Tơdroăng kố ai pơxúa kal rak vế, pơtối mơdêk hiâm mơno tơrŭm tơroâ ki tơviah sap nah tá hâi chói ai dêi péa hdroâng mơngế Việt Nam – Cuba, malối cho ƀă mâu rơxông ối nếo pơlê kong kân. Tơdroăng tơrŭm tơroâ nhŏng o pơla péa tơnêi têa Việt Nam – Cuba hiăng châ mơjiâng ƀă mơnhông tung tơdroăng ki môi tiah sap nah tá hâi chói ai dêi péa hdroâng mơngế.

Lối 60 hơnăm hdrối, ing hâi ki péa tơnêi têa mơjiâng tơrŭm cheăng tơpui kâ lơ (2/12/1960), péa hdroâng mơngế hiăng đi đo tơrŭm tung tơplâ xua tơniăn krê, ƀă nôkố đi đo tơrŭm ƀă dêi rơpó prôk krá tung tơdroăng cheăng mơjiâng ƀă rak vế Tơnêi têa xah hô̆i chuh ngiah a rêm to tơnêi têa. Kố cho tơdroăng ki tơrŭm tơroâ, tơrŭm nhŏng o, hdrối kơ’nâi xuân môi tiah môi, tơrŭm cheăng hiăng chiâng tơdroăng ai chal nôkố, cho kế tơmeăm ki kơnía git ki péa Đảng ƀă kuăn pơlê péa tơnêi têa Việt Nam – Cuba đi đo rak vế, tơbêng ƀă pơtó ăm mâu rơxông xo ah hmôi.