Klăng leh tơbâ 135 hơnăm Hâi Kot mâ Pôa Hồ Chí Minh, Kăn xiâm hnê ngăn tơnêi têa hneăng apoăng ki nhuô̆m pâ, kơxê lơ 19/5, a pơlê kong kơdrâm Kon Tum, Khu pơkuâ vâi kơdrâi kong pơlê Kon Tum tơkŭm po Hneăng hôp kheăn kơdeăn mâu ngế ki kơhnâ rơkê hneăng hơnăm  2020 – 2025 ƀă mơđah tơbleăng um ƀă dó inâi ‘’Pôa Hồ ƀă Vâi kơdrâi Việt Nam’’.

5 hơnăm hiăng hluâ tơdroăng tơ’noăng pâ nhuô̆m tơnêi têa tung lối 100 tíu pêi cheăng khu pơkuâ vâi kơdrâi kong pơlê Kon Tum, hiăng pro pơhlêh hên, păng ‘nâng, troh lâp lu ó rơdêi tung pơlê pơla. Mâu khu râ hiăng mơhnhôk mơjiâng châ 35 ‘’Hngêi tuăn pâ’’ diâp chât rơpâu hnoăng liăn hriâm rơkê, kơxuô tơmeăm; tŏng gum pêi pro lối 30 troăng tơmiât pêi rơkê, tơdroăng tơkêa bro pơxiâm tăng cheăng pêi dêi mâu khu tơrŭm cheăng, vâi kơdrâi; mơjiâng vâ chê 940 troăng pêi, troăng pêi kâ rơkê tung mâu kơvâ cheăng.

Tung 5 hơnăm, hiăng ai lối 1.700 rơpŏng vâi kơdrâi hluăn ing kơtiê, lối 1.360 rơpŏng châ 8 túa pơkâ pêi rơpŏng 5 ôh, 3 krúa; 860 khu pú hên, ngế krê cho kăn ƀô̆, mâu ngế tơrŭm cheăng vâi kơdrâi kong pơlê Kon Tum châ mâu râ, kơvâ cheăng, kong pơlê kheăn kơdeăn.