Veăng hôp mê ai Teăng mâ Khu pơkâ hdró mơnhông kơphô̆, Khu rơkê ‘na kơchuâ chêh um vâ mơjiâng pro hngêi trăng kơphô̆ Việt Nam rơtế ƀă hên mâu ngế rơkê ki ê tung tơnêi têa ƀă kong têa ê. 

Ing mê, tơdroăng pêi pro, tíu hdró tơkăng kong ƀă tơdroăng tí tăng ‘nâi plĕng tá tâi tâng tơnêi tơníu dêi pơlê kong kơdrâm Đà Lạt ƀă mâu tơring Lạc Dương, Đơn Dương, Đức Trọng ƀă môi pâ dêi tơring Lâm Hà, po rơdâ tiô troăng ing a ‘ngêi 850m tơngi klêng tâng vâ pơchông ƀă rơgâ têa kơxĭ; ki rơdâ hdró tíu tơkăng pơkâ hdró tâk troh 336 rơpâu ha, kân luâ 10 hdroh tơnêi tơníu dêi Đà Lạt nôkố.

Tiô mâu ngế rơkê kơchuâ um vâ mơjiâng pro Trần Ngọc Chính, Kăn hnê ngăn Khu pơkâ Hdró mơnhông kơphô̆ Việt Nam, vâ rak túa ki lĕm krê xêh dêi Đà Lạt tiô khế hơnăm, bâ kô pêi pro tơdroăng pơkâ mơdêk ngiât lĕm ƀă hbrâ ví hyôh kong prâi hơ’lêh, kal ai môi troăng pêi ton hơnăm, mâu luât pơkâ tŏng kum krê ki nếo vâ pêi pro tơƀrê tơdroăng tơmiât pơkâ hdró tơdjuôm pơlê kong kơdrâm Đà Lạt ƀă kơpong achê troh hơnăm 2045 klêi châ Ngế pro xiâm hnê ngăn Chin phuh kĭ.