Pôa Phạm Ngọc Nghị, Kăn hnê ngăn Vi ƀan kong pơlê Dak Lak tối ăm ‘nâi, drêng tơdroăng tơkêa bro ôh tá bê liăn, kong pơlê hiăng pâ thế pơhlêh tâi tâng kơlo liăn mơ’no sap ing 1.509 rơtal liăn tâk 1.841 rơtal liăn, tâk tơ’nôm 332 rơtal liăn.

Kơxô̆ liăn kố tơniăn ăm tơdroăng tăng tơnêi lâp troăng, laga troh nôkố tơdroăng kố xuân hrá. Tơdroăng kố ăm hlo, mâu kơ koan, tíu cheăng tá hâi pêi tâi hnoăng cheăng. Kăn hnê ngăn Vi ƀan kong pơlê Dak Lak pơkâ thế mâu kơ koan, kơvâ cheăng, tíu cheăng ki tơdjâk thế thăm veăng, hbrâ pêi pro mâu hnoăng cheăng dêi tơná.

Tung mê, ngế ối a ko thế thăm pôu râng hnoăng cheăng, mơhnhôk râ pá kơdâm. Ki má lối cho tơdroăng tăng tơnêi, nôkố xuân dế kreăng ƀă hrá, kal ai tơdroăng ki veăng kơtăng tâ nếo kô chiâng tơniăn tơdroăng mơjiâng pro tiô pơkâ pêi.