Túa rơ-rêk xuăng krếo Xeăng dêi mơngế Rơđế

Thứ tư, 10:20, 12/11/2025

Prế pơchuât: A Sa Ly – Katarina Nga/VOV Tây Nguyên

VOV.Xơ Đăng - Mơngế Rơđế - môi tung mâu hdroâng kuăn ngo pêng păm khôi túa lĕm tro a kơpong Tây Nguyên kơpong kân rơdâ – a môi tíu ngê̆ thuât kơhnhon xuăng kơnía phá tơ-ê má môi. Mâu túa, rơ-rêk xuăng dêi vâi ôh tá xê to mơhno ki lĕm tro ‘na châ, túa, rơ-rêk ƀă tơdroăng ki chiâng lĕm tung ngê̆ thuât mơđah tơbleăng, mê ối mơhno trâu hơngế tơdroăng rêh ối ‘na hiâm mơno, tơdroăng loi tơngah ƀă tíu xiâm dêi tơmeăm kong kế.

Tung mê, mâu túa, rơ-rêk ki lĕm ro má môi kô chiâng tối troh môi tiah nâl Rơđế tối dêi: Ktŭng Khăk, lơ tối Ghat khil (xuăng râng khiâ), Kdŏ jông (xuăng râng chông), Pah hgơr (xuăng têa hơkâ), Čim Grư̆ (xuăng bro kleăng)... Rêm túa-rởêk pơrá tơdjêp ƀă môi tơdroăng, môi tơdroăng leh, mơdĭng ki ro, môi tơdroăng mơhno ki krih tơviah, mơhno hiâm mơno nhuô̆m tơdroăng tơchok, hiâm mơno ‘nâi koh mơnê kơ khu xeăng, xuân môi tiah tơdroăng pói vâ ‘na rơnó pêi lo châ hên kế tơmeăm, tơdroăng rêh ối phâi hơtô, hơniâp lĕm.