Mâu hâi ki kố, a kong trương mơjiâng troăng kân ăm phêp rơxế kơtâu têi Khánh Hòa – Ƀuôn Ma Thuột tơkâ hluâ cheăm Ea Knêč, tơring Krông Pač, kong pơlê Dak Lak, ai chât toăng rơxế. kơmăi kơmok ƀă hên kŏng nhân klâ chiâng hên tôh thâ pêi cheăng mơjiâng pro troăng kân. Pôa Hồ Văn Anh, ngế ai lối 20 hơnăm rơtế ƀă tơdroăng vê rơxế gu pro troăng ăm tơdrăng ối tung Kŏng ti pêi cheăng tiô rơnó An Nguyên (Dak Lak) tíu ki dế mơjiâng pro troăng kân ăm phêp rơxế kơtâu têi tối, pôa ôh tá pâ kố cho Têt má to lâi thế tơdah rơnó Hơngui hơngế dêi hngêi ƀă nhŏng o.

Têt hơnăm kố, pôa ƀă mâu khu pú xuân châ kŏng ti tơkŭm po kâ têt a kŏng trương. A kơpong hngêi tơnêi têa ăm mung ối, kăn pơkuâ kŏng ti hiăng hbrâ chô plâi, pôm, ai reăng mai, reăng đào ƀă tŭm kơƀăn tơxông, kơƀăn Têt, kơƀăn kĕo ƀă kế kâ môi tiah a hngêi vâ rêm ngế tơdah hơngui... Pôa Hồ Văn Anh tối:

“Kŏng ti tơkêa ƀă khu mơ’no liăn cheăng thế rak tơniăn tơdroăng mơjiâng pro troăng kân, xua mê hdrối Têt hiăng hôp nhŏng o ki pro troăng kân ăm phêp rơxế kơtâu têi. Kăn pơkuâ Kŏng ti pro hâi pêi cheăng tung Têt tiô tơdroăng nhŏng o kĭ ối pêi. Ngin vêh hôp nhŏng o ƀă môi tuăn ƀă tâi tâng rơpŏng kô kĭ ối pêi tung Têt, mê cho sap ing hâi lơ 26/12 âm lĭch troh hâi lơ 6/1 Têt, bu pơtê hâi má môi Têt tê’’.

            Kŏng ti pêi cheăng tiô rơnó môi khu An Nguyên, Dak Lak dế mơjiâng pro tơdroăng tơkêa bro kơxô̆ 3 ing Km 101+500 troh Km 108+00. Pôa Lê Quốc Thắng, Kăn phŏ pơkuâ mơjiâng pro troăng kân ối tung Kŏng ti pêi cheăng tiô rơnó An Nguyên tối ăm ‘nâi, drêng tơdah tơnêi ing Viƀan tơring Krông Păč a pái khế mơ’nui hơnăm 2023, khu tê mơdró hiăng tơkŭm hên rơxế, kơmăi kơmok, tơmeăm ƀă mơngế pêi cheăng mơjiâng pro troăng kân. Nôkố ai dâng 30 rơxế muk, rơxế gu, rơxế ƀen, rơxế tiê ƀă dâng 40 – 45 ngế pêi cheăng klâ chiâng péa kâ/hâi/măng tơkŭm po gu tơnêi ƀă mơjiâng mâu mŏng troăng. Tung roh Têt lo hơnăm nếo 2024 pơla kố nah, vâ tơniăn tơdroăng mơjiâng pro khu tê mơdró xuân tơkŭm po pêi cheăng tiah hmâ tung roh têt, tŭm tơdroăng rak ngăn ăm mơngế pêi cheăng hiăng châ kŏng ti pêi tŭm. Pôa Lê Quốc Thắng tối:

            ‘’Sap ing 26/12 âm lĭch troh hâi lơ 6/1 Têt, pakĭng troăng hơlâ riên tiô tơnêi têa drêng pêi cheăng hâi pơtê leh Têt, kŏng ti mơhá liăn ăm rêm ngế pêi cheăng 1 rơtuh liăn/hâi/ngế. Kố cho troăng hơlâ mơhnhôk mơngế pêi cheăng, rêm ngế xua kŏng ti mê kŏng ti xuân xua ăm rêm ngế’’.

            Tơdroăng tơkêa bro troăng kân ăm phêp rơxế kơtâu têi Khánh Hòa – Buôn Ma Thuột xŏn dâng 117,5 km tơdjêp kong pơlê Khánh Hòa – Dak Lak. Tâi tâng kơlo mơ’no liăn cheăng pro troăng kân cho 21.935 rơtal liăn ing liăn ngân tơnêi têa. Tơdroăng tơkêa bro troăng kân châ klâ pro 3 tơdroăng tơkêa, tơkêa kơxô̆ 1 xua kong pơlê Khánh Hòa pơkuâ mơ’no liăn pro; tơkêa kơxô̆ 2 xua Khu xiâm pơkuâ troăng prôk ƀă rơxế kơtâu mơjiâng; ki ê tơkêa kơxô̆ 3 xua kong pơlê Dak Lak pêi pro. Tơkêa kố châ kŏng pơlê Dak Lak pơcháu Khu pơkuâ Tơdroăng tơkêa bro mơ’no liăn mơjiâng troăng kân ƀă pêi chiâk deăng mơnhông thôn pơlê kong pơlê pro khu mơ’no liăn cheăng pêi pro mơjiâng pro.

            Pôa Đặng Thọ Dần – Kăn phŏ pơkuâ ƀơrô troăng klông Khu pơkuâ tơdroăng tơkêa bro, ngế ki troh séa ngăn tơdroăng tơkêa bro kơxô̆ 3 tối ăm ‘nâi, nôkố tâi tâng mâu khu ki mơjiâng pro troăng thâ pêi pro mơjiâng mâu tơmeăm môi tiah gu troăng tơnêi, tiê troăng ăm kâk, mơjiâng mâu mŏng kông tơkâ têa plông ƀă hía hé. Tung roh Têt lo hơnăm nếo Giáp Thìn 2024 pơla kố nah, mâu tíu mơjiâng pro pơrá kĭ pêi plâ roh têt, Khu hiăng pơkâ mâu khu pơkuâ tê mơdró pakong tơniăn tơdroăng mơjiâng pro, ki dâi lĕm mơjiâng pro troăng, mê kal thế tơmâng inhên troh mơhá liăn ăm mơngế pêi cheăng veăng mơjiâng troăng kân tiô pơkâ.

            ‘’Nôkố, klêi kơ’nâi ai tơnêi pro mê mâu khu pơkuâ mơ’no liăn mơjiâng pro hiăng tơkŭm thâ pêi pro gu mơjiâng pro troăng tơnêi têa a mâu troăng ki tơ’nôm, lo pêi cheăng mơjiâng pro troăng kân. Môi tiah tơkêa kơxô̆ 1 mê 100% hiăng ai troăng vâ mơjiâng pro. Ƀă tơkêa kơxô̆ 2 mê xuân hiăng klêi châ lối 70%. Tơkêa kơxô̆ 3 xuân hiăng chiâng vâ pro ƀă dế châ khu pơkuâ mơ’no liăn pêi pro thâ’’.

            Tiô pơkâ pêi troh hơnăm 2030, tơmiêt pêi troh hơnăm 2050, troăng kân ăm phêp rơxế kơtâu têi kố kô cho troăng ki xiâm vâ mơjiâng môi tung 5 hâng lông troăng cheăng kâ dêi kơpong Tây Nguyên, ƀă tơdroăng ki châ kơjo cho mơdró, ôm hyô ƀă pơto tơmeăm khoăng. Châ pơxiâm mơjiâng pro sap ing khế 6 hơnăm 2023, nôkố troăng kân ăm phêp rơxế kơtâu têi Ƀuôn Ma Thuột – Khánh Hòa hiăng chiâng troăng. Mâu tơdroăng tơkêa bro troăng klông kơpong Tây Nguyên, mâu tơdroăng tơkêa bro ai tơdjêp kơpong châ pêi pro rơdêi, dế chôa ‘lâng tơdjêp ƀă mâu troăng ki xiâm cheăng kâ dêi rêm kong pơlê, dêi kơpong ƀă dêi tá kơpong peăng tơdế Tơnêi têa – Tây Nguyên, mơjiâng tơ’nôm ivá mơdêk vâ mơnhông cheăng kâ – rêh ối pơlê pơla./.