Tơdroăng tơkêa bro ‘No liăn mơjiâng pro troăng kân tơdrăng lĕm sap Tân Phú - Bảo Lộc ki xŏn dâng 66km, tung mê ai 11 km troăng prôk a tơring Tân Phú, kong pơlê Đồng Nai ƀă 55km troăng prôk cho tung kong pơlê Lâm Đồng. Tơdroăng tơkêa bro ai tâi tâng kơxô̆ liăn ‘no mơjiâng pro rôh   pơ’lêh yă ai 17.200 rơtal liăn, tung mê liăn tơnêi têa 6.500 rơtal liăn (Liăn ngăn xiâm tơnêi têa 2.000 rơtal liăn, liăn ngân kong pơlê Lâm Đồng 4.500 rơtal liăn), liăn ngế xiâm pơkuâ mơjiâng pro 1.605 rơtal liăn,  ki u ối  cho liăn mơhnhôk ing mâu khu ki ê.

Kố cho tơdroăng tơkêa bro dêi Nhóm A xua Vi ƀan kong pơlê Lâm Đồng pro kơ koan tơnêi têa ki chiâng phêp ƀă Khu ‘no liăn mơjiâng  tối pơkâ tơdroăng tơkêa pro mê cho Khu mơjiâng pro xua Grup Đèo Cả ki teăng mâ. Rôh má 1, pro troăng kân tơdrăng lĕm mê  pro anâi rơdâ 17m ƀă xâu 4 toăng rơxế kơtâu tơluâ, mơhno pro mâu tíu rơxế tot  tơdrêng ôh tá xê tot puk puk, tiô tối hdrối pro klêi a hơnăm 2026.  Pơla  rôh má 2 kô ‘no liăn pro kêi troăng kân tơdrăng, trêi troăng rơdâ 22m,  xâu 4 toăng rơxế kơtâu ƀă tíu ăm rơxế tot tơdrêng puk pâk, tiô tối hdrối kô pro klêi hơnăm 2035.  

Pôa Lê Quỳnh Mai, Kăn phŏ hnê ngăn Hô̆i đŏng quan trị dêi Grup Đèo Cả ăm ‘nâi, Vi ƀan kong pơlê Lâm Đồng hiăng pơcháu ăm tíu pêi cheăng  séa ngăn chêh hlá mơ-éa Tơbleăng  tí tăng ngăn ƀă tơdroăng kố dế thâ pê klêi. Troăng kân, mâu tíu hdró, tíu tơdjêp, kloh mot, troăng  tơkŭm kuăn pơlê prôk... drô troăng kân tơdrăng hiăng châ môi tuăn. Pôa Lê Quỳnh Mai tối:

 “Tung pơla khế 7/2023 Grup Đèo Cả kô pơtroh ăm Vi ƀan kong pơlê Lâm Đồng tơbleăng tí tăng ‘nâi plĕng pêi pro klêi. Pơtối mê, Vi ƀan kong pơlê Lâm Đồng pơtroh ăm Khu xiâm ngăn troăng prôk ƀă Hô̆i đong séa ngăn dêi kơvâ cheăng vâ pêi tơdroăng séa mơnhên ngăn tơdroăng tơkêa mê.  Xuân tơngah troh khế 9/2023 kô pê klêi tơdroăng séa mơnhên ngăn mê vâ Vi ƀan kong pơlê Lâm Đồng kĭ tơdroăng tơkêa bro ƀă pơxiâm pêi hlối”.

Tơdrêng ƀă troăng kân tơdrăng sap Tân Phú - Bảo Lộc, Vi ƀan kong pơlê Lâm Đồng xuân dé mơdêk tơdroăng cheăng tơbleăng mơjiâng pro troăng kân  tơdrăng tơdjêp  ƀă Bảo Lộc - Liên Khương ki xŏn 74km, xâu 4 toăng rơxế tơluâ, ƀă tâi tâng kơxô̆ liăn ‘no mơjiâng pro ai 19 .521 rơtal liăn. Tung mê, liăn Tơnêi têa veăng ‘no lối 7.760 rơtal liăn, mâu khu mơjiâng pro 11.760 rơtal liăn, ki u ối liăn mơhnhôk ing khu ki ê. Pôa Hoàng Việt Lâm, Kăn phŏ pơkuâ Khu xiâm Pơkâ ƀă ‘no liăn cheăng Lâm Đồng ăm ‘nâi, troăng kân mê xuân dé pro hlá mơ-éa vâ rĕng klêi vâ rĕng tơbleăng ‘no liăn pro.

 “Phá tâ tơdroăng tơkêa bro troăng kân tơdrăng lĕm  sap Tân Phú- Bảo Lộc, tơdroăn tơkêa pro troăng kân sap Bảo Lộc – Liên Khương   cho tơdroăng tơkêa bro   tâi tâng tung kong pơlê Lâm Đồng. Xua mê kơ koan ki chiâng phêp cho Vi ƀan kong pơlê Lâm Đồng  ƀă kơ koăn kĭ troăng rơhlâ ‘no liăn mơjiâng pro cho Hô̆i đong hnê ngăn kong pơlê Lâm Đồng. Nôkố tơdroăng tơkêa bro xuân dé chêh hlá mơ-éa tơbleăng tí tăng ngăn vâ pêi’’.

Mâu tơdroăng tơkêa pro troăng kân tơdrăng  sap Tân Phú - Bảo Lộc ƀă sap Bảo Lộc - Liên Khương cho troăng kân xiâm, tơdjêp ƀă hlối tơ’lêi tung tê mơdró dêi kong pơlê Lâm Đồng ƀă pơlê kong kân Hồ Chí Minh ƀă mâu kong pơlê peăng hdroh tơnêi têa. Tâng mâu troăng kân tơdrăng mê hiăng pro kêi ah kố pro xiâm vâ mơnhông cheăng kâ- rêh ối dêi kong pơlê Lâm Đồng ƀă mâu kong pơlê ki ê tung kơpong vâ mơnhông tơ ƀrê.