơpá vâ tŏng kum, kum vâi krâ nhŏng o ai môi rôh Têt hơtôu, hơniâp ro, bô bố xuân ai tơmeăm Têt. Ngin hlo tơdroăng ki rak vế kong gá pơxúa kal khât ăm vâi krâ nhŏng o, xua mê vâi krâ nhŏng o châ pơxúa ing mâu troăng hơlâ mơhá liăn ing tơdroăng ki rak ngăn kong, vâi krâ nhŏng o ai tơ’nôm tơdroăng ki ro vâ kâ Têt hơtôu tâ. Rêm hơnăm, Kŏng ti pêi cheăng tiô rơnó – môi tung khu Lâm Nghiệp Đăk Tô hiăng tơrŭm ƀă thôn lăm ngăn mâu rơpŏng kơtiê, xơpá vâ chêh inâi tŏng kum phái ƀă mâu kế tơmeăm ki ê ăm vâi krâ, Kŏng ti tơmâng ngăn troh vâi krâ nhŏng o tung rôh Têt, hơnăm ki lâi xuân hbru tơmeăm ăm vâi krâ nhŏng o”.

*.Vâ chê 230 rơpŏng hdroâng kuăn ngo Bơhnéa a pơlê Dơk Rơng – cho thôn pơlê nếo a cheăm Glar, tơring Đăk Đoa, kong pơlê Gia Lai tơdah rơnó Hơngui nếo 2024 pêng păm tơdroăng phiu ro drêng pêi lo châ hên kế tơmeăm khoăng, yă tơmeăm pêi lo ing chiâk deăng to kơnâ, ki rơhêng vâ tối cho kơphế. Tâi tâng rơpŏng kuăn pơlê tung pơlê pơrá ai kơdrum kơphế, tiu, krui kơxái ... rơpŏng ki iâ xuân châ to lâi sao, rơpŏng ki hên mê 4 troh 5 ha... Hơnăm hiăng hluâ, vâ chê 20 rơpŏng kuăn pơlê pêi lo châ lối 1 rơtal liăn ing loăng kơphế ƀă bu riân pêi lo ing klêi krí kơphế, kuăn pơlê tung pơlê hiăng rôe nếo lối 50 toăng rơxế hon đa ki kơnâ liăn. Mot hơnăm nếo, kuăn pơlê Dơk Rơng loi tơngah pêi cheăng pêt mơjiâng tơmeăm pơtối ăm pêi lo liăn hên. Krâ pơlê Vut, tối:

“Hơnăm la ngiâ, kuăn pơlê kô mơ-eăm pơhlêh tơdroăng tơmiât ‘na troăng pêi, rak ngăn loăng plâi, thế rak ngăn ăm lĕm vâ châ hên kơphế. Kuăn pơlê phiu ro ‘nâng, drêng tâng tối, nôkố hiăng ai hdrê kơphế nếo pêi lo châ hên tâ, hdrối nah cho kơphế TR4 kuăn pơlê hiăng ro, nôkố ai tơ’nôm hdrê kơphế nếo cho kơphế Lá xoài, kơphế Xanh-lùn pêi lo châ hên, kâi mơdât ôa hdrong pơreăng xua mê kuăn pơlê dế mơ-eăm pêt mâu hdrê nếo kố. Kuăn pơlê loi tơngah pêt hdrê nếo kô pêi lo liăn hên tâ, tơdroăng rêh ối phâi hơtô, tŭm tơmeăm tâ’’.

*.Pơlê kong krâm An Khê cho môi pơlê kong krâm hiăng châ Ngế pro xiâm hnê ngăn Chin phuh mơnhên pơlê kong krâm pêi klêi hnoăng cheăng mơjiâng thôn pơlê nếo. Klêi kơ’nâi pêi klêi 19/19 tơdroăng pơkâ thôn pơlê nếo, pơlê kong krâm An Khê hiăng hơ’lêh tơná ƀă tơdroăng ki rơdêi dêi kơphô̆, ki rơdêi ‘na mơnhông, ki kơnía dêi tơdroăng pêi cheăng kâ mơjiâng bro kế tơmeăm pơla hơnăm 2016 – 2020 châ 12,75% tung hơnăm. Tơdroăng cheăng kâ hơ’lêh khât. Mâu tíu xối tơbâ ton nah ƀă khôi túa lĕm tro pơtối châ rak vế ƀă mơnhông ƀă hên ki ê. Ngoh Hồ Văn Hay, a pơlê Pơ Nang, cheăm Tú An, pơlê kong krâm An Khê, kong pơlê Gia Lai tối:

“Rơpŏng á ki hên pêt loăng, pêt kơtếo, pêt pôm. Ƀă pêi lo liăn dêi rơpŏng á rêm hơnăm xuân châ 50 – 60 rơtuh liăn, bê vâ xúa tung rơpŏng, ăm kuăn hriâm tâp, tối tơdjuôm xuân bê tŭm ôh tá xơpá khât, rêh ối tơniăn. Tung hơnăm nếo á kô mơ-eăm pêi cheăng kâ ƀă hơnăm nếo kố rơkâu vâi krâ nhŏng o ai ivá rơdêi vâ hluăn ing kơtiê ƀă mơ-eăm rak vế túa lĕm tro ăm vâi krâ nhŏng tung pơlê cheăm”.

*.Dak Gằn cho cheăm kơpong hơngế hơngo ối tung tơring Dak Mil, kong pơlê Dak Nông. Roh Têt hơnăm kố Đảng ủy, khu râ kăn pơkuâ ƀă mâu khu cheăng kal kí, pơlê pơla dêi cheăm tơkŭm hên troăng mơhnhôk mâu khu râ vâ tŏng kum Têt ăm mơngế kơtiê ƀă kuăn pơlê hdroâng kuăn ngo a pơlê. Pôa Y Srao, Kăn hnê ngăn Khu lo tŏng veăng cheăm Dak Gằn tối ăm ‘nâi, troăng tơmiât pêi dêi cheăm cho ôh tá ăm rơpŏng ki lâi xua tơdroăng rêh ối pá puât  mê ôh tá ai Têt.

‘’ Khu lo tŏng veăng cheăm tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ ƀă mâu khu tơrŭm cheăng tơkŭm mơhnhôk, veăng tơlo liăn vâ tŏng kum Têt ăm mơngế kơtiê, mâu rơpŏng ai hnoăng tơnêi têa ƀă diâp kơxuô tơmeăm ăm kuăn pơlê a mâu pơlê tung cheăm. Ngin khŏm mơ-eăm vâ kuăn pơlê tơdah Têt hơtô, tơniăn phiu ro, ôh tá ăm ai tơdroăng ai rơpŏng ôh tá châ kâ Têt. Klăng roh hơnăm nếo rơkâu tâi tâng kuăn pơlê mo sêi têi ‘răng, pêi cheăng châ hôm, rŭm môi tuăn tâ mê nếo tung pơlê pơla, mê cho tơdroăng ki á pói vâ má môi’’.

*Mot tung hơnăm nếo Giáp Thìn 2024, vâ rêm ngế rêm hngêi pơrá ai Têt, mâu khu tơrŭm kơ koan pơkuâ cheăng tơkŭm po hên tơdroăng tŏng kum Têt, hiăng rơtế tơdjuôm ivá ƀă khu kăn pơkuâ mâu kong pơlê Tây Nguyên tŏng kum Têt ăm kuăn pơlê, malối cho mâu kơtiê, mơngế ki xơpá, kŏng nhân pêi cheăng ƀă hên ki ê tơdah môi rơnó Têt hơtôu, phâi ƀă ai tŭm tơdroăng ki tơmâng ngăn, tŏng kum, ôh tá lôi ai rơpŏng kuăn pơlê ki lâi kơklêa tung rôh Têt Lo hơnăm nếo Giáp Thìn 2024:

*.Cheăm tơkăng kong Quảng Trực, tơring kơtiê 30a Tuy Đức cho môi tung mâu cheăm ai hên xơpá dêi kong pơlê Dak Nông. Pôa Điểu Khanh, kăn phŏ hnê ngăn Vi ƀan cheăm ăm ‘nâi, cheăm nôkố ai kơxô̆ rơpŏng kơtiê hên. Malối, hơnăm 2023 pơla hdrối kố nah, a cheăm ai mâu rôh ki tơnêi tơhnah, tơhnâp xua kong mê pro hên rơpŏng kuăn pơlê trâm pá. Xua mê, tơdroăng ki tŏng kum Têt ăm kuăn pơlê a cheăm châ Đảng, Kăn pơkuâ cheăm tơmâng ngăn, ƀă túa tơmiât rêm ngế, rêm hngêi pơrá ai Têt.

“Troh a hâi Têt kố ah cheăm Quảng Trực ngin mơ-eăm mơhnhôk, veăng tơlo ing mâu khu mơdró kâ, khu ki ai hiâm mơno hơ-ui vâ tŏng kum tơmeăm Têt ăm kuăn pơlê, malối cho rơpŏng kơtiê, rơpŏng xơpá. Ngin khŏm mơ-eăm vâ rêm ngế, rêm hngêi pơrá châ tơdah Têt hơtôu, hơniâp ro”.

*.Pơla kố nah, mâu đông mô đô̆i gâk tơkăng kong ối tung Khu xiâm pơkuâ Mô đô̆i gâk tơkăng kong dêi kong pơlê Gia Lai hiăng tơkŭm po tơdroăng pêi “Rơnó Hơngui gâk tơkăng kong – Hơtô hiâm mơno kuăn pơlê” hdrối mơ’nui a mâu cheăm tơkăng kong tơring Ia Grai, Đức Cơ, Chư Prông. A rêm tơdroăng pêi pro, mâu mô đô̆i gâk tơkăng kong rơtế ƀă Kuăn pơlê kơxuô kơƀăn tơxông, tôu chêng koăng, mơđah hơdruê xuăng vâ tơrrŭm tuăn pâ khu lêng ƀă kuăn pơlê. Rơtế amê, mâu ngế ki tŏng kum mơngế pá puât tơkŭm po hbru mâu tơmeăm 0 liăn - tơkéa vâ tối ăm tê kơtê, ing mê diâp ăm kuăn pơlê hrĭng hnoăng tơmeăm cho pơkhom, kơmung, phái ƀă kơxop hlá mơ-éa chêh, tơmeăm xúa tung hriâm tâp ăm hok tro. Ing mê kum kuăn pơlê châ kâ Têt phâi ro, hơtô tâ. Thươ̆ng ŭy Siu Thương – Đông mô đô̆i gâk tơkăng kong Ia O tối ‘na tơdroăng tŏng kum Têt ăm mơngế kơtiê, vâi hdrêng, mơngế hdroâng kuăn ngo a mâu cheăm Ia O, Ia Chiă tiah kố:

“Rêm hơnăm a roh Têt troh rơnó Hơngui vêh đông mô đô̆i gâk tơkăng kong Ia O, kong pơlê Gia Lai chu tơkŭm po ôu kâ Têt, phiu ro hơnăm nếo rơtế ƀă kuăn pơlê, ƀă xuân cho roh đông mô đô̆i gâk tơkăng kong ƀă kuăn pơlê châ trâm mâ dêi pó. Khu xiâm pơkuâ mô đô̆i kong pơlê xuân hnê mơhno đông mô đô̆i gâk tơkăng kong Ia O a mâu roh tơdah hơnăm nếo troh diâp hnoăng tơmeăm ăm mâu rơpŏng pá puât. Pơtối mê, mâu krâ pơlê, kăn pơkuâ thôn cho mâu ngế tŏng kum hên ăm đông mô đô̆i gâk tơkăng kong tung tơdroăng pơtâng tối. Tung roh Têt Lo hơnăm nếo kố, Đông mô đô̆i gâk tơkăng kong xuân hiăng lăm diâp kơxuô tơmeăm ăm mâu rơpŏng ai hnoăng kăch măng, rêm kơxuô kơnâ 300 rơpâu liăn, kum djâ Têt phâi hơtô, phiu ro, vâ kuăn pơlê rơtế ƀă mô đô̆i gâk tơkăng kong thăm tơrŭm tâ tung mơjiâng gâk kring kơpong tơkăng kong’’.