To lâi hơnăm tro tâ pơreăng COVID-19, nôkố hiăng chía tâ iâ, Têt Quý Mão hơnăm kố, pơlê Măng Lây, cheăm Đăk Ring, tơring Kon Plông vêh ai nếo tơdroăng ki tơkŭm sôk suâ. Vâi krâ-nhŏng o tơkŭm a kuât, tơkŭm po hâi ki pế kơƀăn tơxông, rơtế dêi pó ôu kâ a hâi ki ro tung pơlê pơla. Jâ Y Gơ, môi ngế kơdrâi tung pơlê tối ăm ‘nâi: Hngêi trăng ki lâi ai kế kâ kơhiâm, drôu xiâm xăng lĕm pơrá pôu chiân tơkŭm a kố vâ ăm vâi krâ-nhŏng o tung pơlê rơtế ôu kâ. Ai rế hên ngế kâ tơmeăm pin pế pơchên, ôu mâu drôu xiâm pin pế mê kăn rơpŏng hngêi thăm rế ro ó tâ nếo. Krê dêi tơná, jâ Y Gơ xuân hiăng hbrâ rơnáu mâu tơmeăm mê ing to lâi khế hdrối nah:

Băng-tiếng Xơđăng: “Vâ khoh chiâng ai drôu xiâm ki xăng lĕm ‘mrĭt athế ai kế tơmeăm ki pế krúa lĕm, dâi khât. Pế drôu ƀă phó, phái lơ pôm loăng xuân athế tăng rah tơmeăm ki dâi lĕm khât. Ki kal má môi cho tơdroăng pro pló. Drêng pro pló mê athế rah hlá tung kong, ki tro păng ‘nâng dêi mơngế Rơteăng, mot tung kong lăm tăng hlá, kơtôu, rêi loăng... kế tơmeăm tung kong djâ vêh a hngêi vâ pro pló.

Tâi pơlê kó ai kơdrâm mơngế, la bu ai iâ ngế tê ki chiâng pro pló ki llĕm păng ‘nâng. Tung pơla ăm pló xông mê, pin athê ‘măn vó mê tung tíu ki krúa lĕm, rơngiâp. Drêng ôu, têa ko ga kô trĭng môi tiah tê xot, đi đo ối hêng ôu, mê cho drôu ki xăng lĕm ‘mrĭt”.

Lối 500 pơlê hdroâng kuăn ngo ki iâ mơngế a kong pơlê Kon Tum, xua tơdroăng cheăng kâ pơrá phá dêi pó, mê túa ki tơkŭm po hâi leh mơdĭng xuân phá dêi pó há. Laga, pơlê ki lâi xuân hlo nhên tơdroăng ki hơniâp ro tiô khôi hmâ, tơdroăng ki mơjo pâ dêi pó. Roh apoăng troh a Kon Tum, hơniâp ro hâi Têt a pơlê, chiâng tơviah drêng hlo lối chât to hdro kăng ki dế drăng a kơnoh on, lối hrĭng xiâm drôu pơtăng tơdrăng krếo ăm tơmối i ôu, ƀă kơdrâ tơviah tơdroăng ki kuăn pơlê akố rơkê hlế kơ tơmối, nâ Nguyễn Thúy Diễm, môi ngế lo ing Pơlê kong kân Đà Nẵng ai tối:

“Akố, tơdroăng rêh ối cho hơniâp ro păng ‘nâng, tơdroăng rêh ối dêi vâi krâ-nhŏng o hơniâp ro ó khât, tơrŭm dêi pó. Cho tơdroăng ki hơniâp ro khât, sôk phiu pá kâi tối ƀă vâi krâ-nhŏng o a kơpong kố”.

Têt hiăng troh ƀă tơdroăng ki hơniâp ro khât, xua pơreăng COVID-19 hiăng chía pá ai tâ tú, xua mê, idrâp chêng, idrâp koăng dêi mơngế Rơteăng, Bơhnéa, Jarai, Jêh - Triêng, Brâu, Rơ Măm, Hre a Kon Tum môi tiah thăm rế hơniâp ro, sôk suâ tâ, ƀă túa kơhnhon xuăng dêi mâu vâi rơtăm, vâi droh xuân thăm rế ro rih. Mâu tơdroăng ki ôu kâ tung rơpŏng hngêi ƀă pơlê pơla pơrá châ tơkŭm po tro klăng a hâi Têt Lo hơnăm nếo, thăm pro tro tiô khôi túa mơhno lĕm tro dêi hdroâng kuăn ngo.

Ƀă 2 rơpâu 500 kơtum chêng koăng dế châ rak vế, xúa vâ tŏn ƀă hên mâu khu prôa, rơvŏng hlŭm ki ê, cho mâu tơmeăm khoăng ki kơnía git tung tơdroăng ki vâ hriăn plĕng, tí tăng klê mơnhên ‘na mơhno túa lĕm tro-ôm hyô drêng lăm pôu a pơlê tung roh Têt a kong pơlê Kon Tum. Pôa Phó Đức Văn, mơngế lo ing bêng Tứ Liên, pơlê krâm Tây Hồ, pơlê kong kân Hà Nội châ hlo nhên ‘na tơdroăng kố, ai tối:

“Roh apoăng á troh a Kon Tum xuân châ mơhúa há châ veăng lăm ngăn, hmâng tơdroăng tŏn chêng koăng dêi mâu hdroâng kuăn ngo a kong pơlê Kon Tum, mê á hlo kố cho khôi túa, vêa vong ki lĕm tro păng ‘nâng. Chêng koăng, klêi mê, prôa hmốu, cho kơnĭng, klêi mê, troh a Klŏng Put, mâu hmân ếo pơtâk dêi vâi krâ-nhŏng o ai hên túa ó khât”.

Răk vế khôi túa, vêa vong tung tơdroăng rêh ối rêm hâi dêi kuăn pơlê cho môi tung mâu tơdroăng cheăng ki xiâm dế châ kong pơlê Kon Tum thăm kơdo mơ-eăm rak vế, pêi pro. Thăm nếo, a tơring Tu Mrông, cho kơpong ki má lôí kơtiê xahpá dêi kong pơlê ai lối 95% cho kuăn pơlê hdroâng kuăn ngo Rơteăng dế hbrâ rơnáu tối tơbleăng mâu kế kâ, tơmeăm xúa dêi hdroâng kuăn ngo tơná ing mâu tơdroăng cheăng ôm hyô pơlê pơla.

Pôa Nguyễn Bá Thành, Kăn pơkuâ ngăn Tíu xiâm Mơhno túa lĕm tro, Ivá, Ôm hyô ƀă pơtâng tối dêi tơring Tu Mrông, tối ăm ‘nâi:

“Vâi krâ-nhŏng o ing tíu ê kô veăng ƀă mâu rơpŏng hngêi tĕn hmôu, jiâ dêi mơngế Rơteăng ƀă tŏn chêng, tơgôu koăng, kơhnhon xuăng, rơngê ting ting. Mâu tơmối xuân châ lăm ôm hyô ngăn troh a xí Siu Puông, xí Tê Rông ƀă lăm pôu ngăn klâng kơlo a Măng Drâi, kêi mê, hếo tâk ngăn a kơdrum pêt sâm Ngọc Linh”.

Ƀă hiâm mơno ki hâk ro mâu tơdroăng ki nếo, mơjo pâ, Têt a pơlê kô tơ’lêi pro kuăn pơlê ƀă mâu tơmối châ achê dêi pó hên tâ. Rơkong tơpui ki tơkŭm a hâi Têt a mâu pơlê pơla dêi hdroâng kuăn ngo a Kon Tum xua ti mê râ hiăng châ bâ eăng ing rơpŏng hngêi, troh a pơlê pơla ƀă troh a lâp lu tung kơpong dêi mơngế Rơteăng rêh ối.