Ai 135 rơpŏng, hdroâng kuăn ngo Jêh - Triêng a thôn Dục Nhầy 1, cheăm tơkăng kong Đăk Dục, tơring Ngọc Hồi, kong pơlê Kon Tum, mê mâu kăn ƀô̆, lêng Đông Mố đô̆i gâk tơkăng kong Dục Nông môi tiah nhŏng o tung rơpŏng hngêi. Ngoh A Luật, môi ngế kuăn pơlê tung thôn ăm ‘nâi: Kuăn pơlê pơrá tơpui tối lĕm má môi drêng tối troh kăn ƀô̆, lêng tơkăng kong.

“Đông Mố đô̆i gâk tơkăng kong tơmâng ngăn troh mâu rơpŏng ki xơpá. Tŏng kum xo roăng rak to ngế mâu vâi o. Đi đo tơmâng ngăn khât troh vâi krâ nhŏng o kuăn pơlê a cheăm Đăk Dục. Á hlo tiah kố, mâu lêng mố đô̆i gâk tơkăng kong akố hiâm mơno, rơkê lĕm khât”.

Pái hơnăm hdrối Khu pơkuâ Đông mố đô̆i gâk tơkăng kong Dục Nông pơtroh Thiê̆u tă Dương Văn Lương lăm chi troh a Chi ƀô̆ thôn, mơdêk hiâm mơno, hnoăng cheăng pôu râng dêi ngế lêng mố đô̆i gâk tơkăng kong ƀă Đảng, ƀă Kuăn pơlê. Jâ Xiêng Thị Túy, Kăn pơkuâ Chi ƀô̆, ngế pơkuâ thôn Dục Nhầy 1 ăm ‘nâi thiê̆u tă Dương Văn Lương hiăng tí tăng ‘nâi plĕng ăm Chi ƀô̆ pơkâ mơ’no mâu Pơkâ vâ hơ’lêh tơƀrê khât tung hnoăng cheăng mơjiâng Đảng ƀă mơdêk tơdroăng rêh ối ăm kuăn pơlê.

Ing apoăng hneăng troh nôkố Chi ƀô̆ thôn Dục Nhầy 1 ăm mot 2 ngế đảng viên nếo mơdêk tâi tâng kơxô̆ ngế đảng viên Chi ƀô̆ tâk troh 19 ngế, rơpŏng kơtiê kơdroh tung tâi tâng thôn chu ối 6 rơpŏng:

“Pôa Dương Văn Lương kơhnâ khât tung tơdroăng ki veăng tơpui tối mâu tơdroăng, kum Chi ƀô̆ bro túa pơkâ mê nếo tơdroăng Pơkâ dêi Chi ƀô̆ ƀă tdroăng ki kal tung hnoăng cheăng gá hên hĭn tâ, tơ’mot châ hên ngế đảng viên veăng. Pakĭng mâu hnoăng cheăng mê pôa Dương xuân ối cho ngế ki kơhnâ kum vâi krâ nhŏng o, mố đô̆i ƀă kuăn pơlê xuân tơrŭm hên tâ nếo. Ing mê ai khu lêng ƀă kuăn pơlê pơtroh troh a Chi ƀô̆ mê thôn xuân châ thôn krúa krá rơdêi, mê nếo ôh tá ai rơpŏng ki lâi pro xôi luât”.

Tơrŭm krá tâ nếo pơla khu lêng ƀă kuăn pơlê, mơjiâng “tíu tơkăng kong tung hiâm mơno kuăn pơlê” krá rơdêi, ing hơnăm 2020 troh nôkố Khu pơkuâ ngăn Mố đô̆i gâk tơkăng kong kong pơlê Kon Tum hiăng pơtroh khu pơkuâ, khu lêng kuăn plê ki rơkê a mâu Đông Mố đô̆i gâk tơkăng pơtroh ăm 13/13 to cheăm a tíu tơkăng kong tơkoh ƀă kong têa Lếo prếi Kul.

Tung mê, ai 4 ngế kăn ƀô̆ Đông Mố đô̆i gâk tơkăng kong veăng cheăng tung râ Đảng 4 tơring; 13 ngế kăn ƀô̆ veăng tung râ Đảng 13 to cheăm tơkăng kong; 17 ngế kăn ƀô̆ châ pôk mot tung Hô̆i đong hnê ngăn râ kong pơlê, râ tơring, râ cheăm ƀă hên ki ê.

Trung tă A Ngọc Chiến, Đông Mố đô̆i gâk tơkăng kong Đăk Nhoong châ Khu pơkuâ ngăn Mố đô̆i gâk tơkăng kong pơlê Kon Tum pơtroh, rak vế hnoăng cheăng pro kăn phŏ pơkuâ ngăn Đảng ủy, Kăn pơkuâ Vi ƀan séa ngăn cheăm tơkăng kong Đak Nhoong, tơring Đăk Glei, kong pơlê Kon Tum ăm ‘nâi, rơtế ƀă râ Đảng dêi cheăm ‘mâi mơnhông, mơjiâng Đảng ƀô̆ krá rơdêi, ngoh đi đo tơmiât ƀă tơdroăng ki kuăn pơlê xut tah lôi khôi túa tơlá ki ôh tá tro ƀă hơ’lêh  túa rêh ối cheăng mơdêk ki rơkê plĕng tung rêh ối:

“Á hiăng tí tăng ‘nâi plĕng ăm Đảng ủy mơ’no tơdroăng Pơkâ pơkuâ ƀă hnê mơhno Vi ƀan hnê ngăn, Măt trâ̆n Tơnêi têa ƀă mâu khu tơrŭm tơdroăng kal kí pơlê pơla môi hiâm mơno veăng kum ƀă hnê mơhno mâu túa pơkâ mơnhông cheăng kâ, malối cho tơdroăng ki xut tah lôi khôi túa tơlá ôh tá tro vâ pro ăm kuăn pơlê hdroâng kuăn mơ-eăm hluăn ing kơtê krá ton. Ƀă cho cheăm tơkăng kong, kơpong kong rak kơnhŏng têa, ngin mơnhên cho pêt hdrê pơkeăng má môi cho pơkeăng kong Ngọc Linh, má péa ngin kô tơbleăng pêt kơxêt pâng ling vâ ai liăn pêi lo kơnâ”.

Tung mâu hơnăm hdrối nah ƀă tơdroăng “Đông cho hngê, tơkăng kong cho pơlê xiâm, kuăn pơlê mâu hdroâng kuăn ngo cho nhŏng o môi klêa môi kliâm”, khu mố đô̆i gâk tơkăng kong dêi kong pơlê Kon Tum hiăng ai hên tơdroăng pêi ai pơxúa, tơrŭm krá pơla khu lêng ƀă kuăn pơlê tíu tơkăng kong. Ki xiâm môi tiah túa pơkâ “Mơjiâng thôn Đăk Ga, cheăm Đăk Nhoong, tơring Đăk Glei phâi, rơdêi, tơniăn”; mâu kế tơmeăm kuăn pơlê xúa, môi tiah, hngêi kơmăi on tơhrik ki kŭn Đăk Giao/Đak Long; têa ôu kâ hum roh lo ing Bờ Y, Đăk Long, Đăk Blô; túa pơkâ pôu râng, tơrŭm pro nhŏng o ƀă rơpŏng ki ai tơdroăng rêh ối xơpá kum mơ-eăm hluăn ing kơtiê; kum 74 ngế muăn tung tơdroăng “Mơnhông hvêa chêng o troh hngêi trung”, 15 ngế muăn kuăn roăng Đông Mố đô̆i gâk tơkăng kong.

Ing tơdroăng ki môi tuăn, tŏng kum dêi kăn ƀô̆, lêng đông mố đô̆i gâk tơkăng kong, troh nôkố ai hiăng ai 7 tung tâi tâng 13 to cheăm tơkăng kong dêi kong pơlê Kon Tum pêi klêi thôn pơlê nếo. Rơtế amê cho tơdroăng rêh ối dêi kuăn pơlê a kơpong tíu tơkăng kong dêi kong pơlê Kon Tum dế rế hía rế pơhlêh, “hiâm mơno kuăn pơlê” tơ’nôm krá rơdêi, tơniăn”.