Liăn dêi mâu Grup Samsung, Intel, Foxxcon, Amkor... xuân dế mot a Việt Nam. Krê hơnăm 2024, FDI veăng ‘no ăm tâi tâng pơlê pơla, vâ chê 72% tung tâu tâng tơmeăm tê ăm kong têa ê, châ lối 20 rơtal dollars a liăn ngân tơnêi têa. Pakĭng mê, tiô riân la hâi teăm tŭm ăm hlo, kơpong FDI hiăng veăng kum lối 5 rơtuh ngế ai cheăng pêi, mơdêk ki tơbrê xiâm mơngế pêi cheăng ƀă pro pơxúa kơxô̆ liăn châ xo ăm mơngế pêi cheăng. Pôa Đỗ Thanh Trung, Phŏ Ngế xiâm ngăn liăn ngân tối nhên:

“Peăng Chin phuh, ngin mơ-eăm ‘mâi hơ’lêh trâu rơdâ a hên tơdroăng, ing luât pơkâ pro hnoăng mơhá, pro hlá mơ-éa tơkâ luâ tíu tê mơdró tơkăng kong troh mâu pơkâ pro hlá mơ-éa pơtroh ‘no liăn pêi cheăng. Ki xâm cho mơdêk tơƀrê, vâ iâ hâi ki pêi pro, kơdroh ‘no liăn ƀă veăng pro tơ’lêi hlâu má môi ăm khu mơdró ki ‘no liăn pêi cheăng, tê mơdró a Việt Nam”.

Tiô mâu ngế rơkê, tung pơla lâp plâi tơnêi dế ai hên tơdroăng ôh tá tơniăn, pro pơ’lêh tơmeăm tê mơdró tung lâp plâi tơnêi. Liăn FDI tung lâp plâi tơnêi xuân rế pơ’lêh tiô troăng kơdroh ngăn tiô kơ môi kong têa ki pơ’lêh ƀă tơdroăng tâk kơxô̆ liăn ‘no pêi cheăng a mâu tơdroăng cheăng ‘na kơmăi ki dâi lĕm, tuăn ngôa rơkê ki kuăn mơngế hriăn pro xuân rơtế ƀă mâu tơdroăng pơkâ kơdroh ‘no têa ‘mêi. Pakĭng mê, xiâm ki mơdró tơniăn mung rôe tơmeăm ƀă rak pro tơniăn ‘na kal kí rế thăm châ ngăn cho xiâm tung mâu tơdroăng pơkâ ‘no liăn pêi cheăng.

Ƀă Việt Nam, ki pơxúa tơbriê cheăng tê mơdró ôh tá xê to ing pơkâ kơchơ tê mơdró vâ chê 100 rơtuh kuăn pơlê ƀă kơlo ki xúa rế tâk rĕng, mê ối kơnôm 17 khu tê mơdró tơniăn, tung mê ai hên FTA rơxông nếo mê cho CPTPP, EVFTA  ƀă  RCEP… cho môi tung mâu khu cheăng kâ kân ai tíu pro rơdâ má môi lâp plâi tơnêi, ƀă kơxô̆ liăn pê lo rêm hơnăm ing tê kế tơmeăm mê kơpêng GDP tâk troh vâ chê 200%, tơdrêng ƀă tơmeăm khoăng mơjiâng pro ôh tá ta lâi châ mơnhông, tơdroăng tê mơdró kâ châ pơ’lêh, tơdroăng kal kí tơniăn ƀă luât pơkâ tŏng gum tơtro, Việt Nam dế pơtối cho tíu ki hên khu pêi cheăng troh ‘no liăn FDI vâ pêi cheăng.

Pôa Chaturon Thipphiansak - Phŏ pơkuâ xiâm Kŏng ti pêi cheăng tiô rơnó SCG Việt Nam, cho môi khu mơdró ki djâ troăng ahdrối tung mơnhông ngiât lĕm ƀă krá ton.

“Mâu khu mơdró kal ai troăng hơlâ pơkâ dêi kong pơlê pơ’lêh ƀă mơnhông ivá hmâ hbrâ ví ƀă mâu tơdroăng ôh tá tơniăn’na cheăng kâ tung lâp plâi tơnêi, kơxô̆ liăn têa châu ƀă liăn kum pro ngiât lĕm, lơ mâu pơkâ dêi ESG kơtăng. Drăng SCG, ngin ngăn ki pơ’lêh mê cho rôh vâ djâ troăng ahdrối tơbleăng mâu tơmeăm lĕm krá, tơdroăng tê mơdró tơdrăng lĕm ing mâu rôh tơrŭm rơdêi, veăng ‘no hnoăng mơnhông mơdêk ngiât lĕm dêi Việt Nam.

Việt Nam dế chôa lâng mot tung mâu hơnăm xông tơƀrê nếo ƀă púi vâ tâk vâ ai tiô tơdroăng châ tơpui rơhéa péa rôh hdró pơkâ mơnhông ki kal a hơăm 2030-2045. Ki xiâm cho tơkâ luâ lơ rế chu, ví tro hlôp pêi lo liăn iâ da dâk. Tung pơla cheăng kâ kâk kal thế pêi châ lối 8% a hơnăm 2025 ƀă mơ-eăm péa kơxô̆ a rôh pơtối. Laga, xiâm pơkâ mê ai pơkâ tung pơla lâp plâi tơnêi dế pơ’lêh rĕng, pá vâ ‘nâi hdrối, malối cho mâu tơdroăng pơ’lêh pro hnoăng mơhá ing Mih, kong têa ki tơdjâk kân má môi troh ‘na tê mơdró ƀă ‘no liăn pêi cheăng tung lâp plâi tơnêi. Jâ Trần Thị Hồng Minh, Viê̆n trương tí tăng ‘nâi pleăng ‘na luât tŏng gum ƀă troăng hơlâ ăm ‘nâi:

“Ki xiâm dêi mâu tơdroăng cheăng kố vâ pêi troh tơdroăng cheăng tung la ngiâ, pin kô pêi klêi môi troăng hơlâ FDI tung rôh tơbâ rơxông nếo vâ mơnhông pêi cheăng châ tơƀrê ƀă tơbleăng troh lâp lu dêi khu mơdró FDI tung tơdroăng cheăng kâ Việt Nam, môi tơdroăng ki tơngah tung hên hơnăm hdrối nah, pin hiăng púi tơngah ti lâi. Ƀă kô xuân cho mâu tơdroăng ki kal vâ ăm mâu kơ koan Đảng, Tơnêi têa pêi tro pơkâ ki tơdjâk troh mơnhông cheăng kâ dêi Việt Nam tung la ngiâ ƀă malối cho pơkâ vâ pin pêi châ rơhéa kơlo ki tâk 2 kơxô̆ tung pơla hơnăm 2026-2030”.

Tơngah tiah kố, ƀă mâu troăng hơlâ pêi nhên ing mâu khu xiâm kơvâ cheăng, tơdroăng rơtế ƀă mâu khu mơdró, Việt Nam kố ai môi tíu ‘no liăn pêi cheăng tơbriât cheăng, túa nếo, pêi tơƀrê - ôh tá xê to hnê mơhno ăm khu mơdró tung tơnêi têa mê ối tá Khô̆i mơdró kâ FDI hiăng, dế ƀă ko rah Việt Nam pro tíu  ki troh.