Kơxo hâi lơ 12/4, a Hngêi Kuô̆k hô̆i, xua pôa Vương Đình Huệ - Kăn xiâm hnê ngăn Kuô̆k hô̆i, Vi ƀan pơkuâ Kuô̆k hô̆i pơxiâm hôp tơdroăng ‘na luât khế 4. Tơbleăng a rôh pơxiâm hôp, pôa Vương Đình Huệ - Kăn xiâm hnê ngăn Kuô̆k hô̆i ăm ‘nâi, a rôh hôp mê, Vi ƀan pơkuâ Kuô̆k hô̆i ăm hnê tối 3 tơdroăng tơkêa luât ki kal vâ pơtroh ăm Kuô̆k hô̆i ăm hnê tối a roh hôp má 5, mê cho: Luât tê mơdró tơnêi tơníu (‘mâi hơ’lêh); Luât hyôh phôn (‘mâi hơ’lêh) ƀă Luât Căn cước kuăn pơlê ( ‘mâi hơ’lêh).

Xuân a rôh hôp mê, Vi ƀan pơkuâ Kuô̆k hô̆i ăm hnê tối ‘na tơdroăng pơtroh ăm Kuô̆k hô̆i pơkâ tơ’nôm a tơdroăng mơjiâng luât, luât pơkâ ƀă 2 tơdroăng tơkêa bro: Luât Troăng prôk, Luât rak Tơniăn drô troăng prôk. Pakĭng mê, mâu kăn veăng tối ‘na Tơdroăng pơtroh ăm Chin phuh tối mâu luât pơkâ tŏng kum ki nếo tung tơdroăng rak ngăn mot tung tơnêi têa tơkâ tíu tơkăng kong, vâ mot tung kong têa ê, lăm rêh ối dêi mơngế kong têa ê a Việt Nam pơkâ tơdjuôm dêi Kuô̆k hô̆i a rôh hôp má 5; troăng pơkâ ‘no liăn pêi tơdroăng tơkêa bro troăng tơdjêp mâu kơpong ƀă mâu kong pơlê Khánh Hòa, Ninh Thuận ƀă Lâm Đồng.