Klăng leh tơbâ 77 hơnăm Hâi tơrŭm cheăng Việt Nam (11/4), kơxo lơ 6/4, Khu pơkuâ tơdroăng nếo ai, Rơ’jíu Việt Nam tơrŭm ƀă Khu tơrŭm cheăng Việt Nam tơkŭm po tơpui tơno ‘’Mơnhông mơdêk cheăng kâ khu pú hên, khu tơrŭm cheăng tung hneăng nếo’’.

Pôa Lê Minh Hoan, Ngế xiâm pơkuâ ‘na pêi chiâk deăng ƀă mơnhông mơdêk thôn pơlê troh veăng ƀă xông tơpui a roh hôp tơpui tơno. Tơdroăng klâ pro 2 roh pơxá inâi: ‘’Hlê plĕng tro vâ ai troăng hơlâ tơtro ƀă khu cheăng kâ khu pú hên’’ ƀă ‘’ ‘Mâi rơnêu Luât tơrŭm cheăng 2012 – Mơhnhôk nếo ăm cheăng kâ khu pú hên’’. A hneăng hôp tơpui tơno, mâu kăn teăng mâ tơkŭm pro nhên tâ hnoăng dêi cheăng kâ khu pú hên, tung mê ki xiâm cho khu tơrŭm cheăng; tơdroăng ki kal rĕng kêi đeăng troăng pơkâ pêi, troăng luât, ki xiâm cho ‘mâi rơnêu Luât tơrŭm cheăng vâ thăm mơnhông cheăng kâ khu pú hên ƀă khu tơrŭm cheăng ó rơdêi; mâu ƀai hriâm mơnhông mơdêk cheăng kâ khu pú hên ƀă khu tơrŭm cheăng lâp plâi tơnêi a Việt Nam.