Veăng tơdroăng mê kuăn pơlê hdroâng kuăn ngo Jêh - Triêng a thôn Nông Kon tối krê ƀă cheăm Đăk Dụk tối tơdjuôm hiăng trâm mâ, mơđah hên ƀai chêng- kơhnhon xuăng tiô chal ton; kơxuô kơƀăn chưng; tí tăng hlê plĕng, tơbleăng ‘na Têt tiô khôi hmâ dêi kuăn ngo; xah hêi ro kơmăng prâu on koh kân mơdĭng tiô khôi hmâ ton nah...

Rôh kố ƀă hnoăng cheăng tíu pêi cheăng pơkuâ, Khu xiâm pơkuâ ngăn Mố đô̆i gak tơkăng kong dêi kong pơlê Kon Tum tơkŭm po Leh pro klêi, pơcháu djâ tơmeăm khoăng Kuât túa lĕm tro thôn Nông Kon ƀă tơdroăng pêi pro. Kuât thôn Nông Kon châ mơjiâng pro tiô túa ton nah dêi mơngế Jêh - Triêng, tâi tâng kơxô̆ liăn pro vâ chê 145 rơtuh liăn.

A tơdroăng “Rơnó hơngui mâu lêng tơkăng kong tơtô  kuăn pơlê”, Khu xiâm pơkuâ ngăn Mố đô̆i gak tơkăng kong dêi kong pơlê Kon Tum tơrŭm ƀă mâu kơ koan, tíu pêi cheăng ăm 600 hlá cơ tơnêi têa ăm kuăn pơlê cheăm tơkăng kong Đăk Dụk; hbru ăm 1 toăng hngêi Tơrŭm tuăn kơnâ 50 rơtuh liăn, 30 kơxu tơmeăm ăm rơpŏng hngêi kơtiê, ăm hlá mơ-éa khĕn kơdeăn, tơmeăm dêi Khu xiâm pơkuâ ngăn lêng Mố đô̆i tơkăng kong ăm 10 ngế muăn  tiô tơdroăng Tơkêa bro “Mơdêk hvêa chêng o troh hngêi trung” ki ai hnoăng hriâm rơkê.