Loi ƀă tơngah cho tơdroăng tơmiât dêi hên ngế kăn Kuô̆k hô̆i ƀă rôh hôp má 4, Kuô̆k hô̆i hneăng 15. Rôh hôp po klêi Hneăng hôp Tíu xiâm má 6 nếo mơgêi ƀă tơdroăng tơpui tơno hên tơdroăng ki kal ƀă mơnhông mơdêk cheăng kâ-rêh ối dêi tơnêi têa; tơdroăng vâ hơ’lêh nếo troăng pơkuâ hnê dêi Đảng… Ki tơxâng vâ tối, Hneăng hôp tíu xiâm tơnêi têa má 6 hiăng hnê mơhno ƀă rak vế pêi pro tiô tơdroăng veăng dêi mâu Ngế cheăng tung tíu xiâm Đảng. Mê cho xiâm ki po troăng ăm tơdroăng ăm ‘na ‘’Túa lĕm tro vâ pơtê cheăng’’ vâ mâu ngế ki ê cheăng tung tíu xiâm ngăn dêi tơná ƀă pêi pro troăng a hdrối ăm mâu kăn ki ê ki cheăng tơdroăng kal kí.

Lê Thanh Vân, Kăn kong pơlê Cà Mau tối tiah kố:

“A tơngah, troh drêng lâi ‘lo, drêng Đảng hiăng prôk hdrối mê tung khu kăn dêi Tơnêi têa xuân hiăng ai mâu tơdroăng pêi pro tơtro, vâ mâu ngế pro kăn xiâm Tơnêi têa hlo dêi tơná o tá ai ivá ôh tá rơkê plĕng thế ‘nâi “pơtê xêh” ăm mâu ki ê to pro kăn; vâ mâu ngế ki ai ivá, tuăn ngôa rơkê, ai hiâm mơno lĕm, tuăn tơdrăng to pro kăn la ôh tá ê kơtâu ƀă liăn, ôh tá êa tu ko pâ thế ăm tơná pro kăn’’.

Tâ tá rôh hôp má 4 Kuô̆k hô̆i hneăng 15

Môi tơdroăng ‘na rêh ối “ki hlo hên nôkố’’, châ kuăn pơlê tơmâng mê cho yă tê châu têa kơxăng. Tơdroăng to yă têa kơxăng pơla hdrối kố nah ai xiâm ki kal ing tơdroăng xua ôh tá ai xiâm ki vâ rôe tê têa châu tung tơnêi têa, kơxô̆ liăn ‘no kơdroh ôh tá tơtro, yă rôe kơnâ tâ yă tê pro hên khu mơdró têa châu têa kơxăng chiâng lŭp. Ki khât mê chiâng pro ai hên tíu tê têa kơxăng klĭng dêi péa ‘nâ hía tê ăm tơmối la ôh tá tê hên ăm mơngế ki rôe. Kuăn pơlê pâ thế Chin phuh hriâm ƀă ai troăng rơhlâ hbrâ ví teăm tơdrêng, drêng yă tê tung lâp plâi tơnêi ôh tá pơxúa tung la ngiâ. 

Pa kĭng mê pơkâ thế mơnhên ki u ối tung tơdroăng cheăng hnê mơhno pơkuâ ƀă séa ngăn yă mâu tơmeăm. Xua tung pơla têa kơxăng, têa châu kơdroh, hên tơmeăm xuân a kơlo kơnâ; malối mâu tơmeăm pêi lo ing chiâk deăng, kế kâ… pro tơdjâk kân troh tơdroăng rêh ối dêi khu mơdró:

“Tŭm tơdroăng cheăng pêi ki lâi xuân tơdjâk troh têa châu, têa kơxăng.  Tơdjâk kân troh tơdroăng pêi cheăng tê mơdró, tá mâu kŏng nhân pêi cheăng, tá tơdroăng chơ tơmeăm tê, tơmeăm vâ mơjiâng tơmeăm khoăng. Ing kơvâ ngăn ‘na chiâk deăng troh kơvâ mơjiâng, tá kơvâ cheăng tê mơdró ‘na mâu tơmeăm tê mơdró mê xuân tơdjâk troh têa kơxăng’’.

Klêi hên hdroh pơtê, rôh kô Kuô̆k hô̆i pơkâ ‘mâi hơ’lêh tơdroăng tơkêa Luât Tơnêi tíu: Kố cho tơdroăng tơkêa luât châ hên kuăn pơlê tơmâng ƀă pâ thế plâ mơdât tơdroăng ôh tá tro, krâ pro pơxúa tung tơdroăng mơjiâng luât. Tơdroăng tơkêa Luât tơnêi (‘mâi hơ’lêh) kal mơnhên tơdroăng xo tơvêh  tơnêi,  malối ƀă tơdroăng pro kơphô̆, kơpong hngêi tê mơdró. Tơdroăng chêl thiăn, kơjo kum, ‘mâi pro pơlê drêng Tơnêi têa xo tơvêh tơnêi thế pro tơniăn ăm tơdroăng kuăn pơlê ‘na pê cheăng châ xo tơ’mot liăn ƀă tơdroăng rêh ối tơdâng lơ hôm tơƀrê tâ a tíu ối ton.

Ki tơxâng vâ tối, ‘nâi nhên luât pơkâ liăn ngân ‘na tơnêi. Cho kơ koan pêi hnoăng cheăng rak ngăn tơnêi têa ‘na tơdroăng tơnêi. Pôa Trần Hồng Hà, Ngế xiâm ngăn ‘na tơmeăm khoăng dêi tơnêi têa ăm ‘nâi: Tơdroăng Tơkêa Luât  Tơnêi (‘mâi hơ’lêh) pêi pro tơdroăng pơkâ rak tơniăn ‘nâi nhên tơnêi  tơbleăng,  tơdrăng  ƀă tơtro ƀă yă tê a kơchơ vâ kuăn pơlê ƀă khu mơdró xuân châ xúa:

“Drêng pro yă tơnêi tơniăn tối nhên tơdrăng ƀă tơtro ƀă yă tê a kơchơ mê kuăn pơlê ƀă khu mơdró xuân châ xúa. Tơdroăng mê veăng mơnhên hlối xoăng dêi rơpó tơnêi klâng chiâng, ki kân kŭn. Kuăn pơlê drêng ai tơnêi tro xo tơvêh mê yă tơnêi pơtân a kơlo ki xo tơvêh mê kô châ chêl thiăn tơxâng, tơtro ƀă yă tơnêi. ‘Na tơnêi têa xuân châ xúa, xua drêng rôe kuăn pơlê xúa tơnêi xuân châ xo tro tiô ki pơxúa’’.

Mâu kăn Kuô̆k hô̆i veăng hôp roh má 4 a Hngêi hôp kân Diên Hồng, Hngêi Kuô̆k hô̆i

Klêi Hôp dêi tíu xiâm má 6 ăm hnê tối ‘na troăng rơhlâ ‘mâi hơ’lêh liăn khế, liăn khế kâ drêng hiăng pơtê cheăng xua hiăng krâ, liăn kơjo kum ƀaoh hiêm pơlê pơla ƀă liăn kơjo kum ăm mâu ai hnoăng tơnêi têa tung hơnăm 2023, troh nôkố, Chin phuh dế pơtroh ăm Kuô̆k hô̆i  tiô tối hdrối kô ‘mâi hơ’lêh liăn khế kâ a pơlê cheăm kong pơlê ing hâi lơ 1/7/2023 ƀă kơlo liăn khế kâ tâk ing 1 rơtuh troh 490 rơpâu liăn tâk 1 rơtuh 800 rơpâu liăn. Kuăn pơlê tơngah tơdroăng pâ kâ mê châ Kuô̆k hô̆i tơbleăng vâ ‘mâi hơ’lêh kơxo liăn pêi lo vâ vâi hmiân tuăn pêi cheăng, pê klêi hnoăng cheăng châ pơcháu:

“Tâng pêi pro to liăn khế hneăng kố mê kô pro ai troăng rơhlâ tơniăn tơdroăng rêh ối dêi mâu kăn ƀô̆, kong chưk ƀă mơngế ki pơtê cheăng xua hơnăm hiăng krâ, mơhno ki mơnhông mơdêk tơnêi têa. Laga, xiâm ‘na cheăng kâ vâ pêi pro tơdroăng mơdêk kâ liăn khế tơniăn hôm tơniăn há? Púi vâ mơdêk kâ liăn khế  cho tơdroăng púi vâ ki xiâm dêi kuăn pơlê’’.

Kuăn pơlê pâ thế Chin phuh tí tăng ‘nâi plĕng vâ ai luât pơkâ tơtro ƀă tơleăng mơnhên mâu tơdroăng xôi drêng pêi mâu tơdroăng pơkâ tơdrêng tung hbrâ mơdât pơreăng COVID-19. Tơdrêng amê, cho pơtối mơdêk tơdroăng cheăng séa ngăn, tí tăng ngăn ƀă pơxâu mâu ngế pro xôi. Xua tơdroăng mơngế xôi, pro xôi luât tung kơvâ hbrâ mơdât xuân pơtối tâ tú rơ-iô; Pêi ahdrối tơdroăng ‘no liăn cheăng ăm kơvâ ngăn pơkeăng pơlât; malối kal ai luât pơkâ, luât tŏng kum tơtro, tơ’mot hên, mơnhông mơdêk khu kăn ƀô̆ kŏng chưk, viên chưk kơvâ ngăn cheăng khăm pơlât; tơniăn ‘na tuăn tơmiât dêi kăn ƀô̆ ngăn pơkeăng tung pơla ai hên ngế tro pơxâu phâk mơ’no cheăng xua ai tơdroăng pro xôi.