Tíu xiâm Têa krúa ƀă Mơgrúa kong prâi thôn pơlê dêi kong pơlê Dak Lak dế pơkuâ, mơ’no 44/128 tíu xing xoăng têa tơkŭm dêi kong pơlê, kum xing xoăng têa ăm lối 33.100 ngế. Tơniăn bê têa ôu hum rôh jiếo, rak đi đo, Tíu xiâm Têa krúa ƀă mơgrúa kong prâi kong pơlê Dak Lak hiăng pơtroh mơ-éa troh mâu tơring kơjo têa ô hum rôh jiếo, tơdrêng amê pơkâ thế On tơhrik Dak Lak hbrâ on tơhrik tơniăn ăm mâu kơmăi hrik chuâ têa.

Pôa Phạm Ngọc Bình, Kăn pơkuâ Tíu xiâm têa krúa ƀă mơgrúa kong prâi kong pơlê Dak Lak tối ăm ‘nâi, mâu tíu cheăng ối tung kong pơlê hiăng tối tơbleăng rêm hâi, tơdroăng séa ngăn, rơnêu mâu kơmăi kơmok, troăng klŏng châ tơtrŏng, tơniăn rơnêu teăm tơdrêng mâu tơdroăng ki tơ’nhê, ôh tá lôi tơdroăng xing xoăng têa ô hum rôh jiếo tro pơtê.