Hâi lơ 16/5, a Tíu pêi cheăng kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn Chin phuh hiăng pơkuâ po leh tơdah păng ‘nâng jâ Paetongtarn Shinawatra, Ngế pro xiâm hnê ngăn kong têa Siam. Klêi leh tơdah, 2 Ngế pro xiâm hnê ngăn tơnêi têa rơtế pơkuâ po Hneăng hôp má 4, Chin phuh tơdjuôm Việt Nam – Siam.

A Hneăng hôp, Péa Ngế pro xiâm hnê ngăn tơnêi têa môi tuăn mơdêk tơrŭm cheăng Siam – Việt Nam tâk troh kong têa tơrŭm cheăng tung la ngiâ tŭm têk. Vêh tơbâ tơrŭm cheăng 2 tơnêi têa klêi 10 hơnăm mơjiâng tơrŭm kong têa tung la ngiâ, Ngế pro xiâm hnê ngăn tơnêi têa ăm ‘nâi, 2 tơnêi têa ai mâu tơdroăng ki bâ eăng ki kal: Mê cho loi tung tơdroăng kal kí la ngiâ ôh tá la lâi pơtê mơdêk, pơtroh khu kăn troh a tơnêi têa dêi rơpó châ mơdêk rơdêi tung tâi tâng mâu kơvâ cheăng, mâu khu râ.

Tơrŭm cheăng lêng gâk kring rế hía rế trâu hngế chiâng tơdroăng xiâm ki kal dêi 2 tơnêi têa. Tơrŭm cheăng kâ, tê mơdró, ‘no liăn thăm mơnhông luâ kơlo tá ki rơkê plĕng. Sap ing hơnăm 2016 troh nôkố Siam cho kong têa tơrŭm cheăng kân má môi dêi Việt Nam ƀă Việt Nam cho kong têa tơrŭm cheăng kân má 2 dêi Siam tung ASEAN, ƀă kơxô̆ liăn châ xo ing tê mơdró pơla péa pâ hơnăm 2024 châ lối 20 rơtal dollars ƀă tơmiât troh 25 rơtal dollars tung mâu hơnăm la ngiâ.

Klêi hneăng hôp má 4, Chin phuh tơdjuôm Việt Nam – Siam, pôa Phạm Minh Chính, Ngế pro xiâm hnê ngăn Chin phuh ƀă jâ Paetongtarn Shinawatra, Ngế pro xiâm hnê ngăn kong têa Siam hiăng châ hlo Leh diâp pơhlêh hlá mơéa tơrŭm cheăng pơla mâu khu xiâm, kơvâ cheăng péa tơnêi têa.