Kố xuân cho roh tơpui tơno râ Ngế xiâm apoăng pơla Việt Nam ƀă Mih sap ing péa tơnêi têa mơnhên tơrŭm cheăng ton xŏn tâi tâng. Pôa Bùi Thanh Sơn mơnhên Mih cho khu tơrŭm cheăng râ kal khât ƀă ton xŏn dêi Việt Nam, mơnhên Việt Nam kô pơtối rơtế ƀă Mih pêi pro tơrŭm cheăng ton xŏn rế hía rế châ tơƀrê, păng ‘nâng, tơniăn.

Péa Ngế xiâm xuân tơpui tơno ‘na mâu troăng pêi vâ pro trâu hơngế tâ tơrŭm cheăng pơla péa tơnêi têa. Péa Ngế xiâm môi tuăn ‘na tơdroăng mơnhông troăng Tơpui kâ râ Ngế xiâm vâ thăm tơrŭm krá tơniăn pơla péa Ngế xiâm tung pêi pro mâu tơdroăng môi tuăn râ kăn xiâm; pêi pro châ tơƀrê troăng tơrŭm cheăng pơla péa pâ ki dế ai nôkố, tung mê, ai troăng tơpui kâ ‘na kal kí – gâk kring – cheăng lêng, tơpui tơno troăng hơlâ cheăng lêng, tơpui tơno ‘na hnoăng kuăn mơngế; môi tuăn thăm tơrŭm tơkŭm po mâu tơdroăng leh tơbâ 30 hơnăm péa tơnêi têa tơrŭm cheăng tiah hmâ tung hơnăm 2025.