Tung chôu phut hmái hơtĬng a Hngêi kuăn pơlê hmâ tơkŭm hôp dêi ƀuôn Diêo, cheăm Bông Krang, tơring Lăk, kong pơlê Dak Lak. A ngiâ hlá cờ Tơnêi têa, hlá cờ Đảng, um Kăn xiâm hnê ngăn tơnêi têa Hồ Chí Minh, H’Mên Teh tơpui mơdêi rơkong tơhrâ tung hâi châ mot Đảng, cho đảng viên ki nếo.

‘’Tơhrâ a vâ môi tuăn ƀă troăng rơhlâ ‘ló tro dêi kăch măng dêi Đảng, vâ pêi pro tro luât pơkâ tơdroăng kal kí, luât Đảng, tơdroăng pơkâ, hnê mơhno dêi Đảng, luât  dêi Tơnêi têa. Pê klêi tơdroăng cheăng pơcháu. Tơhrâ, Tơhrâ, Tơhrâ! ‘’.

H’Mên Teh, kot mâ hơnăm 1996, kuăn ngo M’Nông, klêi hên hơnăm mơ-eăm pêi pro tro tơdroăng lĕm ing kuăn pơlê ki kơhnâ nôkố hiăng chiâng đảng viên má 9 dêi Chi ƀô̆ ƀuôn Diêo. H’Mên Teh ai tối:

‘’Á hâk mơnê ‘nâng tơná hiăng châ mot Đảng Kŏng sản Việt Nam. A kô mơ-eăm tâ nếo, a kô pêi kơhnâ tâ mâu tơdroăng cheăng dêi pơlê’’.

Tơ’mot mơngế mot đảng viên nếo tung hdroâng kuăn ngo cho tơdroăng ki ôh tá xê hlâu, malối ƀă mâu cheăm kơtiê xơpá dêi tơring Lăk. La ƀă tơdroăng mơ-eăm ‘’mơjiâng, mơnhông chi ƀô̆ rơdêi’’ rêm khu tơrŭm cheăng Đảng cheăm hiăng mơjiâng tơdoăng pơkâ vâ pêi, tơbleăng Pơkâ ‘na kơxô̆ mơngế vâ châ mot Đảng, kơhnâ djâ troăng a hdrối, pro tơdroăng pơloăng mơnúa chiâng rôh tơ’lêi tung mơnhông cheăng kâ - rêh ối a cheăm pơlê. Pôa Y Wu Sruk, Kăn phŏ hnê ngăn Vi ƀan cheăm Yang Tao, tơring Lăk ăm ‘nâi:

“Ki tơ’lêi hlâu akố a cho ngế a pơlê kố, la cheăm Yang Tao cho cheăm kơtiê xơpá ó ai 95% ngế cho kuăn ngo. Mê a hlê túa tơlá rêh ối cheăng kâ dêi kuăn pơlê a kố, malối ‘na tơpui nâl kuăn ngo tơná vâ hnê tối ăm kuăn pơlê. Klêi mê tơdroăng rêh ối dêi kuăn pơlê, á hlê ki xơpá dêi kuăn pơlê. Ing mê, tơdroăng ki hlê mê a xúa pêi pro, pơkâ troăng rơhlâ dêi Đảng, luât dêi Tơnêi têa hnê ăm kuăn pơlê vâ kuăn pơlê hlê ƀă hlối xúa tung rêh ối’’.

Tiô jâ Đào Thị Thanh An, kăn phŏ hnê ngăn Đảng tơring Lăk, kong pơlê Dak Lak, ing tơdroăng ki hlo a cheăm kố ai krâm hdroâng kuăn ngo. Khu pơkuâ ngăn Đảng tơring Lăk tối nhên: tơdroăng tơ’mot mơngế mot đảng viên tung mâu hdroâng kuăn ngo rơtế ƀă tơdroăng mơhno xoăng hnoăng cheăng ăm kăn ƀô̆ tung khu cheăng kal kí ai pơxúa khât malối ki kal tung mơjiâng Đảng, mơjiâng khu kăn pơlê cheăm.

Ing mê, veăng mơdêk ki tơƀrê tung rak ngăn tơnêi têa, mơjiâng khu cheăng kal kí, rơdêi, mơdêk tung khu tơrŭm môi tuăn mâu hdroâng kuăn ngo. Jâ Đào Thị Thanh An ăm ‘nâi:

“Vâ tối tiah kố, tung mâu hơnăm hdrối mê hía nah, hnoăng cheăng kăn ƀô̆ đảng viên, malối đảng viên hdroâng kuăn ngo hiăng ƀă dế pơtối rak vế mơnhông cheăng kâ- túa lĕm tro - rêh ối pơlê pơla, tơniăn kring gak tơkăng kong, mơhnhôk kuăn pơlê mơjiâng khu cheăng kal kí a pơlê cheăm. Hnê kuăn pơlê pôi tá tơmâng loi khu ‘mêi, mơdêk tơrŭm môi tuăn dêi rơpó tung tâi tâng mâu hdroâng kuăn ngo”.

Troh nôkố, lâp tung tơring Lăk ai vâ chê 1.400 ngế đảng viên cho kuăn ngo, châ lối 42% tung tâi tâng đảng viên tung lâp tơring. Kố cho mâu ngế ki xiâm, kơhnâ veăng pêi cheăng mơnhông dêi pơlê, vâ rế ton rế mơnhông tơƀrê tâ.