Kơtăn kố 94 hơnăm, hâi lơ 3/2/1930, Đảng Kŏng san Việt Nam châ mơjiâng, mơnhên tơdroăng ki kal tung tơdroăng mơnhông cheăng kăch măng tơnêi têa pin. Klêi kơ’nâi vâ chê 40 hơnăm pơhlêh nếo, tơnêi têa pin hiăng châ mâu tơdroăng châ tơƀrê kân, ai kơnâ tung tơdroăng mơtơtêk. Ing môi tơnêi têa kơtiê, ối parŏng vâi, Việt Nam hiăng kơdo mơ-eăm chiâng tơnêi têa dế mơnhông mơdêk, tơdroăng rêh ối kế tơmeăm khoăng ƀă hiâm mơno dêi kuăn pơlê châ pơhlêh.

Xông tơpui a roh hôp trâm mâ, Kăn xiâm pơkuâ pơtâng tối tơdroăng kal tơnêi têa Nguyễn Trọng Nghĩa tối nhên: Hơnăm 2024, vâ pêi kêi đeăng tơdroăng cheăng, hnoăng cheăng; pơtối mơnhông hnoăng dêi Khu pơtâng tối tơdroăng kal tơnêi têa ƀă tơdroăng mơjiâng Đảng, pin kal mơnhông lĕm tro mâu tơdroăng châ tơƀrê, xo vế túa ki rơkê tơtro hiăng ai, tah lôi mâu tơdroăng ki ối pá, tá hâi hôm ki ối ai.

Roh kố, 4 ngế đảng viên dêi Đảng ƀô̆ Kơ koan Khu pơtâng tối tơdroăng kal xiâm Tơnêi têa hiăng châ tơdah Mê dái 40 hơnăm Đảng ƀă Mê dái 30 hơnăm Đảng.