Kiơ̆ Anih tơm vei lăng pơtho pơhrăm sơnăm hŏk 2024-2025, jơ̆p tơring Tây Nguyên đei hlŏh 4.500 anih pơtho pơhrăm đơ̆ng lăm mầm non truh cao đẳng, đăi hŏk, hăm vă jê̆ 1,5 triu hŏk tro đơ̆ng lăm mầm non truh lăm 12. Rim hnam trưng đei pơm tơ̆ jơ̆p tơring, pơm lăp hăm tơdrong ‘mĕh hŏk pơhrăm đơ̆ng đe oh hŏk tro păng tơdrong pơtho pơhrăm; hnam trưng the đak rong hŏk tro kon kông kŭm đei man lăp ‘lơ̆ng, pơm lăp hăm tơdrong ‘mĕh vă pơtho khul bơngai jang jĭ bơngai kon kông. Dôm tơring ‘măn đơ̆ng 20% jên mong vă tơmât ăn tơdrong pơtho pơhrăm, atŭm hăm ‘nŏh krao hơvơn tơpôl vang tơgop vă atŏk tơiung pơtho pơhrăm.

Mă lei, tơdrong pơtho pơhrăm tơ̆ Tây Nguyên oei đei lơ tơdrong tam mă ‘lơ̆ng, tam mă pơm lăp hăm tơdrong ‘mĕh vă; kơsô̆ hnam trưng lăp hăm dôm tơdrong hơgăt oei tŏ sĕt, kơsô̆ tơmam, kơmăy kơmŏk vă pơtho pơhrăm tam mă ‘lơ̆ng, kơsô̆ thây kô pơtho rơgei oei tŏ sĕt ƀiơ̆ kơsô̆ jô̆ păh lăp lơ̆m teh đak. Thây kô oei ưh kơmăh, dôm tơdrong tơgŭm tam mă đei yoa ‘lơ̆ng, ƀơm ưh ‘lơ̆ng truh tơdrong vă pơm hơtŏk tơdrong pơtho pơhrăm tơ̆ tơring.

Tơ̆ hơnăp tơdrong ‘nâu, Anih tơm vei lăng pơtho pơhrăm tơlĕch tơdrong jang “Hơtŏk tơdrong ‘lơ̆ng mưh pơtho pơhrăm ăn kon pơlei kon kông Tây Nguyên” hăm đon pơhnŏng truh sơnăm 2030, pơtho pơhrăm tơ̆ tơring đei tơplih ‘nao ‘lơ̆ng kiơ̆ chăl ‘nao, gơ̆h hơgei; pơm ‘lơ̆ng vă rim bơngai đei hŏk pơhrăm ‘lơ̆ng ngăl, pơm lăp hăm tơdrong ‘mĕh vă jang tŏk tơ̆ tơring lơ̆m chăl ‘nao.

Tơ̆ hop akŏm, dôm bơngai tang măt pơma nuh găh rim tơdrong đei tơ̆ tơring kơdih; atŭm hăm ‘nŏh tơlĕch lơ trong jang vă tơgop ăn tơdrong jang đơ̆ng Anih tơm vei lăng pơtho pơhrăm. ‘Nŏh jĭ hơtŏk tơdrong chĕp kơ̆l pơgơ̆r vă tưk tơiung pơtho pơhrăm; tơplih ‘nao trong pơtho pơhrăm; tơlĕch jang ‘lơ̆ng tơdrong pơtho nơ̆r kon kông; tơlĕch lơ tơdrong tơgŭm vă sơng iŏk thây kô năm pơtho tơ̆ tơring hơtăih yăih, pơmat tat...

Pơma truh tơdrong tơlĕch jên man hơmet hnam trưng hrei ‘nâu, ƀok Lê Bá Cường, Phŏ kơdră vei lăng pơtho pơhrăm dêh char Đắk Nông akhan: tơdrong tơlĕch trong man hnam trưng, lăm hŏk ‘nŏh jĭ tơdrong kăl hlŏh vă gơ̆h đei hnam hŏk kơjăp ‘lơ̆ng.

“Găh tơmam, lăm hŏk athei đei tơdrong jang ‘măn hơdrô̆ ăn tơring Tây Nguyên, mă ưh ‘nŏh tơdăh lơ̆m dôm tơdrong jang tơm kơ teh đak đei hloi dôm yơ kon jên vă pơ ‘nhŏ ăn tơdrong man hnam hŏk, răt tơmam hŏk pơhrăm lăp ‘lơ̆ng. Lơ̆m noh athei chih hơdăh tơgŭm ăn thây kô đei hnam oei, Anih oei xa hơdai jĭ 1 lơ̆m dôm tron g jang ‘lơ̆ng vă hơmet lê̆ tơdrong mă thây kô tơ̆ tơring hơtăih yăih đa ‘mĕh brŏk hloi mưh truh tơ̆ âu yoa ưh đei hnam oei, ưh đei anih tep, đe sư ưh pơ̆n pơtho đunh tơ̆ âu”

Oei ƀok Lưu Tiến Quang, Phŏ Kơdră vei lăng pơtho pơhrăm dêh char Đắk Lắk ăn tơbăt, Đắk Lắk đei hlŏh 1,9 triu ‘nu kon pơlei, hăm 49 hơdrĕch hơdrung oei xa hơdoi, kon pơlei kon kông đei hlŏh 30%. Vă hơtŏk tơdrong ‘lơ̆ng ăn pơtho pơhrăm, athei hơtŏk hnam trưng rong hŏk tro kon kông, hnam trưng ăn hŏk tro oei xa kơtă; đei tơdrong tơgŭm mă lăp vă sơng thây kô; pơih xă hŏk tro đei tơgŭm; jang hơdoi hăm dôm anih jang, khul jang chinh trĭ, tơpôl, mă loi ‘nŏh tưk tơiung hơnăp jang đơ̆ng đe kră pơlei, ƀok pơgơ̆r pơlei, bơngai đei kon pơlei lui yom vă hơtŏk kơsô̆ hŏk tro năm hŏk...

Dôm bơngai tang măt oei pơma tơlĕch nơ̆r găh chih hơdăh bơngai păng tơring teh vă tơmât yoa tơdrong jang, tơchĕng truh tơdrong tơmât hơdai tơring nhen oei sut pơđĭ lê̆ tơring pha ra băl păng tơdrong kăl đei ƀôh tơ̆ rim tơring. Yă Vũ Thị Ánh, Phŏ Kơdră Anih vei lăng pơtho pơhrăm phổ thông ăn tơbăt, dôm nơ̆r pơma vang tơgop tơ̆ hop akŏm jĭ tơdrong tôch gĭt kăl vă chih tơlĕch hla ar hơnơ̆ng hơmet pơ ‘lơ̆ng dôm tơdrong kăl lơ̆m tơdrong jang, adrol kơ bơ̆ jang dôm hơyak đơ̆ng rŏng dơ̆ng vă tơroi ăn Khul kơdră teh đak set hơlen, pơdrơ̆ng nơ̆r.

“Nơ̆r tơgop đơ̆ng iĕm, dôm bơngai jang tơ̆ Anih vei lăng pơtho pơhrăm tơ̆ tơring ‘nŏh tôch kăp gĭt vă khul chih tơlĕch trong jang nhôn mơ̆ng, chih tơmât dơ̆ng dôm tơdrong kăl đei ƀơm truh tơ̆ yăn âu kŭm nhen tơlĕch dơ̆ng lơ trong jang tơ̆ hơnăp kơnh vă gơ̆h jang đei lăp hăm tơdrong ‘mĕh vă, mă loi jĭ dôm tơdrong mă Đảng păng teh đak oei tôch pơngơ̆t lơ̆m tơdrong pơtho pơhrăm tơ̆ Tây Nguyên nhen tơdrong xoă mu chư, pơtho pơhrăm păng kơsô̆ hơioh năm hŏk tơ̆ lăm, mă loi hăm hơioh kon kông tơ̆ dôm tơring hơtaih yăih; vang tơgop pơm hơtŏk tơdrong ‘lơ̆ng vă pơtho khul bơngai jang rơgei ăn tơring Tây Nguyên”.

Hop akŏm “Tơdrong pơtho hŏk pơhrăm tơ̆ yăn âu tơ̆ tơring Tây Nguyên păng nơ̆r tơgop ăn Tơdrong pơm hơtŏk tơdrong ‘lơ̆ng mưh pơtho pơhrăm ăn kon pơlei kon kông Tây Nguyên” đei pơgơ̆r tơ̆ Đắk Lắk hlôi tơƀôh hơdăh đon pơngơ̆t tôch dêh đơ̆ng Anih tơm vei lăng pơtho pơhrăm, kŭm hăm dôm tơring vă dar deh hơmet pơ ‘lơ̆ng dôm tơdrong pơmat tat, ưh kơlăp oei đei lơ̆m tơdrong pơtho pơhrăm tơ̆ tơring teh oei đei lơ tơdrong nol âu. Dôm nơ̆r tơgop tơpăt ‘lơ̆ng, lăp hăm yăn âu đơ̆ng dôm bơngai tang măt jĭ tơdrong tôch kăp gĭt vă hơmet pơ ‘lơ̆ng tơdrong jang, năm truh đon pơhnŏng klĕp sơnăm 2030, pơtho pơhrăm Tây Nguyên đei tơplih ‘nao ‘lơ̆ng tơpă, pơm lăp hăm tơđrong ‘mĕh vă jang tŏk pran kơjăp, hơtŏ băl păng tôm tơdrong ăn đĭ đăng kon pơlei – mă loi ‘nŏh jĭ kon hơ ‘lơ̆p bơngai kon kông.