VOV4.Sêdang - Tung mâu hơnăm hdrối mê hía nah, tơdrêng ƀă tơdroăng tơmâng ‘no liăn cheăng dêi Tơnêi têa, tơdroăng mơhnhôk pro troăng kân tung thôn pơlê a tơring Čư Jut , kong pơlê Dak Nông châ mơnhong po rơdâ lâp lu. Ing tơdroăng hnê mơhno, hiăng ai rơpâu rơpŏng kuăn pơlê hiăng pleăng dêi tơnêi, tơlo liăn ngân, tơmeăm khoăng mơjiâng pro troăng kân tung thôn pơlê, veăng pro ăm ngiâ méa thôn pơlê a tơring Čư Jut, kong pơlê Dak Nông rế mơnhông tơ-ƀrê.

Mơnhên troăng prôk thôn pơlê cho môi tung mâu tơdroăng pơkâ ki xơpá vâ pro tung ‘’Khu pơkâ tơnêi têa ‘na thôn pơlê nếo’’. Xua mê, mơjiâng pro hngêi trăng, troăng klông prôk tơkoh pơla thôn pơlê tơtro ƀă pêi pro Tơdroăng pơkâ tơnêi têa mơjiâng thôn pơlê nếo châ tơring Čư̆ Jut, kong pơlê Dak Nông mơnhên cho hnoăng cheăng ki kal. Rêm hơnăm, khu râ Đảng, khu kăn pơkuâ tơring tơkŭm pơkâ thế mâu ƀơrô, khu pơkuâ tơdroăng cheăng, Vi ƀan hnê ngăn mâu cheăm tơkŭm séa ngăn, pro túa pơkâ ƀă pơkâ mơ’no mâu troăng ki kơjo kum ‘no liăn cheăng.

Vâ hơ’leh mâu tơdroăng mơjiâng troăng prôk thôn pơlê a tơring, pakĭng kơxô̆ liăn kum dêi tơnêi têa, dêi kong pơlê, tơring Čư̆ Jut ối hbrâ rơnáu tung tơdroăng ki krếo thế, mơhnhôk tơ’mot kơxô̆ liăn ‘no cheăng dêi mâu tíu pêi cheăng, khu mơdró kâ, veăng kum dêi kuăn pơlê vâ tơbleăng pêi pro. Bu riân krê tung hneăng hơnăm 2016 – 2020, lâp tơring Čư̆ Jut hiăng mơhnhôk châ vâ chê 250 rơtal liăn vâ ‘no liăn mơjiâng thôn pơlê nếo; tung mê, kuăn pơlê ƀă khu mơdró kâ veăng kum vâ chê 44 rơtal liăn, u ối cho liăn Tơnêi têa kum.

Tơring hiăng pêi pro tro túa pơkâ ‘’kuăn pơlê ‘nâi, kuăn pơlê tơpui, kuăn pơlê pêi ƀă kuăn pơlê séa ngăn’’. Tiah mê, tâi tâng mâu tơdroăng cheăng ki ai tơdjâk troh tơdroăng rêh ối pơrá châ tơbleăng tơdrăng a ngiâ kuăn pơlê, xua tơná kuăn pơlê a thôn, cheăm tơpui tiô túa ki tơniăn krê mê ah pơkâ tơkŭm pêi pro. Ƀă khu pơkuâ bu cho ngế ki pơkâ, mơ’no mâu troăng hơlâ tŏng kum vâ kum kuăn pơlê pêi pro mâu troăng hơlâ pơkâ tơdjuôm.

Kuăn pơlê  veăng pro troăng prôk tung thôn pơlê

Xua châ tơdroăng ki môi tuăn dêi kuăn pơlê, mê hnoăng cheăng ‘mâi xĕn, gu tơbăng tơnêi kum ăm hnoăng cheăng pro tơ’lêi hlâu. ‘Mâi xĕn tơmeăm, gu tơnêi pro tơbăng troh dâng lâi cho mâu rơpŏng kuăn pơlê ki ối a kĭng troăng pơrá mơhnŏng pleăng xêh tơnêi ki ôh tá pâ thế chêl thiê̆n. Rêm râ, mâu kơvâ cheăng sap ing tơring troh pơlê, cheăm mơnhên mâu tơdroăng cheăng pêi pơrá athế tơtro ƀă rơhêng vâ, loi tơngah ƀă ki pơxúa dêi kuăn pơlê. Kơnôm mê, tơdroăng pleăng tơnêi pro troăng prôk a mâu kơpong kuăn pơlê rêh ối hiăng châ pêi pro dêi tâi tâng kuăn pơlê.

Klêi kơ’nâi 10 hơnăm mơjiâng thôn pơlê nếo, troh nôkố, tơring Čư̆ Jut, kong pơlê Dak Nông hiăng ai lối 170 km troăng cheăm châ tôh chhá kơxu, ok ƀê tong, châ lối 70% tâi tâng ki xŏn dêi troăng prôk tung lâp tơring. Nôkố, hiăng ai 5 tung 7 to cheăm dêi tơring pro klêi ‘na troăng prôk.

Troh nôkố, kơpong tơdế cheăm Nam (Yong) Dong hiăng châ mơnhên kơphô̆ túa 5; pơlê kân Ea Tling châ mơnhên kơphô̆ túa má 4. Lâp tơring ai 6 tung 7 to cheăm pêi klêi thôn pơlê nếo. Chiâng vâ tối nhên: châ tơ-ƀrê sap ing mơnhông troăng prôk thôn pơlê tơtro ƀă mơjiâng thôn pơlê nếo a Čư̆ Jut cho kơnôm ai tơdroăng veăng kum kơhnâ dêi khu pơkuâ tơdroăng kal kí, tơdroăng ki djâ troăng ahdrối dêi kăn ƀô̆, đảng viên ƀă tơdroăng ki môi tuăn tŏng kum dêi kuăn pơlê.

Môi víu thôn pơlê hâi kố a cheăm Tâm Thắng, tơring Čư̆ Jut

Kố cho tơdroăng ki kal vâ tơring pêi châ tơ-ƀrê troăng hơlâ dêi Đảng tung mơjiâng thôn pơlê nếo, mơdêk cheăng kâ rêh ối pơlê pơla tơring mơnhông.

Pôa Nghiêm Hồng Quang, kăn hnê ngăn Vi ƀan tơring Čư̆ Jut, kong pơlê Dak Nông ăm ‘nâi: Vâ pêi pro châ tơ-ƀrê tơdroăng mơjiâng pro hngêi trăng, troăng klông hneăng hơnăm 2020 – 2025, tơring pơtối mơhnhôk veăng tơlo liăn sap ing liăn ngân tơnêi têa, mâu tơdroăng pơkâ dêi tơnêi têa, mơhnhôk mâu khu tơrŭm, mâu ngế krê veăng tơlo vâ ‘mâi rơnêu mâu troăng prôk tung tơring, troăng mot tung cheăm, pro troăng ƀê tong a mâu troăng kuăn pơlê rêh ối, pro troăng thôn pơlê tơtro ƀă tơdroăng mơjiâng thôn pơlê nếo, ai sap ing 2 – 3 to cheăm pêi klêi thôn pơlê nếo; cheăm Nam Dong chiâng pơlê kân – kơphô̆ túa má 5; pơlê kân Ea Tling mơnhông tiô troăng pơlê kong krâm kơphô̆ túa má 4 troh hơnăm 2030.

Hlá tơbeăng Dak Nông

Katarina Nga tơplôu ƀă tơbleăng