Tiô tơdroăng tơbleăng ing Khu rak ngăn tơniăn troăng prôk kong pơlê Kon Tum, a 21 chôu kong măng hâi lơ 25/2, a troăng kân Hồ Chí Minh, troăng ki tơkâ luâ thôn 4, cheăm Diên Bình, tơring Đăk Tô, rơxế ô tô krâ kơxô̆ 82A-09582 xua Nguyễn Văn Du (44 hơnăm) ối a cheăm Sa Sơn, tơring Sa Thầy, kong pơlê Kon Tum vê tung rơxế ai 3 ngế ki to a troăng tiô troăng ing tơring Đăk Tô lăm tơring Đăk Hà.

Drêng to troh a Km1518+100, rơxế ô tô klô̆m rơxế hon đa krâ kơxô̆ 82F1-03391 xua A Thuê (20 hơnăm) chơ A Thom (14 hơnăm) rơtế ối a thôn Đăk Kang Pêng, cheăm Diên Bình, tơring Đăk Tô, kơtâu a troăng tơrôu. Rôh tơklô̆m rơxế kố pro A Thuê ƀă A Thom hlâ tơdrêng, péa toăng rơxế tơ’nhiê ó.

Drêng tâng tơdroăng, khu ki ai tơdjâk troh hiăng rĕng ai mâ a tíu ki ai xía vâ vâ rak vế tơniăn ăm troăng prôk, tơdrêng amê hlối tơbleăng tơdroăng séa ngăn xiâm kối chiâng ai tơdroăng ki tơklô̆m rơxế.