Pơma hơdăh truh trong iung jang kơ tơmang pơhiơ̆ hrei ou ‘noh atŏk tơ iung rơgoh ‘lơ̆ng păng kơjăp ‘lơ̆ng kơna tơgoăt tơdrong jang logistics hơnih jang gre păr-tơmang pơhiơ̆-hơnih truh kăl iung jang kiơ̆ dôm tơdrong kăl hloh păng gĭt kăl ‘noh pơjing đei tơmam drăm tơmang pơhiơ̆ ‘lơ̆ng liĕm, hơnhăk đei “hưch hanh kơtang” vă tơmoi teh đak đe hưch hanh păng vih hơlơ̆k năm tơ̆ Việt Nam dơ̆ng. Mưh lei, tơmang pơhiơ̆ Việt Nam pơm lơ liơ vă iŏk đei jơhngơ̆m đon hôn bơnê đơ̆ng tơmoi? ‘Nou jĭ nơ̆r apĭnh păng kăl đei trong jang kăl jang kiơ̆ mă hơmŏ hơvơn đei tơmoi teh đak đe năm tơ̆ Việt Nam roi năr roi lơ đơng TS. Võ Trí Thành, Kơdră chĕp pơgơ̆r Hơnih tơm Chă tơchĕng hơlen trong jang kăl păng pơjei:“Tơmang pơhiơ̆ Việt Nam hăm dôm trong kăl vă atŏk tơ iung tơmang pơhiơ̆, ‘noh tơmang pơhiơ̆ jang kiơ̆ răh, hơlen, pơchơt pơ hiơ̆, tơgop kon pơlei pơla. Kơ yuơ lơ loh, tơdrong tơlĕch ăn ‘noh tơmang pơhiơ̆ Việt Nam kăl pơm lơ liơ, iung jang lơ liơ vă pơjing đei hơyak pran ăn jơhngơ̆m đon hưch hanh hăm tơmoi tơmang pơhiơ̆ ‘noh jĭ gô mơ̆ng lơ̆m tơdrong trŏ lăp păng pơvih pơvăn ‘lơ̆ng liĕm lơ liơ”.

Lăp đon hăm trong jang ou, ƀok Vũ Quốc Trí, Tổng thư ký Khul Tơmang pơhiơ̆ Việt Nam, tơbăt hơdăh trong jang đơ̆ng nơ̆r tơchơ̆t kơtơmang pơhiơ̆ Việt Nam ‘noh Timeless Charm (Tơdrong ‘lơ̆ng rŏ hơmŏ nhen hloh):“Trong jang ‘noh kăl iung jang khoa hŏk nhen trong teh đak đe jang. Nơ̆r tơchơ̆t gơ̆h vei kơjăp (Việt Nam ‘lơ̆ng rŏ hơbŏ nhen hloh), mă lei trong tơƀôh tơbăh hơ iă hloh dơ̆ng. Kiơ̆ kơ ĭnh, tơdrong kăl hloh hơnăn tơ iung pơjing ‘noh hơvơn tơmoi teh đak đe mơ̆t, kơ yuơ lơ loh ưh kơ gơ̆h lăp chih nơ̆r Việt. Jơhngơ̆m đon nhôn ‘noh tơdrong ‘lơ̆ng rŏ kơ Việt Nam ‘noh tơdrng ‘lơ̆ng sơ̆ ki, hrei ou păng hơnô̆ hơnăp kơnh. Ưh khan kăl pơjing đei lơ mă lei kăl đei tơdrong ‘lơ̆ng hơ iă gei hơnơ̆ng”.

Găh ƀok Nguyễn Ngọc Bích - Kơdră chĕp pơgơ̆r Rustic Hospitality Group, Kơdră chĕp pơgơ̆r tơplih ‘nao tơchăr tơdrong vă jang tơmang pơhiơ̆ Thuỵ Sĩ kơ yuơ tơdrong atŏk tơ iung kơjăp ‘lơ̆ng akhan, ƀôh hơdăh đơ̆ng lơ sơnăm jang tơmang pơhiơ̆ đei ƀôh, ‘meh vă atŏk tơ iung tơmang pơhiơ̆ ‘noh rim hơnih mơdro sa kăl đei jang hơdoi kơjăp, “atŭm dih băl yak truh hơtăih hloh dơ̆ng” tơplih ăn kơ yuơ “bu kĕ bu jang” nhen hrei ou:“Ĭnh vang năm hăm khul joăt jang atŏk tơ iung tơmang pơhiơ̆ rơgoh ‘lơ̆ng kơ Mekong-startup, ‘noh ĭnh ƀôh bơ̆n hlôi đei lơ trong jang mă lei oei lăp mĭnh ƀar trong jang đơ̆ng mĭnh ƀar hơnih mơdro sa. Mă kăl bơ̆n kăl akŏm dôm trong vă jang ‘noh, pơjing đei jing tơdrong joăt ăn tơpôl atŏk tơ iung rơgoh ‘lơ̆ng, pơjing đei khul jang tơmang pơhiơ̆ rơgoh ‘lơ̆ng păng atŏk tơ iung mŭk drăm rơgoh ‘lơ̆ng kơ Việt Nam”.

Pơma hơdăh găh hơnăp jang kơ hơnih jang gre păr lơ̆m trong jang  logistics, ƀok Lê Tuấn Anh, Kơdră Hơnih bơ̆ jang Chĕp pơgơ̆r tơmang pơhiơ̆ păng Nơ̆r Teh đak đe, Hnam trương Đăi hŏk Văn hoá Hà Nội, akhan:“Tơmoi teh đak đe truh hăm Việt nam hloh 80% ‘noh hăm trong hao gre păr. Kơ yuơ lơ loh, găh tơdrong tơmang pơhiơ̆ tơklep hăm hơnih jang gre păr kăl kơjăp iăp kơtang hloh dơ̆ng. Hơnih jang gre păr jei jing hơnih tơƀôh tơbăt gĭt kăl, kơ yuơ tơmoi năm truh hăm Việt Nam ‘noh đei tơƀơ̆p hăm hơnih jang gre păr. Kơ yuơ lơ loh, lơ̆m yan ou, dôm um rup kơ Việt Nam đei ƀôh hơdăh đơ̆ng hơnih jang gre păr, kơna hơnih jang gre păr ‘noh blŭng a, pơtôch păng vih hơlơ̆k dơ̆ng kăl lăng kơjăp”.

Lơ̆m khei năr roi năr roi đei lơ teh đak pơjei dih băl kơtang vă hơvơn tơmoi tơmang pơhiơ̆ teh đak đe, ‘noh tơdrong Việt Nam kơrŭn đĭ ai iung jang gre păr chơ tơmoi păng tơmang pơhiơ̆ đei trong jang kăl păng druh kiơ̆ apŭng plĕnh teh. Tơdrong atŏk kơtang ƀôh kang bang kơ̆l hơnăn tơmang pơhiơ̆ Việt Nam lơ̆m apŭng plĕnh teh, iung jang dôm tơdrong đei kơ gre păr, hăm trong lăng Việt Nam đei jing hơnih tơm logistics ‘lơ̆ng rŏ mưh cham gre păr Long Thành ming man keh đang lơ̆m sơnăm 2025, rim hơnih mơdro sa Việt Nam băt atŭm dih băl jang hơdoi vă atŏk tơ iung tơmang pơhiơ̆ rơgoh ‘lơ̆ng-hăm rim hơnih truh sơđơ̆ng, ‘lơ̆ng rŏ, phăl hơlăng, pơjing đei jơhngơ̆m đon hiôk chơt, hưch hanh hơmanh bơnê ăn tơmoi teh đak đe mưh năm truh tơ̆ Việt Nam păng ‘meh vă năm tơ̆ Việt Nam dơ̆ng.